Eaha te taa-ê-raa i rotopu i te Tino Aratai e te hoê taatiraa e au i te ture
MAI te avaˈe Tenuare 1885 mai â te faatupuraahia te mau apooraa matahiti a te Watch Tower Bible and Tract Society of Pennsylvania. A haaputuputuhia ˈi te mau Kerisetiano faatavaihia i te hopea o te senekele 19, e tiaturiraa e haere i nia i te raˈi to te mau melo o te Apooraa Tiaauraa e to te Tomite Faatere a teie taatiraa. Oia mau, fatata e mai tera noa te tupuraa.
Te vai ra hoê tupuraa taa ê. I te matahiti 1940, ua maitihia o Hayden C. Covington—te auvaha ture a te Taiete i taua tau ra e hoê o te mau “mamoe ê atu” e tiaturi ra e ora i nia i te fenua—ei melo no te Apooraa Tiaauraa a te Taiete. (Ioane 10:16) Ua haa oia ei mono peretiteni o te Taiete mai te matahiti 1942 e tae atu i te matahiti 1945. I taua matahiti ra, ua faahoˈi Taeae Covington i ta ˈna hopoia tiaauraa no te faaau i nia i tei manaˈohia i taua taime ra e o te hinaaro o Iehova—oia hoi e mau Kerisetiano faatavaihia te taatoaraa o to te Apooraa Tiaauraa e to te Tomite Faatere a te taatiraa no Pennsylvanie. Na Lyman A. Swingle i mono ia Hayden C. Covington i roto i te Apooraa Tiaauraa, e o Frederick W. Franz tei maitihia ei mono peretiteni.
No te aha te mau tavini a Iehova i manaˈo ai e e mau Kerisetiano faatavaihia te taatoaraa o to te Apooraa Tiaauraa e to te Tomite Faatere a te Watch Tower Bible and Tract Society of Pennsylvania? No te mea i taua tau ra, e taai-roa-hia te Apooraa Tiaauraa e te Tomite Faatere a te taatiraa no Pennsylvanie i te Tino Aratai a te mau Ite no Iehova, mea matauhia e e mau tane faatavaihia anaˈe ratou i te varua.
Te hoê apooraa matahiti faufaa roa
I te apooraa matahiti i tupu i te 2 no Atopa 1944, i Pittsburgh, ua farii te mau melo o te taatiraa no Pennsylvanie e ono faaotiraa o te taui i ta ratou pǎpǎ ture. I faataa na te pǎpǎ ture e e fanaˈo te feia o te horoa i te moni no te ohipa a te Taiete i te hoê numera reo ia au i ta ratou i horoa, tera râ, ua faaore te toru o te tauiraa i te reira. Ua tapao te hoê parau faataa o taua apooraa matahiti ra e: “E taotiahia te mau melo o te Taiete eiaha ia hau atu i te 500 . . . Mea titauhia ia riro te melo taitahi e maitihia ei tavini taime taatoa na te Taiete aore ra ei tavini afa taime na te hoê taiete [amuiraa] a te mau ite no Iehova e ia faaite i te huru feruriraa o te Fatu.”
I muri aˈe, mea titauhia ia riro te feia o te maiti i to te Apooraa Tiaauraa a te Taiete ei mea pûpûhia ma te taotia-ore-hia na Iehova, noa ˈtu eaha te rahiraa moni ta ratou i horoa ia haere te ohipa a te Basileia i mua. Ua tuea te reira e te mau faatano-mǎrû-raa i tohuhia i roto i te Isaia 60:17, e na ô ra: “E onohia mai e au te veo i te auro; e onohia mai e au te auri i te ario; e onohia mai e au te raau i te veo; e onohia mai te ofai i te auri. E faariro vau i to mau hiˈopoa ra ei hau; e to mau titau taoˈa ra, ei parau-tia.” No nia i te “mau hiˈopoa” e te “mau titau taoˈa,” te faaite ra teie parau tohu i te tahi mau faatanoraa i roto i te mau raveraa i te pae faanahonahoraa i roto i te nunaa o Iehova.
Ua tupu teie taahiraa avae faufaa e faaau i te faanahonahoraa i nia i te hau teotaratia i te hopea o na “piti tausani e toru hanere i te mahana,” i papaihia i roto i te Daniela 8:14. I taua taime ra, ua ‘tamâhia te vahi moˈa.’
