Pahonoraa i ta outou mau uiraa

◼ Eaha te mau fifi atâta ia faaohipa i te Internet no te aparau e te hoê taata aita tatou i matau?

E rave rahi afata poroi Web tei haamauhia ia nehenehe te taata e farerei e e aparau na roto i te Internet. E nehenehe te taata i nia e rave rahi o tera mau afata poroi ra e faatupu e e horoa i to ratou iho ihotaata, ma te tuu atoa paha i te mau hohoˈa e te tahi atu mau haamaramaramaraa no nia ia ratou iho. E nehenehe atura ïa te taata o te ite i te reira e farerei atu i to ˈna fatu. E mea mataro-roa-hia tera mau afata poroi Web e te feia apî, e ua faaohipa vetahi mau taurearea i roto i te amuiraa i te reira no te farerei i te tahi atu e faahua parau Ite no Iehova ra.

E mea ohie no te hoê taata ta tatou e farerei i nia i te Internet ia haavare mai no nia i to ˈna ihotaata, to ˈna huru i te pae varua, aore ra to ˈna mau hinaaro. (Sal. 26:4) E taata tiaturi ore, e taata tiavaruhia, aore ra e apotata atoa paha o te haa rahi ra i te faatopa i te mau Kerisetiano te taata e faahua parau ra e e Ite no Iehova ratou. (Gal. 2:4) Ia au i tei itehia, te faaohipa ra e rave rahi taata paari e hinaaro e taati i te mau tamarii i tera mau afata poroi no te imi i te tamarii e noaa ia ratou.

Noa ˈtu e ua papu ia tatou e e roo maitai to te feia ta tatou e aparau atu ra i roto i te amuiraa, e nehenehe te mau tauaparauraa i roto i taua tupuraa ra e riro ohie ei mea haapaoraa ore. No te aha? No te mea hoi e iti mai to te taata haama ia aparau e te feia aita ratou i farerei tino atu. I to ratou atoa paha manaˈo e mea omoe te aparauraa i nia i te roro uira e noa ˈtu eaha te mea ta ratou e parau, eita te reira e itehia e vetahi ê, mai to ratou mau metua aore ra te mau matahiapo. Teie râ hoi, ua hema tau feia apî no roto mai i te mau utuafare Kerisetiano e ua ô atu ratou i roto i te mau aparauraa hairiiri. (Eph. 5:3, 4; Kol. 3:8) Ua tuu te tahi atu i te mau hohoˈa faufau no nia ia ratou iho, te mau iˈoa pii hairiiri, aore ra te mau upaupa video faufau ino mau i roto i ta ratou ihotaata roro uira.

Ia au i tei faahitihia mai nei, e mea tia ia hiˈopoa te mau metua i te huru e faaohipa ˈi ta ratou mau tamarii i te matini roro uira. (Mas. 29:15) E ere anei i te mea atâta ia titau manihini i te hoê taata ěê i roto i to tatou fare aore ra ia vaiiho ia ˈna e ta tatou mau tamarii o ratou anaˈe? Oia atoa, e mea atâta no tatou aore ra no ta tatou mau tamarii ia faahoa ˈtu i te feia ěê i nia i te Internet, noa ˈtu e e parau mai ratou e e Ite no Iehova ratou.—Mas. 22:3.