E tauturu anaˈe i te mau amuiraa o te titau ru nei i te mau Piha no te Basileia
1 Ua riro mau â te feia o te tutava nei i te hamani maitai atu ia vetahi ê ei ‘taata-tupu’ no ratou (Luka 10:36, 37). Mai te ati Samaria hamani maitai ra i roto i te parabole a Iesu, te faaohipa nei te mau Ite no Iehova i te hoê tuhaa rahi o to ratou puai, to ratou taime e ta ratou mau faufaa materia no te tauturu atu ia vetahi ê. E nehenehe teie here i te taata-tupu e faaitehia na roto i te hoê ravea faahiahia mau i roto i te taatoaraa o ta tatou tuhaa fenua i te pae no te porotarama paturaa i te mau Piha no te Basileia, oia iho â râ i roto i te tuhaa o te Afata taa ê o tei haamauhia aita i maoro aˈenei i roto i ta tatou tuhaa fenua.
2 I te mea e aita o Iehova i faaea i te ‘faahaere oioi’ i ta ˈna ohipa i mua e i te horoa mai i te maraaraa, ua naeahia ia tatou te hoê numera teitei roa ˈˈe e 1 650 feia poro, vahihia i roto e 30 amuiraa (Isa. 60:22). Auaa râ hoi, maoti te aau maitai tei faaitehia mai e te rahiraa o te mau melo o te nunaa o Iehova, ua faatiahia vetahi o te mau Piha o te Basileia e titauhia ra no te numera e maraa noa ra o te mau amuiraa. Ua haapopouhia te turu maitai roa i horoahia mai i te Taiete, e oia atoa te mau tutavaraa a te mau hanere rave ohipa o tei pûpû i to ratou taime e to ratou aravihi no te patu i te mau Piha no te Basileia apî aore ra no te faaapî i te tahi atu.—Sal. 110:3; Ioane 13:35.
3 Maoti te mau ô e rave rahi a te mau taeae, ua nehenehe te Taiete, i nia i ta ˈna iho faufaa no roto mai i te mau pûpûraa, e tauturu i te paturaa e 6 Piha no te Basileia apî i roto i na ahuru matahiti i mairi aˈenei. E 5 opuaraa o te ravehia ra i teie nei.
4 Noa ˈtu e e tuhaa rahi tei rave-ê-na-hia i te pae no te paturaa aore ra te tataˈiraa i te mau Piha no te Basileia, te vai nei â te hoê titauraa ru. E tia i ta tatou amaa ia aufau e rave rau mau haamâuˈaraa teimaha i te pae no te mau tauihaa aravihi (mai te mau matini roro uira, te mau matini no te neneiraa, e vetahi atu â), ma te ore e taio i te mau paturaa na te Taiete e opuahia ra no a muri aˈe, e te titauhia ra e rave rahi atu â mau Piha no te Basileia no te faaruru i te maraaraa. No reira te Afata taa ê no te mau Piha no te Basileia i haamauhia ˈi. A ô noa mai ai te mau ô i roto i teie afata, e nehenehe ïa e rave mai i roto no te tauturu i te mau amuiraa o te titau ra i te tauturu no ta ratou Piha no te Basileia.
MEA NAFEA TEIE AFATA TAA Ê IA FAAOHIPAHIA
5 E faaohipahia te Afata a te Taiete no te mau Piha no te Basileia mai te hoê afata moni o te “ohu noa”, oia hoi te auraa, e tuuhia ˈtu te mau ô i roto i te hoê vairaa moni o te faaohipa-noa-hia no te horoa tarahu i te moni i te mau amuiraa no Polinesia eita e maraa ia ratou ia aufau i te taatoaraa o te mau haamâuˈaraa no ta ratou paturaa. Noa ˈtu e o te mau ô te tuuhia i roto i teie Afata, eita teie mau tino moni e faataehia ˈtu i te mau amuiraa ei mau “ô” no te puohu i te aufauraa i te hoê paturaa, tera râ, e horoa-tarahu-hia ma te faahoˈihia mai e te hoê faito apî raro roa. A maraa noa ˈi te tino moni e faahoˈihia mai e a apitihia mai ai te mau ô ê atu no te turu i teie Afata, e nehenehe ïa e horoa tarahu faahou atu i te moni i te tahi mau amuiraa o te opua atoa ra e patu.