I muri aˈe râ i te apooraa matahiti taa ê i te matahiti 1944, te vai noa râ te hoê uiraa faufaa roa. I te mea e ua taai-roa-hia te Tino Aratai i te Apooraa Tiaauraa e hitu melo a te taatiraa no Pennsylvanie i taua tau ra, te auraa anei ïa eiaha roa ia hau atu i te hitu Kerisetiano faatavaihia i roto i te Tino Aratai? Hau atu â, i te mea e na te mau melo o te taatiraa e maiti i to te Apooraa Tiaauraa, na te mau melo o te taatiraa anei ïa e maiti i to te Tino Aratai i te mau apooraa matahiti atoa? To te Apooraa Tiaauraa e to te Tomite Faatere a te Watch Tower Bible and Tract Society of Pennsylvania e te mau melo o te Tino Aratai, o taua noâ anei mau taata ra, aore ra mea taa ê ratou?
Te tahi atu apooraa matahiti eita e moehia
Ua pahonohia teie mau uiraa i te apooraa matahiti i tupu i te 1 no Atopa 1971. I taua putuputuraa ra, ua faaite hoê o te mau taeae orero e o te tino aratai a “te tavini haapao maitai e te paari” tei na mua ˈtu i te Watch Tower Bible and Tract Society of Pennsylvania, e tau hanere matahiti. (Mataio 24:45-47) Ua haamauhia te hoê tino aratai i te Penetekose 33 T.T., hau atu i te 18 senekele hou te taatiraa no Pennsylvanie i fa mai ai. I te omuaraa, e ere e 7 taata to roto i te tino aratai, 12 râ aposetolo. Papu maitai, ua rahi mai to ratou numera i muri aˈe, no te mea o ‘te mau aposetolo e te mau [matahiapo] i Ierusalema’ te aratai ra i te ohipa.—Ohipa 15:2; MN.
I te matahiti 1971, ua faataa taua noâ taeae orero ra e eita ta te mau melo o te Taiete Watch Tower e nehenehe e maiti i te mau melo o te Tino Aratai faatavaihia. No te aha? “No te mea,” ta ˈna ïa i parau, “e ere na te tahi taata e haamau i te tino aratai o te pǔpǔ o te ‘tavini.’ E nominohia ratou e . . . Iesu Mesia, te Upoo o te amuiraa Kerisetiano mau e te Fatu o te pǔpǔ o ‘te tavini haapao maitai e te paari.’” Mea maramarama maitai ïa, eita te mau melo o te Tino Aratai e nehenehe e maitihia e te hoê noa ˈˈe taatiraa e au i te ture.
Ma te haere i mua, ua horoa te taeae orero i teie tatararaa faufaa roa: “Aita e melo o te Tomite Faatere ta te tino aratai mai ta te Apooraa Tiaauraa a te Taiete, oia hoi te hoê peretiteni, te hoê mono peretiteni, te hoê papai parau haapao faufaa e to ˈna mono. E peretiteni noa to ratou.” E rave rahi matahiti i te maoro, o te peretiteni o te taatiraa no Pennsylvanie atoa te melo faufaa roa ˈˈe o te Tino Aratai. E ere faahou mai te reira. E ere hoê â tupuraa aore ra aravihi to te mau melo o te Tino Aratai, ua faito râ ta ratou hopoia. Ua parau faahou te taeae orero e: “O te mau melo atoa o te tino aratai te nehenehe e riro ei peretiteni ma te ore e riro i te hoê â taime ei peretiteni no te . . . Taiete . . . Tei te faaohuraa ïa o te tiaraa peretiteni i roto i te tino aratai.”
I taua apooraa matahiti o te ore e moehia i tupu i te matahiti 1971 ra, ua faataa-maitai-hia te taa-ê-raa i rotopu i te mau melo faatavaihia i te varua o te Tino Aratai e to te Apooraa Tiaauraa a te taatiraa no Pennsylvanie. Ua tamau noa râ te mau melo o te Tino Aratai i te haa ei melo no te Apooraa Tiaauraa e no te Tomite Faatere a te Taiete. I teie râ mahana, te hiti maira teie uiraa: Te vai ra anei te tahi tumu bibilia e titauhia ˈi ia riro te mau melo o te Apooraa Tiaauraa a te Watch Tower Bible and Tract Society of Pennsylvania ei melo no te Tino Aratai?
