Ua ineine anei outou no te hoê tamaaraa pae varua?
1. E titau te hoê tamaaraa i teihea huru faaineineraa?
1 E titau te hoê tamaaraa i te faaineineraa e rave rahi. E mea tia ia noaa mai te maa, ia faaineinehia ma te au, e ia pûpûhia ˈtu. E mea tia ia faanahohia te opereraa i te maa. Hau atu â, e titauhia ia ineine te vahi tamaaraa. E titauhia ia faaineine atoa te mau manihini, ia tere atea iho â râ ratou no te tae i reira. Noa ˈtu e e rave rahi ohipa tei titauhia, e e mea hoona ia amu i te maa au roa e te maitai e te mau hoa e te utuafare. E fatata te mau Ite no Iehova na te ao atoa nei i te fanaˈo, ei pǔpǔ rarahi e te nainai, i te hoê tamaaraa pae varua tiai-rahi-hia—te tairururaa mataeinaa “E ara!” E rave rahi ohipa tei rave-ê-na-hia ia ineine te porotarama e te mau ohipa. O tatou paatoa tei titau-manihini-hia. No te tae atu e te haafaufaa roa i te reira, e mea tia ia faaineine atoa tatou ia tatou iho.—Mas. 21:5.
2. Eaha te titauhia no te fanaˈo i te taatoaraa o ta tatou tamaaraa pae varua?
2 E haafaufaa roa anaˈe: Ua faanaho anei outou i ta outou porotarama no te fanaˈo i te taatoaraa o te tamaaraa pae varua? Ia titauhia, a paraparau i ta outou paoti no te faaara ia ˈna e e haere outou i te mau rururaa atoa o ta outou tairururaa, i te mahana matamua atoa. Ua rave anei outou i te mau faanahoraa hopea no te faurao e te nohoraa? Ia papu i te mau matahiapo e ua haapaohia te mau ruhiruhia, te feia tino paruparu, e te tahi atu atoa e hinaaro ra i te tauturu.—Ier. 23:4; Gal. 6:10.
3. No te aha tatou e ore ai e haere i te hoê tairururaa nunaa rau aita tatou i titau-manihini-hia?
3 E tupu te mau tairururaa nunaa rau i te tahi mau fenua. A haamanaˈo e ua titau-manihini-hia te tahi noa mau amuiraa e tia no te ara no taua mau tupuraa ra. Ia ratou i faanaho i te reira, ua feruri maitai te amaa ehia rahiraa taata e titau manihini, ma te haapao i te rahiraa parahiraa e piha hotera e vai ra. E rahi roa paha te taata mai te peu e e haere te feia poro i te hoê tairururaa nunaa rau aita ratou i titau-manihini-hia.
4. Teihea mau haamanaˈoraa e tauturu ia tatou ia ineine a haamata ˈi te porotarama i te mahana taitahi?
4 A faanaho i te tae oioi i te tairururaa i te mahana taitahi no te imi i te hoê parahiraa hou te porotarama e haamata ˈi. Tau minuti hou te rururaa a haamata ˈi, a hiˈopoa i te porotarama. E tauturu te reira ia outou ia faaineine i to outou aau no te mau haamaramaramaraa e horoahia mai. (Eze. 7:10) Ia omua mai te peretiteni o te rururaa i te upaupa, a faaroo i te reira ma te oaoa a vai ineine noa ˈtu ai i te apiti i te himene e te pure haamataraa.
5. E nafea to tatou utuafare e faufaa-roa-hia ˈi i te porotarama?
5 Ia parahi amui te mau melo utuafare i te roaraa o te tairururaa, e ite ïa te mau metua e te faaroo maitai nei ta ratou mau tamarii i te porotarama. (Deut. 31:12) Te faaitoitohia ra te taatoaraa ia pee i te taioraa o te mau irava atoa i roto i ta ratou Bibilia. E nehenehe te tapaoraa i te mau manaˈo poto e tauturu ia outou ia faaroo maitai. I muri aˈe, e tauturu ta outou mau tapaoraa ia outou ia haamanaˈo i te mau tuhaa faufaa o te mau oreroraa parau. A ape i te hinaaro e paraparau i te mau mea faufaa ore i te roaraa o te rururaa aore ra i te tia tia noa. Mai te peu e e vini ta outou, eiaha te reira e faanevaneva ia outou e ia vetahi ê i te roaraa o te porotarama. I muri aˈe i na rururaa taitahi, no te aha e ore ai e tauaparau e vetahi atu i ta outou i au i roto i te porotarama?
