Te parau apî maitai i nia i te Internet

I teie tau o te mau ravea aravihi, te rave nei te tahi mau taata i te mau maimiraa na roto i te mau reni roro uira, mai te Internet. No reira te Taiete i tuu ai i te mau haamaramaramaraa papu no nia i te mau tiaturiraa e te mau ohipa a te mau Ite no Iehova, ia taiohia e te feia faaohipa i te Internet.

Teie te vahi nohoraa o ta tatou afata poroi Web i nia i te Internet: http://www.watchtower.org. Te vai nei i roto i teie afata te mau api parau iti, te mau vea iti e te mau tumu parau no roto mai i Te Pare Tiairaa e te A ara mai na!, na roto i te mau reo Beretane, Farani, Helemani, Tinito (ohie), Paniora, Rusia e vetahi atu â mau reo. Te mau papai i tuuhia i roto i teie afata, o te mau papai ïa e vai ê na ra i roto i te mau amuiraa e o te operehia nei i roto i te taviniraa. No reira, te tumu i haamauhia ˈi teie afata Web, e ere ïa no te haaparare i te mau ohipa apî, no te vauvau atu râ i mua i te taata te mau papai e nehenehe e taiohia na roto i te roro uira. Aita ïa e faufaa e ia rave tatou tataitahi i te mau faanahoraa no te haapuroro na roto i te Internet i te tahi mau api no nia i te mau Ite no Iehova, ta tatou mau ohipa e ta tatou mau tiaturiraa. Inaha, na te afata poroi a te Taiete iho e horoa ra i te mau haamaramaramaraa papu e nehenehe e taiohia e te taata atoa e faaohipa i te Internet.

Aita ta tatou afata poroi i faanahohia ia haponohia mai i roto, te mau poroi roro uira (parauhia E-mail), tera râ, te horoa nei oia i te hoê tabula o te mau vahi nohoraa o te mau amaa na te ao atoa nei. E nehenehe ïa te taata e papai atu i te hoê o teie mau amaa no te ani i te mau haamaramaramaraa hau atu, aore ra ia haere-roa-hia mai ratou e tauturu na te mau Ite no to ratou vahi. Eiaha e haamarirau i te faaite i te vahi nohoraa o ta tatou afata Internet i faaitehia i nia nei, i te mau taata atoa e hinaaro ra e maimi i te mau parau mau Bibilia na roto i teie nei ravea.