Te pahonoraa, aita. E ere o te taatiraa no Pennsylvanie noa te taatiraa e au i te ture e faaohipahia ra e te mau Ite no Iehova. Te vai ra ˈtu â. Teie hoê, te Watchtower Bible and Tract Society of New York, Incorporated. E faaohie teie taatiraa i ta tatou ohipa i te mau Hau Amui. Ua fanaˈo maitai taua taatiraa ra i te haamaitairaa a Iehova, noa ˈtu e e mau “mamoe ê atu” iho â to ˈna mau tiaau e mau faatere. O te International Bible Students Association teie e faaohipahia nei i Beretane. Te faaohipahia ra te tahi atu â mau taatiraa e au i te ture no te faahaere i te mau faufaa a te Basileia i mua i te tahi atu mau fenua. Te tauturu ra teie mau taatiraa atoa ma te au maite e e tuhaa ta ratou i roto i te raveraa e ia porohia te parau apî maitai e ati aˈe te fenua nei. Noa ˈtu te vahi aore ra o vai ma to te Apooraa Tiaauraa aore ra to te Tomite Faatere, te aratai-teotaratia-hia ra teie mau taatiraa e te faaohipahia ra e te Tino Aratai. No reira, e mau ohipa tei faataahia na taua mau taatiraa ra no te faahaere i te mau faufaa a te Basileia i mua.
Mea maitai no tatou ia haamauhia te tahi mau taatiraa e au i te ture. Mea na reira tatou e faaau ai i nia i te mau ture o te oire e a te hau, mai tei titauhia e te Parau a te Atua. (Ieremia 32:11; Roma 13:1) E faaohie te mau taatiraa e au i te ture i ta tatou ohipa haaparareraa i te poroi o te Basileia na roto i te neneiraa i te mau Bibilia, te mau buka, te mau vea, te mau buka rairai, e te tahi atu â mau mea. E mau mauhaa e au i te ture atoa taua mau taatiraa ra no te haapao i te mau mea mai te mau parau fatu fenua, te faanahoraa i te tauturu, te mau parau faaau no te faaohipa i te tahi mau vahi tairururaa, e te vai ra ˈtu â. Te mauruuru nei tatou no te tauturu a taua mau taatiraa e au i te ture ra.
To mua te iˈoa o Iehova
I te matahiti 1944, ua tauihia te Irava II o te pǎpǎ ture a te Watch Tower Bible and Tract Society of Pennsylvania no te haamataratara i te mau tapao a teie taatiraa. Ia au i te pǎpǎ ture, teie te tahi tapao a te Taiete: “E poro i te evanelia o te basileia o te Atua i raro aˈe i te aratairaa a te Mesia ra o Iesu i roto i te mau nunaa atoa ei faaiteraa i te iˈoa, te parau, e te rahi hau ê o te Atua Mana hope ra o IEHOVA.”
Mai te matahiti 1926 mai â, ua tuu noa “te tavini haapao maitai” i te iˈoa o Iehova i mua. I te matahiti 1931 iho â râ te ite-maitai-raahia te reira i to te Feia haapii Bibilia fariiraa i te iˈoa ra Ite no Iehova. (Isaia 43:10-12) I roto i te mau papai a te Taiete tei haafaufaa i te iˈoa o te Atua, te vai ra na buka ra Jéhovah (Beretane 1934), “Que ton nom soit sanctifié” (1964), e “Les nations sauront que je suis Jéhovah”—Comment? (1974).
E tia ia tapao-taa-ê-hia te mau Saintes Écritures—Traduction du monde nouveau, i neneihia i roto i to ˈna taatoaraa na roto i te reo Beretane i te matahiti 1960. I roto, te vai ra te iˈoa ra Iehova i te mau vahi atoa e vai ai Na reta Hebera e maha i roto i te mau Papai Hebera. I roto i teie huriraa, e ite-atoa-hia te iˈoa o te Atua i na 237 vahi i roto i te mau Papai Heleni Kerisetiano i te mau vahi e tano ia au i te hoê faahohonu-maitai-raa. Ia mauruuru ïa tatou e na roto i te mau ravea rau, ua faatia Iehova e ia faaohipa te “tavini” e ta ˈna Tino Aratai i ta ratou mau mea atoa i nenei e ta ratou mau taatiraa e au i te ture no te faaite i to ˈna iˈoa e ati aˈe te fenua nei!
