Ia vai ara tatou i te mau fifi atâta o te Internet

¹ E mau taairaa maitatai to te mau tavini a Iehova te tahi i te tahi. E faatia ratou i ta ratou i farerei na i roto i te taviniraa e e oaoa ratou i te faaroo i te mau parau apî no te tahi atu mau Ite no Iehova e te ohipa o te Basileia i te ao nei. Mea au na ratou ia faaarahia ratou ia roohia to ratou mau taeae e mau tuahine i te ati, ia faaruru ratou i te hoê tamataraa aore ra ia roohia ratou i te hoê ati natura ei hiˈoraa; e e hinaaro ratou e ite e e nehenehe anei ratou e horoa i te tauturu. Te faaite ra teie anaanatae e ua tahoê te fetii taeae e te haapapu ra e te here ra tatou te tahi i te tahi.—Ioa. 13:34, 35.

² I teie mahana, e faaroo oioi tatou i te mau tupuraa i roto i te ao nei. E haapuroro roa mai te radio e te afata teata i te mau tupuraa e te mau tuhaa iti haihai no te mau huiraatira o te ao taatoa. E nehenehe atoa e niuniu oioi roa ˈtu i te taata i te mau vahi atoa. E te rahi noa ˈtura te hoê ohipa apî i te pae o te ravea haapurororaa: ua î te ao nei i te Internet.—Hiˈo i te A ara mai na! o te 22 no Tiurai 1997 (Farani).

³ Maoti te iteraahia te niuniu parau i nehenehe ai e paraparau oioi atu i te mau taata o te ao atoa nei. Teie râ, noa ˈtu e e mea faufaa roa te niuniu paraparau, e tia ia ara i te huru faaohiparaa i te reira; oia mau, e nehenehe te reira e aratai i te mau amuimuiraa aore ra i te mau ohipa tia ore, taa ê atu i te moni rahi ia taniuniu rahi. Oia atoa, e iriti te afata teata e te radio i te mau tuhaa i te pae o te haapiiraa. Ma te peapea râ, i rotopu i te mau porotarama, mea faufau te rahiraa, e e mâuˈa te taime ia mataitai i te reira. Te haapii maira te paari ia maiti maitai tatou i ta tatou e mataitai ra i te afata teata e ta tatou e faaroo ra i te radio.

⁴ E nehenehe e tauaparau na roto i te Internet ma te moni haihai te mau mirioni taata e ati aˈe te ao nei, e e horoa mai te reira e rave rahi roa ino haamaramaramaraa. (A ara mai na! o te 8 no Tenuare 1998 [Farani]) Teie râ, e nehenehe te hoê faaohiparaa matapo o te Internet e haafifi roa i te hoê taata i te pae varua e morare. Nafea ïa?

⁵ Te peapea ra e rave rahi i te iteraa e e mea ohie ia roaa mai te mau haamaramaramaraa no nia i te ravea e hamani ai i te mau mauhaa, oia atoa te mau topita. Te amuamu ra te feia tapihaa no te taime ta te feia rave ohipa e haamâuˈa ra i nia i te Internet. Ua faahiti maoro ta tatou mau papai i te mau fifi atâta i te pae varua e farereihia i nia i te Internet: te vai ra i roto e rave rahi mau afata poroi Web te mau parau papai no nia i te haavîraa uˈana aore ra faufau, te mau parau papai e ore roa ˈtu e tu ra i te Kerisetianoraa. (Sal. 119:37) Taa ê atu i teie mau fifi atâta, te vai ra te hoê fifi haavarevare roa ˈtu â te tia i te mau Ite no Iehova ia ara. Eaha ïa taua fifi atâta ra?

⁶ E titau manihini anei outou i te hoê taata ê i to outou fare ma te ore e ani na mua o vai râ o ˈna? E ahiri e aita e ravea e ite ai outou o vai o ˈna? E vaiiho anei outou i taua taata ê ra ia parahi o ˈna anaˈe e ta outou mau tamarii? Tera mau te ravea e pûpûhia ra e te Internet.