6. Eaha te tahi tuhaa faahiahia o ta tatou mau tairururaa, e e nafea tatou e nehenehe ai e haafaufaa roa i te reira?
6 E taime maitai te tairururaa mataeinaa no tatou no te fanaˈo i te hoê taairaa hoê roa e to tatou mau taeae e tuahine, te ore e itehia ra i roto i teie ao. (Sal. 133:1-3; Mar. 10:29, 30) No te aha eita ˈi e faaite ia outou i te feia e parahi ra i pihai iho ia outou e e tauaparau e o ratou i te taime tamaaraa? Tera te tahi vahi maitai o te afairaa ˈtu i te hoê maa mâmâ e o te faaearaa i te vahi tairururaa eiaha râ e haere i te hoê fare tamaaraa. Eiaha tatou ia ere i tera taime maitai no te haamahanahana te tahi i te tahi.—Roma 1:11, 12.
7. E mea tia ia rave tatou i teihea mau faaineineraa no nia i te ahu ta tatou e oomo?
7 Ahu: E tia ia tapao e ua faaue Iehova i te mau Iseraela ia hamani i te faaunaunaraa i nia i te hiti o to ratou ahu, e te hoê taamu ereere tapemoana i nia aˈe i taua faaunaunaraa ra. (Num. 15:37-41) E haamanaˈoraa ite-mata-hia te reira e ua faataa-ê-hia te hoê nunaa no te haamori ia Iehova. I teie mahana, e faataa ê to tatou faaahuraa tura e te au i te tairururaa ia tatou i teie ao. E riro te reira ei faaiteraa puai na te feia mataitai ia haere tatou i te mau fare tamaaraa i muri iho i te porotarama. No reira, a feruri maitai i te ahu ta outou e oomo.
8. E nafea tatou e nehenehe ai e horoa i te faaiteraa ia vetahi ê i te oire tei reira te tairururaa?
8 A horoa i te hoê faaiteraa: Ma te faaineine rii na mua ˈˈe, e nehenehe ta tatou e horoa i te faaiteraa i te taata i te oire tei reira te tairururaa. Ua tia i te hoê taeae tei haere e ta ˈna vahine i te hoê fare tamaaraa i muri aˈe i te porotarama ia faaite noa i ta ˈna tareta tairururaa i te tuati e ua ui atu ia ˈna: “Ua ite anei oe e rave rahi taata e teie tareta?” Ua parau te tuati e ua tapao iho â oia ia ratou e ua uiui no te aha hoi. Ua tupu te hoê tauaparauraa, e ua titau manihini te taeae i te tuati i te tairururaa.
9. E nafea tatou e nehenehe ai e faaite i to tatou mauruuru i Tei titau manihini mai, o Iehova?
9 Noa ˈtu e o to tatou mau taeae te horoa i te mau oreroraa parau, te mau uiuiraa manaˈo, e te mau faahiˈoraa, o to tatou Metua i te raˈi râ o Iehova te horoa ma te here i tera tamaaraa pae varua matahiti. (Isa. 65:13, 14) E faaite tatou i to tatou mauruuru i Tei titau manihini mai ma te haere e te amu i te mau tâpû maa pae varua atoa e horoahia mai. Ua rave anei outou i te mau faaineineraa hopea no te na reira?
[Tumu parau tarenihia i te api 6, 7]
Haamanaˈoraa no te tairururaa mataeinaa
◼ Hora: E haamata te porotarama i na mahana atoa e toru i tehora 9:20. E matara te opani i te hora 8. A taˈi ai te upaupa, e mea titauhia ia haere tatou paatoa e parahi ia nehenehe te porotarama e haamata ma te tura. E hope te porotarama i tehora 4:55 i te Mahana pae e te Mahana maa e i te hora 4 i te Tapati. No te mau tairururaa nunaa rau, e haamata te porotarama i tehora 1:20 i te avatea i te Mahana maha e e hope i tehora 4:45.
◼ Vairaa pereoo: I te mau vahi tairururaa atoa i reira te pereoo e tiaihia ˈi, e nehenehe e tomo atu ma te tamoni ore e e faanahohia na mua te mau pereoo e tae matamua mai. O te mau pereoo anaˈe e fanaˈo nei i te parau faatia a te ture no te tapea i te mau vahi faataahia no te mau huma mero (parau tapiri) te nehenehe e tapea i reira. I te mea e mea taotiahia te vairaa pereoo, e mea maitai eiaha e haere mai i te tairururaa hoê aore ra e piti taata hoê pereoo.
◼ Parahiraa: E tapaohia te mau parahiraa no te feia anaˈe e tere na muri ia oe aore ra e noho ra i ǒ oe.
