A ora ma te haamanaˈo i te mahana o Iehova
1 “Ua fatata te mahana rahi o Iehova, te fatata maira, te peepee maira i te haere.” (Zeph. 1:14) Ua ora Zephania e te tahi atu na peropheta 11, tei parauhia te mau peropheta iti, ma te haamanaˈo i te mahana o Iehova. E tauturu te hiˈopoaraa i ta ratou mau papai faaurua i te haapiiraa buka a ta tatou amuiraa, mai tei faataahia i roto i te buka Vivez en gardant à l’esprit le jour de Jéhovah, ia faaineine ia tatou no tera mahana riaria.—Zeph. 2:2, 3.
2 Te mau tuhaa taa ê otahi: Aita te buka Le jour de Jéhovah e tiatonu ra i te auraa taipe aore ra te mau tatararaa o teie mau buka parau tohu 12, te faataa ra râ e nafea tera mau papai faaurua e tano ai i te mau tupuraa o te oraraa mau ta tatou e farerei ra i te mau mahana atoa. Te haapapu ra te reira no te aha te manaˈo e te ru maira taua mahana ra e tia ˈi ia ohipa i nia i ta tatou mau faaotiraa e haaraa atoa. Te huti ra te buka i te ara-maite-raa i nia i te mau tuhaa o te oraraa utuafare, te mau taairaa e te mau hoa Kerisetiano, te maitiraa i te faaanaanataeraa, ta tatou taviniraa, e te mau faaotiraa no nia i te toroa.
3 E haamatau te Tuhaa 1 o te buka ia tatou i te mau peropheta 12 e ta ratou mau papai. O vai ma ratou? Eaha to tatou mau tupuraa e tuea ra i to ratou? E huti te Tuhaa 2 i te ara-maite-raa i nia ia Iehova e to ˈna mau huru maitatai. Te horoa ra tera mau peropheta i teihea haamaramaramaraa no nia ia Iehova e to ˈna huru? E haamataratara te Tuhaa 3 i to tatou iho huru e ta tatou mau raveraa. E nafea tatou e nehenehe ai e faaoaoa i te Atua i te mau mahana atoa na roto i te mau ravea e au ia faaohipa? E faataa te Tuhaa 4 e nafea ia ora ma te oaoa mau a haamanaˈo noa ˈi i te mahana o Iehova.
4 A faanaho i teie nei ia faufaahia oe: A faaoti papu i te rave i tei titauhia ia faufaa-roa-hia oe i te haapiiraa o te buka Le jour de Jéhovah, o te haamata i te hebedoma o te 4 no Atete 2008! A faanaho i te tae mai i te haapiiraa buka a te amuiraa i te mau hebedoma atoa. A faaineine maitai i te haapiiraa taitahi, a taio i te mau irava no te hiˈo e nafea te reira e tuea ˈi i te tumu parau e hiˈopoahia ra. A feruriruri i te haamaramaramaraa ma te ui ia oe iho: ‘E nafea vau e nehenehe ai e faaohipa i tera manaˈo i te fare, i te fare haapiiraa, i te vahi raveraa ohipa, i roto i ta ˈu taviniraa, e i roto i to ˈu mau taairaa e to ˈu mau taeae e tuahine Kerisetiano?’ A haere mai i te haapiiraa buka ma te faaineine ia oe no te pahono ia haamahanahanahia te tahi atu e oe atoa.—Roma 1:12.
5 Ia nehenehe ta tatou hiˈopoaraa i te buka Le jour de Jéhovah e faaineine ia tatou i teie nei, ia nehenehe tatou e “faaoromai” i te mahana “rahi e te riaria rahi” o Iehova. Oia mau, te fatata roa maira tera mahana!—Ioe. 2:11.