⁷ E nehenehe tatou e hapono i te hoê rata roro uira i te mau taata ěê e ta ratou ia outou. Oia atoa ia “aparau” tatou na roto i te roro uira i te hoê rururaa aore ra pǔpǔ aparauraa. E faahua parau paha te feia e apiti ra i roto e e mau Ite no Iehova ratou, e pinepine râ e ere. E nehenehe te hoê taata e haapapu mai e e taata apî oia e ere râ. Aore ra e nehenehe te hoê taata e haavare faaite e e tera aore ra tera to ˈna huru.

⁸ E mau aamu mau aore ra e mau tatararaa no nia i ta tatou mau tiaturiraa paha te mau haamaramaramaraa i faataehia ˈtu ia outou na. E faataehia ˈtu taua mau haamaramaramaraa ra ia vetahi ê, e o te horoa ˈtu i te tahi atu. E pinepine e aita te reira i hiˈopoahia, e i te tahi taime mea hape. E nehenehe te mau tatararaa e faaohipahia no te haaparare i te mau haaferuriraa taiva.—Tes. 2, 2:1-3.

⁹ No nia i taua fifi atâta ra, ia faaohipa outou i te Internet, a uiui i teie mau uiraa: ‘No te aha vau e faaohipa ˈi i te reira? E haafifi anei ta ˈu huru faaohiparaa i te reira ia ˈu i te pae varua? E nehenehe anei au e faaino i te huru pae varua o vetahi ê?’

¹⁰ Te mau afata poroi Web “Ite no Iehova”: E hiˈo anaˈe vetahi mau afata poroi Internet i haamauhia e te tahi mau taata e faahua parau ra e e Ite no Iehova ratou. E titau manihini ratou ia outou ia mataitai i ta ratou afata poroi no te taio i te mau aamu i haponohia e te tahi mau taata e parau ra e e Ite no Iehova ratou. E faaitoito ratou ia outou ia faaite i to outou mau manaˈo no nia i te mau papai a te Taiete. E horoa mai vetahi i te tahi mau omuaraa parau e faaohipa i roto i te taviniraa. E pûpû teie mau afata poroi i te mau pǔpǔ aparauraa ia nehenehe e paraparau roa ˈtu ia vetahi ê, mai na roto i te niuniu paraparau. E faaite pinepine ratou i te tahi atu mau afata poroi e nehenehe ai tatou e aparau roa ˈtu i te mau Ite no Iehova o te ao atoa nei. Ua papu anei râ ia outou e aita te mau apotata i roto i teie mau aitauiraa?

¹¹ Aita teie mau taairaa na nia i te Internet e tano mau ra i te faaueraa i faahitihia i roto i te Ephesia 5:15-17 [MN]. Ua papai te aposetolo Paulo e: “E ara ia tia to outou haerea, eiaha mai ta te ite ore ra, mai ta te feia ite râ, ma te faaherehere maite i te taime, no te mea e anotau ino teie. E eiaha to outou ei manaˈo [tano] ore, ia ite râ outou i to [Iehova] ra hinaaro.”

¹² O te amuiraa Kerisetiano te ravea teotaratia e faatamaa ˈi “te tavini haapao maitai e te paari” ia tatou i te pae varua. (Mat. 24:45-47) E ite tatou i roto i te faanahonahoraa a te Atua i te mau aratairaa e te hoê paruru ia faataa ê noa i te ao, oia atoa te mau manaˈo e turai ra ia itoito noa i roto i te ohipa a te Fatu. (Kor. 1, 15:58) Te faataa ra te papai salamo e ua oaoa e ua ora hau noa oia i rotopu i te mau tavini a te Atua i haaputuputuhia. (Sal. 27:4, 5; 55:14; 122:1) Te horoa atoa ra te amuiraa i te hoê tauturu e te hoê turu i te pae varua no te feia e amuimui ra ia ˈna. I roto, e pǔpǔ hoa î i te here e te haapao maitai to tatou, e hinaaro ra i to tatou maitai, te mau taata ta tatou i matau e o te ineine i te tauturu, te tamahanahana ia tatou i roto i te ati. (Kor. 2, 7:5-7) Ua paruruhia te mau melo o te amuiraa e te faanahoraa Bibilia o te faaue ra ia tiavaruhia te feia rave hara o te ore e tatarahapa aore ra o te haaparare i te mau manaˈo apotata. (Kor. 1, 5:9-13; Tito 3:10, 11) E nehenehe anei tatou e tiaturi e fanaˈo i te hoê â mau faanahoraa î i te here na roto i te mau taairaa e te tahi atu mau taata na nia i te Internet?