6 Na te Taiete e aufau i te mau haamâuˈaraa no te faatere i teie afata taa ê, mai te mau rata, te mau aparauraa i te pae no te ture e te mau moni hau. No reira, e faaohipa-noa-hia te farane taitahi e faataehia ˈtu no te Afata ia horoa-tarahu-hia ˈtu na te mau amuiraa e titau ra.
EAHA TE NEHENEHE E RAVEHIA I ROTO I TE AMUIRAA IHO
7 Tei te tino matahiapo te haamaramaramaraa i te feia poro e hinaaro ra e horoa i te mau ô no te turu i te Afata taa ê a te Taiete no te mau Piha no te Basileia, no nia i te mau faanahoraa i ravehia i roto i te amuiraa. Mai ta te rata o te 18 no tiunu 1993 i faaite, e tia i te amuiraa tataitahi ia faataa i te hoê afata tei papaihia i nia iho “AFATA A TE TAIETE NO TE MAU PIHA NO TE BASILEIA”. A haapao e ia tuuhia oia i te hoê vahi e naeahia i te mau taata atoa. Mai te peu e e haamata te hoê amuiraa i te hoê opuaraa no te paturaa, e nehenehe e tuuhia te tahi atu afata e faataa-ê-hia no teie tumu. No reira, eita te taata poro tataitahi e haamarirau i te vahi i ta ˈna mau ô no te turu i te ohipa o te Basileia i te pae materia.—Kor. 2, 9:7.
8 E rave rahi mau amuiraa o te fanaˈo nei i te hoê tino moni ta ratou i tarahu i te Taiete o ta ratou e faahoˈi ra. No vetahi mau amuiraa, ua riro te reira ei tutavaraa rahi i te pae moni. Eiaha ia moehia i te mau matahiapo o taua mau amuiraa nei ia haapopou e ia haamauruuru i te mau taeae no te feruriraa faatusia o ta ratou e faaite nei. E mea faufaa râ ia haamanaˈo e te faaitoitohia nei tatou paatoa ia turu i te mau faanahoraa e ravehia ra no te Afata a te Taiete no te mau Piha no te Basileia i roto i te faito e maraa ia tatou e ma te paari.—A hiˈo Korinetia 2, 8:11-15.
9 Mai te peu e e fifi-noa-hia ˈtu te hoê amuiraa i roto i te tahi area taime no te faahoˈi i te moni ta ˈna i tarahu i te Taiete, e faaitoito te mau matahiapo i te amuiraa ia faatura i ta ˈna parau i tǎpǔ. Teie râ, eita e tano, no taua tumu nei, ia tatara i te Afata a te Taiete no te mau Piha no te Basileia. E tano atoa teie huru raveraa no te mau amuiraa o tei rave i te faaotiraa e aufau iho â ma te tamau i te tahi tuhaa moni no teie afata. O te hoê faaotiraa amui teie o te ore e tia ia tapea i te taata e hinaaro ra e tuu i ta ˈna iho tuhaa i roto i teie afata taa ê.
10 Te fanaˈo ê na ra paha vetahi mau amuiraa i ta ratou Piha no te Basileia, aore ra ua fatata roa i te pee. Maoti teie faanahoraa apî, e nehenehe teie mau amuiraa, mai te peu e e hinaaro ratou, e tauturu i te tahi atu mau amuiraa ia noaa mai i te hoê Piha no te Basileia e tano. E faaoti paha ratou e faatae i te mau avaˈe atoa ei ô na te Afata a te Taiete no te mau Piha no te Basileia i te hoê â tino moni o ta ratou i faatae na ei aufauraa i ta ratou tarahu. Mai te peu e e nehenehe, e faataa ˈtu ïa te mau matahiapo i te hoê faaotiraa i mua i te amuiraa, ia nehenehe oia e faaite i to ˈna manaˈo i roto i teie tuhaa.
11 E ohihia te moni i roto i teie afata i muri aˈe i te putuputuraa tataitahi e e taio te taeae haapao faufaa i te hopea o te avaˈe tataitahi te taatoaraa o te mau ô e e hapono atu oia i te Taiete ra. Mai te peu e e itehia te hoê taa-ê-raa rahi i rotopu i te mau ô no te faahoˈi i te hoê tarahu e te mau ô faataahia no te Afata a te Taiete no te mau Piha no te Basileia, eita e tia i te mau matahiapo ia rave i te moni i nia i te mau ô faataahia no te Afata, tera râ, e tia ia ratou ia faataa ˈtu i te mau taeae i te faufaaraa ia vahi maitai i ta ratou mau ô ia nehenehe te amuiraa ia faatura i ta ˈna parau i tǎpǔ.
