A haapii ia vetahi ê ia here ia Iehova
1. Na te aha e haafatata ra ia vetahi ia Iehova?
1 Te haamanaˈo ra anei oe i te taime matamua i faaroo ai oe no nia ia Iehova? Eaha tei haafatata ˈtu ia oe ia ˈna? E parau atu e rave rahi taata aau haavare ore ia oe e ua haafatata ˈtu ratou i to tatou Atua Poiete, a haapii ai ratou no nia i to ˈna mau huru maitatai faahiahia mau, to ˈna iho â râ aumihi e aroha, aore ra here.—Ioa. 1, 4:8.
2, 3. E nafea tatou e faaohipa ˈi i te buka Bibilia haapii no te tauturu i te mau piahi Bibilia ia here atu â ia Iehova?
2 “Teie to tatou Atua”: Te haapapu roa ra te buka Bibilia haapii i to Iehova here e te faufaaraa ia faatupu i te hoê taairaa piri e o ˈna. E nafea tatou e faaohipa ˈi i tera papai no te haapii ia vetahi ê ia here atu â i te Atua? Ia hiˈopoa oe i te hoê manaˈo apî, e nehenehe oe e faahiti i te mau uiraa o te haaferuri i te taata, mai teie: “Eaha ta teie parau mau e faaite ra no nia ia Iehova?” aore ra “E nafea tera manaˈo e haapapu ai e o Iehova iho â te Metua maitai roa ˈˈe ta te hoê taata e nehenehe e hinaaro?” E nehenehe te na reiraraa i te haapii e tauturu i te piahi ia haamata i te hoê taairaa no te oraraa taatoa e o Iehova.
3 Ia tauturu tatou i te mau piahi Bibilia ia taa i te fanaˈoraa taa ê mau ia haapii i te ite i te Atua ora mau hoê roa, e farii ratou, mai te mau parau a Isaia, e “teie to [m]atou Atua.” (Isa. 25:9) Ia faataa tatou i te Parau a te Atua, e mea maitai ia haamahitihiti e nafea te huitaata e haamaitaihia ˈi na roto i te tupuraa o ta Iehova mau opuaraa maoti ta ˈna faatereraa arii i raro aˈe i te Mesia ra o Iesu.—Isa. 9:6, 7.
4, 5. Eaha te auraa ia here ia Iehova?
4 Tapao o te here no Iehova: Ua ite tatou e te titau ra te here ia Iehova ma te aau, nephe, e manaˈo atoa, hau atu i te mau huru aau puai noa no te Atua. E titauhia ia farii e ia pee maite tatou i to ˈna huru feruriraa. (Sal. 97:10) E itehia te here no te Atua na roto i te faarooraa i ta ˈna mau faaueraa atoa e te tamauraa i te rave i te mau mea “e tia ˈi i te haapao maitai e te paieti,” i mua atoa i te mau faahemaraa e patoiraa.—Pet. 2, 3:11; Ioa. 2, 6.
5 Ia rave tatou i to te Atua hinaaro no te mea ua here tatou ia ˈna, e mea au ïa. (Sal. 40:8) E mea maitai ia taa i te piahi e te mau parau, aore ra faaueraa, atoa a te Atua, no te maitai mure ore ïa o ta ˈNa mau tavini. (Deut. 10:12, 13) Ma te ora ia au i te aratairaa a Iehova, e faaite te hoê taata i te mauruuru hohonu no ta ˈNa mau ohipa faahiahia atoa. A tauturu i te piahi ia taa e e faatiamâ te haereraa na te mau eˈa tia a Iehova i te hoê taata i te mauiui e te oto e rave rahi.
6. E fanaˈo te hoê taata e here ia Iehova i teihea mau haamaitairaa?
6 Haamaitairaa no te feia e here i te Atua: Te haapao mau ra Iehova i te taata haehaa e here ra ia ˈna, e te faaite ra oia ia ratou i “te mau mea hohonu atoa a te Atua.” (Kor. 1, 2:9, 10) E tera ite i ta Iehova mau opuaraa, e mata maitai to ratou i nia i te a muri aˈe e e tiaturiraa papu. (Ier. 29:11) E fanaˈo te feia e here ra ia Iehova i to ˈna aroha taa ê mau. (Exo. 20:6) E poihere ratou i te tiaturiraa o te ora mure ore no to te Atua hoi here rahi ia ratou.—Ioa. 3:16.
7. Eaha to oe manaˈo i te haapiiraa ia vetahi ê ia here ia Iehova?
7 Rahi atu â tatou i te ite i to tatou Metua i te raˈi, rahi atu â tatou i te faaite ia vetahi ê. (Mat. 13:52) Auê ïa fanaˈoraa taa ê faito ore ia haapii ia vetahi ê, e ta tatou iho â râ mau tamarii, ia hinaaro aore ra ia here ia Iehova! (Deut. 6:5-7) Ia tamau tatou, e ta tatou atoa mau piahi Bibilia, i te parau â ma te arue ia Iehova a fanaˈo ai tatou i te ‘maitai rahi o Iehova.’—Sal. 145:7.