◼ Tamaaraa i te avatea: A hopoi mai i ta oe maa eiaha râ e faarue i te vahi tairururaa i te taime faafaaearaa i te avatea no te haere e hoo mai i te maa. E nehenehe oe e faaohipa i te hoê farii faatoetoeraa maa nainai o te nehenehe e tuuhia i raro aˈe i to oe parahiraa. Eita e fariihia te mau farii faatoetoeraa maa rahi e te mau farii hiˈo i te vahi tairururaa.
◼ Ô: E nehenehe tatou e faaite i to tatou mauruuru no te mau faanahoraa no te tairururaa ma te horoa noa i te mau ô no te ohipa na te ao nei i ta tatou Piha a te Basileia aore ra i te tairururaa. E mea tia ia papaihia i nia i te parau moni atoa o te horoahia ˈtu i te tairururaa te iˈoa: “Association Les Témoins de Jéhovah.”
◼ Ati e rapaauraa ru: No te hoê rapaauraa ru i te vahi tairururaa, a faaite atu i te hoê taeae e haapao ra i te fariiraa o te faaara oioi i te utuuturaa matamua. I reira, na te hoê pǔpǔ tauturu rapaauraa e hiˈo e mea atâta anei te tupuraa e e rave i tei titauhia. Ia hinaarohia, e niuniu ratou i te piha rapaauraa ru.
◼ Tiaa: I te mau matahiti atoa mea rahi roa te pepe nei no te mau tiaa. E mea au aˈe ia oomo mai i te mau tiaa au maitai e te tano no te haere i nia i te mau taahiraa, te mau niuniu e te vai ra ˈtu â.
◼ Haruharuraa: Eiaha e patia i te mau mauhaa faaharuharuraa i nia i te mau faahaereraa uira aore ra i nia i te faanahoraa o te haapurororaa, e eiaha roa ˈtu to ratou faaohiparaa ia haapeapea ia vetahi ê.
◼ Pereoo turairai tamarii e parahiraa tufetu: E opanihia te mau pereoo turairai tamarii e te mau parahiraa tufetu i te vahi tairururaa. E faatiahia râ te mau parahiraa aiû o te nehenehe e tamauhia i nia i te hoê parahiraa i pihai iho i te mau metua.
◼ Faanoˈanoˈa: I te mea e e faatupuhia ta tatou mau tairururaa i te hoê vahi e tapirihia te opani, e tapao o te hamani maitai eiaha e pîpî faarahi i te monoˈi e te faanoˈanoˈa hauˈa puai o te nehenehe e haafifi i te feia e maˈi hutiraa aho to ratou aore ra te tahi atu.—Kor. 1, 10:24.
◼ Atuatu i te anaanatae: E faaohipahia te api parau Veuillez suivre l’intérêt (S-43) no te horoa i te mau haamaramaramaraa no nia i te taata atoa tei anaanatae i te pororaa faanaho-ore-hia i te roaraa o te tairururaa. E manaˈo ïa te mau taata poro i te afai mai hoê aore ra e piti o taua api parau ra. E nehenehe te mau api parau i faaîhia e horoahia i te tuhaa haapao buka aore ra i te papai parau o ta oe amuiraa ia hoˈi atu oe.—A hiˈo i Ta tatou taviniraa i te Basileia no Fepuare 2005, api 6.
◼ Fare tamaaraa: A faahanahana i te iˈoa o Iehova na roto i to oe haerea maitai i te mau fare tamaaraa. I vetahi mau fenua, ua matauhia i te vaiiho i te tahi moni haamauruuru na te tuati.
◼ Hotera: (1) Eiaha e tarahu i te mau piha hau aˈe i te hinaaro-mau-hia, e a faatura i te rahiraa taata fariihia no te hoê piha. (2) Mai te peu e e mea titauhia ia faaore i ta oe tarahuraa, a faaara oioi atu i te hotera. (3) A rave noa i te hoê turairaa taihaa ua ineine anaˈe oe i te faaohipa i te reira, e a faahoˈi oioi atu ia nehenehe te tahi atu e faaohipa i te reira. (4) Eiaha e tunu i te maa i roto i te mau piha mai te peu e eita e faatiahia. (5) I vetahi mau fenua, e mea tano ia vaiiho i te tahi moni haamauruuru na te vahine tamâ piha (6) E vai faito noa tatou ia rave tatou i te maa e pûpûhia na te mau hoani o te amuhia i te hotera (maa, taofe aore ra pape paari). (7) A faaite i te hotu a te varua i nia i te mau rave ohipa o te hotera i te mau taime atoa. (8) Ia fifi oe e to oe piha, a faaara ˈtu i te tuhaa haapao i te nohoraa i te tairururaa.