EAHA TA TE TAATA TATAITAHI E NEHENEHE E RAVE
12 E nehenehe atoa ta te taata tataitahi e faatae atu i te mau ô i te Taiete ra ma te haapapu e na te Afata a te Taiete no te mau Piha no te Basileia. E haapapu te Taiete e ua tae mai iho â te mau ô atoa e horoahia mai no te turu i teie Afata taa ê, e te hinaaro nei matou e haamauruuru taa ê ia outou no te horoa maitai o ta outou i faaite e tae roa mai i teie nei. Auê ïa taa-ê-raa e e te haerea miimii o teie nei ao! Ua riro teie mau ô ei tapao no te here taeae e vai ra i rotopu i te nunaa o te Atua. Ua riro atoa ei tapao haapapuraa e te anaanatae nei tatou i ‘te feia tei riro ei fetii no tatou i roto i te faaroo’ e te hinaaro nei tatou e hamani maitai i to tatou taata-tupu. E hopoi mai iho â teie mau huru maitatai roa apitihia i to tatou hinaaro e ohipa no te maitai o vetahi ê i te mau haamaitairaa: “E tei ia outou te reira mau mea, e te rahi ra, na te reira e faaite e, aore outou i toaruaru e te hotu ore i te ite i to tatou Fatu ia Iesu Mesia ra.”—Petero 2, 1:1, 8; Gal. 6:10.
TE MAU TOMITE PATURAA NO TE HOÊ FENUA NOMINOHIA E TE TAIETE
13 No te faaoioi i te porotarama paturaa i te mau Piha no te Basileia, ua nomino te Taiete i te tahi mau matahiapo o te tavini i roto i te Tomite paturaa no te pae fenua, e ta ˈna tapao, o te tautururaa ïa i roto i te paturaa i te mau Piha no te Basileia. E rave rahi o teie mau taeae paari i te pae varua o tei noaa i te aravihi i te pae o te paturaa fare, te hooraa i te mau fenua e te mau fare, te ohipa tapihooraa, te mau ravea no te parururaa e vetahi atu mau tuhaa apiti. E nehenehe ïa ta ratou e horoa i te mau aˈoraa papu, mai te haamataraa e tae noa ˈtu i te hoperaa o te hoê opuaraa, no te paturaa anei i te hoê Piha no te Basileia apî aore ra no te faaapîraa i te mau fare e faaohipahia ei Piha no te Basileia. Na te Taiete e horoa i te mau faaueraa i teie tomite. E faataa ˈtu te tiaau haaati i te mau matahiapo o te mau amuiraa nafea ratou e nehenehe ai e faaara ˈtu i te tomite mai te peu e e titau ratou i ta ˈna tauturu.
14 Mai te peu e e opua te hoê amuiraa e rave i te hoê paturaa apî aore ra te hoê ohipa tataˈiraa rahi, e e hinaaro oia e fanaˈo i te tauturu a te Tomite paturaa no te pae fenua, e ape ïa oia i te mau hape teimaha i te pae moni ia faaara ˈtu oia i teie tomite na mua ˈˈe oia e hoo mai ai i te fenua e e maiti ai i te hoê hohoˈa fare. Ia opuahia te hoê paturaa i roto i te hoê oire tei reira hau atu i te hoê amuiraa, e nehenehe te maitiraa i te fenua e tauaparauhia e te tiaau haaati e vetahi atu mau matahiapo o taua vahi ra. Peneiaˈe e tauturu te reira ia maitihia te hoê vahi ohie eiaha noa no te amuiraa hoê aore ra e rave rahi e ô mai i roto i teie opuaraa, o te faaateatea atoa râ i te mau Piha no te Basileia tapiri mai e o te haamaitai i te maraaraa i roto i te taatoaraa o te tuhaa fenua. E i roto atoa i te mau vahi mea iti aˈe te taata, e mea pinepine e nehenehe e maiti i te hoê fenua e faaohipahia e e piti amuiraa aore ra hau atu.