Ua turuhia te opereraa i te Parau a te Atua
Ma te tuutuu ore, ua faaite haere te nunaa o Iehova i to ˈna iˈoa e ua haapao i ta ˈna Parau na roto i te neneiraa e te opereraa ehia mirioni papai niuhia i nia i te Bibilia e te Bibilia atoa. I te omuaraa o te mau matahiti 1900, ua noaa i te Taiete Watch Tower te tiaraa e na ˈna e nenei i te Bibilia The Emphatic Diaglott, te neneiraa interlinéaire Heleni Beretane o te mau Papai Heleni Kerisetiano a Benjamin Wilson. Ua nenei te Taiete i te King James Version a te Feia haapii Bibilia, tae noa ˈtu e 500 api tuhaa hau. I te matahiti 1942, ua nenei te Taiete i te King James Version ma te mau faahororaa i te hiti o te api. E i te matahiti 1944, ua haamata te Taiete i te nenei i te American Standard Version no 1901, o te faaohipa ra i te iˈoa o te Atua. E tuhaa taa ê atoa te iˈoa ra Iehova no The Bible in Living English, a Stephen T. Byington, neneihia e te Taiete i te matahiti 1972.
Ua tauturu te mau taatiraa e au i te ture e faaohipahia ra e te mau Ite no Iehova i te neneiraa e te opereraa i teie mau Bibilia atoa. Te mea faahiahia roa ˈˈe râ, ua haa amui maitai te Taiete Watch Tower e te pǔpǔ o te mau Ite no Iehova faatavaihia o te New World Bible Translation Committee. Te oaoa nei tatou e i teie mahana, hau atu i te 106 400 000 hohoˈa o teie huriraa taatoa aore ra te hoê tuhaa tei neneihia na roto e 38 reo. E taiete bibilia mau â te Watch Tower Bible and Tract Society of Pennsylvania!
Ua ‘faarirohia te tavini haapao maitai ei tiaau i te mau taoˈa a to ˈna fatu.’ I roto i teie mau taoˈa, te vai ra te mau fare o te pu rahi i te Hau no New York, i U.S.A, e na 110 amaa na te ao nei i teie mahana. Ua ite te mau melo o te pǔpǔ o te tavini e e titauhia ia faˈi ratou nafea to ratou faaohiparaa i tei horoahia na ratou. (Mataio 25:14-30) E nehenehe atoa râ ta te “tavini” e nomino i te mau tiaau aravihi i roto i te mau “mamoe ê atu” no te haapao i te mau hopoia tiaauraa e te au i te ture. Oia mau, maoti te reira e nehenehe ai te mau melo o te Tino Aratai e horoa hau atu â i te taime no ‘te pure e te haapii i te parau.’—Ohipa 6:4.
A faatia noa ˈi te mau tupuraa i roto i teie nei ao, e faaohipa te Tino Aratai, te tia no “te tavini haapao maitai e te paari,” i te mau taatiraa e au i te ture. Mea au ia faaohipahia te reira, e ere râ i te mea titau-roa-hia. Ia faaorehia te hoê taatiraa e au i te ture e te hoê faaueraa mana a te hau, e tamau noa te ohipa pororaa. I teie nei atoa, i te mau fenua te vai ra te mau opaniraa e aita e taatiraa e au i te ture e faaohipahia ra, te faaitehia ra te poroi o te Basileia, te faarirohia ra te taata ei pǐpǐ, e te tupu noa ra te maraaraa teotaratia. Te na reira ra no te mea te tanu ra e te pîpî ra te mau Ite no Iehova, e ‘te faatupu noa ra te Atua.’—Korinetia 1, 3:6, 7.
A hiˈo ai tatou i te tau a muri aˈe, ua papu ia tatou e e haapao Iehova i te mau hinaaro pae varua e materia o to ˈna nunaa. E tamau noa oia e ta ˈna Tamaiti, o Iesu Mesia, i te horoa mai i te aveia e te turu no te raˈi mai e hinaarohia no te rave faahope i te ohipa pororaa i te Basileia. Oia mau, ‘e ere i te puai taata, i te mana taata, i te varua râ o Iehova’ e manuïa ˈi te mau mea atoa ta tatou e rave ei mau tavini na te Atua. (Zekaria 4:6) E pure anaˈe ïa i te Atua no te ani i ta ˈna tauturu, ma te ite e maoti te puai ta Iehova e horoa maira e noaa ˈi ia tatou i te faaoti i te ohipa ta ˈna i horoa mai e rave i teie tau hopea!