¹³ Mea papu e eita. Te faahaere mau ra vetahi mau afata poroi Web i te mau poroi a te mau apotata. I te tahi mau taime, e haapapu taua mau afata poroi ra e eita, e e nehenehe taua mau apotata ra e faataa huˈahuˈa roa e e Ite no Iehova ratou. E ani atoa paha ratou i te tahi mau haamaramaramaraa ia outou no te hiˈopoa e e Ite no Iehova mau outou.

¹⁴ Te hinaaro ra Iehova ia faaohipa tatou i te ite maite. No te aha? No te mea ua ite oia e e paruru te ite maite ia tatou i te mau fifi atâta rau. Te haamata ra te Maseli 2:10-19 [MN] na roto i teie mau parau: “Ia ô mai te paari i roto i to aau na, e ia riro te ite ei mea maitai ia oe ra; na te [aravihi o te feruriraa] e [paruru] ia oe i reira; e na te ite [maite] e faaora ia oe.” E paruru te reira ia tatou i te aha? I te ‘eˈa ino,’ ei hiˈoraa, o te feia e faarue ra i te mau eˈa o te parau-tia, e te feia peu morare tia ore e te haavarevare rahi.

¹⁵ Ia haere tatou i te Piha no te Basileia, tei rotopu mau â tatou i to tatou mau taeae e mau tuahine. Ua matau tatou ia ratou. Aita hoê aˈe e titauhia ia haapapu e no roto oia i te amuiraa, no te mea te faaite mau ra ratou i te here taeae. Eita hoê aˈe taata e ani ia tatou ia haapapu e e Ite no Iehova tatou. I reira e itehia ˈi te aitauiraa mau o te mau faaitoitoraa ta Paulo e parau ra i roto i te Hebera 10:24, 25. Eiaha e tiaturi e e ite tatou i te reira i roto i te mau afata poroi Web o te faaitoito ra i te mau taairaa. E haamanaˈo anaˈe i te mau parau o te Salamo 26:4, 5: te faaara maira te reira i te mau fifi atâta ta tatou e farerei ohie atu ma teretere na roto i te mau afata poroi o te Internet.

¹⁶ Eita e nehenehe e taotia aore ra e hiˈopoa i te mau huru haamaramaramaraa ta te feia e faaohipa e hamani ra aore ra e hiˈopoa ra i nia i te Internet. E pinepine, i roto i taua huru tupuraa ra, mea ohie no te feia ohipa ino e te feia faahepo ia râmâ i te mau tamarii e te mau taurearea. E tiaturi, e uiui, e e hinaaro noa te mau tamarii e ite i te ao apî o te matini roro uira. No reira, e tia i te mau metua ia haapao maitai i ta ratou mau tamarii e ia horoa i te hoê aratairaa e tu ra i te mau Papai no te faaohiparaa i te Internet, mai ta ratou e aratai ra ia ratou ia maiti i te upaupa ta ratou e faaroo aore ra te mau hohoˈa ta ratou e mataitai.—Kor. 1, 15:33.

¹⁷ Ma te peapea râ, ua tiavaruhia vetahi o to tatou mau taeae e e mau tuahine, no te mea ua amuimui atu ratou i te mau taata o teie nei ao ta ratou i farerei i roto i te mau pǔpǔ aparauraa i nia i te Internet e ua rave ihora ratou i te mau ohipa morare tia ore. Ua papai te tahi mau matahiapo, i maere roa, e ua faarue vetahi i ta ratou tane aore ra ta ratou vahine no te faahohonu atu â i te hoê taairaa i nia i te Internet. (Tim. 2, 3:6) Ua faarue vetahi i te parau mau no te mea ua tiaturi ratou i te mau manaˈo i horoahia e te mau apotata. (Tim. 1, 4:1, 2) Ia hiˈohia teie mau fifi atâta ino mau, e ere anei i te mea tano ia vai ara ia hinaaro tatou e apiti atu i roto i te mau rururaa i nia i te Internet? No nia i taua vahi ra, e paruru mau â te paari, te ite, te aravihi o te feruriraa e te ite maite i faahitihia i roto i te Maseli 2:10-19 ia tatou.

