Te huri nei tatou i te mau pare i raro
1 Tau senekele i te maoro, ma te faaohipa i te mau haapiiraa hape e te haavare, ua haapouri Satani i te aau e te feruriraa o te taata e rave rahi. Ua haaparare oia i te mau haapiiraa mai te Toru tahi, te pohe-ore-raa o te nephe, e te po auahi. Te paturu ra oia i te manaˈo feaa o te vai-mau-raa o te hoê Atua Poiete e te tiaturi-ore-raa e o te Atua te fatu o te Bibilia. Te riri i te nunaa ê e te here aiˈa, o te tahi atu ïa mau haafifiraa rarahi i te maramarama o te parau mau. (Kor. 2, 4:4) E nafea tatou e nehenehe ai e huri i tera mau pare, te mau tiaturiraa aahia, i raro?—Kor. 2, 10:4, 5.
2 E titauhia te mau manaˈo hohonu: E mea pinepine e titau te mau tiaturiraa faaroo i tapea-maoro-hia i te mau manaˈo hohonu roa ˈˈe o te hoê taata. Ua tapea vetahi i te mau tiaturiraa hape mai to ratou tamariiraa mai â. No te tauturu i tera mau taata, e mea maitai ia paraparau tatou ma te faatura i to ratou manaˈo.—Pet. 1, 3:15.
3 E nehenehe tatou e faatura i taua mau taata ra ma te vaiiho ia ratou ia faataa mai i ta ratou e tiaturi ra e no te aha. (Iak. 1:19) Peneiaˈe te tiaturi puai nei ratou e mea pohe ore te nephe no te mea ua pohe tei herehia e ratou e te hinaaro ru nei ratou e ite faahou ia ratou. Aore ra te faatupu nei paha ratou i te mau oroa no te mea te oaoa nei ratou i te rave i te taime e to ratou utuafare. E tauturu te faarooraa i ta ratou mau parau ia tatou ia taa i to ratou huru aau e e tauturu ia tatou ia pahono ma te aravihi.—Mas. 16:23.
4 A pee i te hiˈoraa o Iesu: Ua horoa mai Iesu i te hoê hiˈoraa maitai roa a pahono ai oia i te mau uiraa a te hoê taata haapii Ture. Aita Iesu i pahono tia ˈtu, a patoi ai paha te taata no te mea e tiaturiraa poiherehia te reira. Ua faahiti râ Iesu i te mau Papai, ua titau ia ˈna ia faaite mai i to ˈna manaˈo, e ua tauturu ia ˈna ia feruri na roto i te hoê faahohoˈaraa.—Luka 10:25-37.
5 Eita roa ˈtu e nehenehe e faaauhia te mau tiaturiraa faaroo hape tei aa maitai i te parau mau o te Parau a te Atua. (Heb. 4:12) A haaputapû ai i te aau ma te faaoromai, e nehenehe ta tatou e tauturu i te taata ia faarue i te haavare e ia farii i te parau mau o te nehenehe e faatiamâ ia ratou.—Ioa. 8:32.