TE RAVEA PATURAA
15 Te faaitoito nei te Taiete e ia faanahohia te mau ohipa ia haere mai te mau taeae aravihi te tahi i muri aˈe i te tahi ia titau-anaˈe-hia ta ratou toroa i roto i te tereraa o te paturaa. I te rahiraa o te taime, e nehenehe e noaa mai i roto i te mau amuiraa tapiri, i te tahi atu feia rima tauturu e titauhia no te rave i te hoê paturaa, e e nehenehe atoa e faanaho e ia haere mai ratou e rave i te ohipa i te mau hora faataahia. No reira, i te mau taime atoa, e iti mai ïa te feia rave ohipa i nia i te vahi paturaa. Mea rahi atu ïa te mau taeae o te nehenehe e faaea e to ratou utuafare e te mau melo o ta ratou amuiraa, e e apiti atu i roto i te pororaa i te tahi mau taime i roto i te hopea hebedoma o te paturaa. Te faaitoitohia ra e ia taotiahia te numera o te feia e haere mai i nia i te vahi paturaa, eiaha noa no te arai i te mau fifi i te pae no te parururaa, oia atoa râ no te haamǎmǎ mai i te amuiraa na ˈna e haapao i te paeau maa no te feia rave ohipa, te paeau no te faaearaa aore ra te tahi atu mau ohipa. Te titauhia ˈtu nei te feia o tei ore i faataahia no te tauturu i roto i te hoê paturaa ia turu atu i te mau ohipa pae varua i roto i ta ratou iho amuiraa.
MAU HOHOˈA FARE
16 E mea titauhia ia maiti maitai i te mau hohoˈa o te hoê fare, ia ore ia tuu-faufaa-ore-noa-hia te hoê hopoia teimaha i nia i te mau taeae o te amuiraa, e ia ore atoa ia haamâuˈahia te mau faufaa o te Afata no te mau Piha no te Basileia i faanahohia e te Taiete. Oia mau, te hinaaro nei tatou e ia nehenehe maitai ta tatou mau Piha no te Basileia; teie râ, e tia atoa ia vai haehaa noa e te ohie ia faaohipa maoti hoi i te faaunauna rahi roa. Te oaoa nei matou i te faaara ˈtu e, no teie nei tumu, e haaputu mai i te Taiete i te tahi mau hohoˈa huru rau o te mau Piha no te Basileia apî, ta te mau amuiraa e opua ra e haamata i te hoê paturaa e nehenehe e tuatapapa. Ia ineine anaˈe teie mau hohoˈa fare, e faaarahia ˈtu iho â te mau amuiraa, e e nehenehe e faataehia ˈtu i te mau matahiapo titauhia.
17 E tia ia feruri maitai ia maitihia te hoê hohoˈa fare o te tano maitai i te mau hinaaro no teie nei taime o te hoê aore ra e rave rahi mau amuiraa, e o te vaiiho atoa i te hoê area tano maitai no te maraaraa. E tia ia faito-maitai-hia teie mau tuhaa atoa, ia patuhia te hoê piha o te ore e rahi roa e aita hoi e faufaa, aore ra o te nainai roa. I roto i te tahi mau tupuraa varavara roa, peneiaˈe e mea maitai ia paraparau atu te mau matahiapo i te mau tia mana no to ratou vahi, mai vetahi mau piha toroa taa ê a te fare oire, hou ratou e faanaho ai i te mau hohoˈa fare no te paturaa i te hoê Piha no te Basileia.
E TITAURAA RU TEIE
18 Te haamanaˈo ra anei outou e mea nafea to te nunaa o Iehova pahonoraa i te titauraa a te arii ra o Davida e to ˈna pûpûraa i te mau ô ma te horoa maitai no te patu i ‘te fare o Iehova’? Te faaite ra te Paraleipomeno 1, 29:6-9 e “oaoa roa aˈera te taata i te mea, ua horoa noa te taata; e ma te aau maitai i te horoa-noa-raa ia Iehova”. Te turai nei teie atoa aau maitai i te mau kerisetiano i teie mahana ia tamau â i te tapitapi no to ratou mau taeae e mau tuahine no te tahi atu mau amuiraa o te titau nei i te mau Piha no te Basileia au maitai.
19 Te hoê ravea maitai roa no te faahanahana ia Iehova, o te horoaraa ïa i to tatou taime e ta tatou mau faufaa no te turu i te noaaraa mai i te mau Piha no te Basileia apî (Mas. 3:9). Te horoaraa i ta ˈna tauturu ia nehenehe te tahi atu mau amuiraa e fanaˈo i te mau Piha no te Basileia e titauhia ra, ua tuea ïa e te Korinetia 2, 8:14, 15, irava e na ô ra e e “faito” te mau ohipa. Ia pure tatou ma te tuutuu ore ia Iehova ia tamau noa oia i te haamaitai e i te aratai i ta tatou mau tutavaraa i roto i teie ohipa e ravehia ei arueraa ia ˈna, e tia ˈi.