¹⁸ Ua itehia ua haamau te tahi mau taata i te mau afata poroi Web no te poro i te parau apî maitai. Ua aufauhia e rave rahi o taua mau afata poroi ra e te tahi mau taeae o te ore e ara ra. E nehenehe te tahi atu mau afata poroi e paturuhia e te mau apotata no te faahema i te feia haapao ore. (Ioane 2, 9-11) No nia i te faufaaraa e haamau i taua mau afata poroi Web ra, teie ta Te Taviniraa o te Basileia no Novema 1997 i te api 3 e parau ra: “Aita ïa e faufaa e ia rave tatou taitahi i te mau faanahoraa no te haapuroro na roto i te Internet i te tahi mau api no nia i te mau Ite no Iehova, ta tatou mau ohipa e ta tatou mau tiaturiraa. Na te afata poroi a te Taiete iho [http://www.watchtower.org] e horoa ra i te mau haamaramaramaraa papu e nehenehe e taiohia e te taata atoa e faaohipa i te Internet.”

¹⁹ Te mau papai tauturu no te haapii na nia i te Internet? Ua manaˈo vetahi e e tauturu ratou i te mau taeae ma te hapono i te mau maimiraa ta ratou i rave i roto i te mau ohipa teotaratia rau. Ei hiˈoraa, e niu paha te hoê taeae i te mau maimiraa i nia i te hoê tino parau o te oreroraa parau e e hapono atu ma te manaˈo e e faufaahia te feia e tia ia ratou ia faaineine i taua noa oreroraa parau ra. E hapono te tahi atu i te mau irava atoa o te hoê haapiiraa o Te Pare Tiairaa aore ra e pûpû i te tahi mau faahororaa no te Haapiiraa o te Taviniraa Teotaratia aore ra o te haapiiraa buka. E horoa vetahi atoa i te mau manaˈo no nia i te mau faaiteraa no te taviniraa. Mea faufaa anei te reira atoa?

²⁰ E faaitoito te mau papai ta te faanahonahoraa a Iehova e horoa ra i to tatou feruriraa maoti te mau manaˈo e patu ra e e haapii ia tatou ia ‘ite i te maitai e te ino.’ (Heb. 5:14) E nehenehe anei e parauhia e ua raeahia i te hoê Kerisetiano taua mau tapao ra ia maimi vetahi na ˈna?

²¹ Ua parauhia no nia i to Berea e “e maitai mau to ratou i to Tesalonia.” No te aha? No te mea “ua farii noa hoi ratou i te parau ma te aau mahora, e te imiraa i te parau i papaihia ra i te mau mahana atoa hoi i taua parau ra.” (Ohi. 17:11) Noa ˈtu e ua poro Paulo e o Sila ia ratou, aita ratou i nehenehe e haafaufaa i te parau ma te ore e rohi.

²² Ma te faaohipa faahou i te mau maimiraa a te tahi no te faaineine i te hoê oreroraa parau aore ra te hoê putuputuraa, e erehia tatou i te faufaaraa o te haapiiraa taitahi. Aita anei tatou e hinaaro ra e patu i to tatou faaroo i te Parau a te Atua? Ia niu-mau-hia to tatou iho tiaturiraa, e nehenehe tatou e faaite i to tatou faaroo i mua i te taata, na roto i te oreroraa parau, te mau pahonoraa i te mau putuputuraa e i roto i te taviniraa. (Roma 10:10) Ia faaohipa-faahou-hia te mau maimiraa a te tahi, aita ïa e tuea ra e te faataaraa i roto i te Maseli 2:4, 5, o te ani ra ia ‘imi hua i te ite o te Atua mai te taoˈa hunahia ra.’

²³ Ei hiˈoraa, ia imi tatou i te mau irava i roto i ta tatou iho Bibilia, e nehenehe tatou e hiˈo poto noa i te mau irava e haaati ra. E nehenehe tatou e ‘itea-papu-hia te mau parau atoa,’ mai ia Luka i to ˈna papairaa i ta ˈna Evanelia. (Luka 1:3) Hau atu â, e tauturu ta tatou tutavaraa ia ite ohie tatou i te mau irava ia poro tatou aore ra ia vauvau tatou i te mau tumu parau. Te parau ra e rave rahi taata e te maere ra ratou i te mau Ite no Iehova no te mea ua ite ratou i te faaohipa i te Bibilia. No tatou teie faataaraa ia matau tatou i te imi i te mau irava i roto i ta tatou iho Bibilia.

²⁴ E faaohipa anaˈe i to tatou taime ma te paari: Te tahi atu tuhaa te tia ia haapaohia, o te taime ïa e horoahia ra ia hamani i te mau haamaramaramaraa, ia taio e ia pahono i te mau parau e haapurorohia ra i nia i te Internet. Te faaitoito maira te Salamo 90:12 ia tatou ia pure na roto i teie mau parau: “E haapii mai ia matou i te taio i to matou pue mahana, ia riro to matou aau i te haapao maitai.” E ua faahiti o Paulo e: “Te poto nei te taime.” (Kor. 1, 7:29) Oia atoa: “E teie nei, te vai nei ta tatou ravea, e hamani maitai tatou i te taata atoa, ia rahi atu râ i to te fetii faaroo ra.”—Gal. 6:10.

²⁵ Te haamatara ra taua mau aˈoraa ra i te faufaaraa ia ara i te huru faaohiparaa i to tatou taime. Mea tano aˈe ia horoa i te taime no te taio i te Parau a te Atua. (Sal. 1:1, 2) E amuimuiraa maitai roa ˈˈe te reira. (Tim. 2, 3:16, 17) E te mau metua, te haapii ra anei outou i ta outou mau tamarii i te faufaaraa ia faaohipa ma te paari i to ratou taime no te mau ohipa i taaihia i te Basileia? (Koh. 12:1) Mea hoona aˈe te taime e horoahia ra no te haapiiraa Bibilia taitahi e te utuafare, no te haere i te mau putuputuraa e no te poro i te taime e horoahia ra no te teretere i nia i te Internet, ma te tiaturi e e noaa mai te mau haamaitairaa.

²⁶ I roto i taua tuhaa ra, te faaue ra te paari ia tatou ia haamau i to tatou ara-maite-raa i nia i te mau tumu parau pae varua e te mau mea e tu ra i to tatou oraraa Kerisetiano e o te riro ei mea faufaa. Oia hoi te maiti-maite-raa i te mau haamaramaramaraa te tia ia horoahia i to tatou taime e ia ferurihia. Ua haapoto te Mesia i te tia i te hoê Kerisetiano ia rave i to ˈna parauraa e: “E mata na râ outou i te imi i te basileia o te Atua, e te parau-tia na ˈna; e amui-atoa-hia mai taua mau mea ra ia outou.” (Mat. 6:33) Eita anei te taata tei î to ˈna oraraa i te mau ohipa i taaihia i te Basileia maoti i te tahi atu mau ohipa rau, e riro ei taata oaoa roa ˈˈe?

²⁷ Rata roro uira (e-mail): Mea maitai ia faaite atu i te tahi mau tupuraa aore ra mau manaˈo i te mau melo o to outou utuafare aore ra i te mau hoa e ora ra i te vahi atea, e faaiteraa o te here mau anei te opereraa i te reira i te tahi atu mau taata aita paha i matau i to outou utuafare aore ra i to outou mau hoa? Aore ra e tia anei ia tapaohia te reira i nia i te hoê api Web ia taio te mau huru taata atoa? E tia anei ia papaihia taua mau poroi ra e ia hapono-taa-ê-hia i te mau taata ta outou i matau aore ra aita? Oia atoa, ia faataehia ia outou te tahi mau poroi e ere na outou, e faaiteraa o te here anei te haponoraa i te reira i te tahi atu mau taata?

²⁸ E ahiri e e ere i te mea tano ta outou i hapono? Aita anei outou e haaparare ra i te hoê parau haavare? (Mas. 12:19; 21:28; 30:8; Kol. 3:9) Papu maitai e e, mai te peu e ‘e ara tatou i to tatou haerea: eiaha ïa mai ta te ite ore ra, mai ta te feia ite râ,’ e feruri maitai ïa tatou. (Eph. 5:15) Aita anei tatou e oaoa ra e rave rahi aamu mau to roto i te Annuaire, Te Pare Tiairaa, e te A ara mai na! o te faaitoito ra e o te turai ra ia tatou ia haere noâ na nia i te “eˈa”?—Isa. 30:20, 21.

²⁹ Te vai ra te tahi atu â fifi atâta. Ua faaite te aposetolo Paulo no nia i te tahi mau vahine ivi e: “Ua haamataro ratou i te ori haere noa i tera fare, i tera fare, e ere râ i te faatau anaˈe ra, e hopoi parau hoi ratou, e te hiˈopoa, e te parauraa hoi i te mau mea au ore ra.” (Tim. 1, 5:13) E mau parau teie e tapea ia ore e horoahia i te taime e te mau tutavaraa no te hapono i te mau haamaramaramaraa faufaa ore na to tatou mau taeae.

³⁰ Hau atu â, a feruri na i te taime te tia ia tuatapapa i te rahiraa nota roro uira e-mail. No nia i te reira, te taiohia ra i roto i te buka Le smog de données (Beretane): “Ia faaea te hoê taata i mua i ta ˈna roro uira ehia rahiraa taime, e riro oioi te rata roro uira ei faateimaharaa maoti i te hoê ohipa apî anaanatae o te rave i te taime, no te mea, i te mau mahana atoa, e tia ia taiohia e rave rahi poroi e ia pahonohia, no ǒ mai i te mau hoa rave ohipa, mau hoa, mau melo utuafare [...] oia atoa te mau pûpûraa no te hooraa aita i anihia.” Te na ô faahou ra te buka ra e: “Ua matau roa ino e rave rahi ‘arapoanui’ i te pae roro uira i te pahono i te mau parau rii hoata atoa e faataehia ia ratou (te mau parau hauti, mau aai feruri-noa-hia, mau anairaa rata roro uira, e te vai atu â) i te taata atoa to roto to ˈna iˈoa i ta ratou buka vahi nohoraa roro uira.”

³¹ E tuati mau taua faataaraa ra i te rata roro uira e teretere ra i rotopu i te mau taeae e rave rahi: e itehia te mau aamu ataata aore ra te mau tupuraa arearea no nia i te taviniraa, te mau pehepehe tei manaˈohia e ua niuhia i nia i ta tatou mau tiaturiraa, te mau faahohoˈaraa no roto mai i te mau oreroraa parau i faaroohia i te mau tairururaa aore ra i te Piha no te Basileia, te mau faatiaraa o te pororaa, e te vai atu â, oia hoi te mau mea e au ra e mea faufaa ore. E pahono noa te rahiraa i taua mau rata ra ma te ore e haapeapea nohea mai te reira, e mea fifi roa ïa ia taa na vai i papai i te reira i te omuaraa; no reira, e tia ˈtura ia uiui e e parau mau anei taua mau haamaramaramaraa ra.—Mas. 22:20, 21.

³² Aita roa ˈtu teie mau huru poroi e pinepine i te mea faufaa ore e tu ra i te mau parau faaora ta Paulo i manaˈo ia ˈna i papai ia Timoteo: “E tapea maitai i te hiroa parau mau ta oe i ite ia ˈu nei ra, ma te faaroo e te hinaaro i te Mesia ra ia Iesu.” (Tim. 2, 1:13) I roto i te “reo viivii ore,” te parau mau o te Bibilia, te vai ra “te hiroa parau mau” i niu-mau-hia i nia i te tumu parau o te Bibilia: te faatiaraa i te mana arii o Iehova maoti to ˈna Basileia. (Zeph. 3:9, MN) E tia ïa ia tatou, ia au i tei maraa ia tatou, ia horoa i te taime e te puai taatoa e vai ra ia tatou no te apiti atu i roto i te faatiaraa i te mana arii o Iehova.

³³ I te mea e te piri roa maira te hopea o teie nei faanahoraa o te mau mea, e tia ia tatou ia vai ara noa. Te faaara maira te Bibilia na roto i teie mau parau: “E haapao maitai, e faaitoito, te hahaere nei hoi to outou enemi o te Diabolo, mai te liona uuru ra, i te imiraa i te taata e pau ia ˈna ra.” (Pet. 1, 5:8) Te na ô atoa ra oia e: “A ahu na i te haana tamaˈi atoa a te Atua ra, ia tia ia outou ia patoi atu i te mau ravea paari a te Diabolo ra.”—Eph. 6:11.

³⁴ Ia ore e faaohipa-maitai-hia, e nehenehe te Internet e riro na Satani ei ravea no te faatere i te feia o te au nei i te reira. Noa ˈtu e e faufaaraa to te reira, mea atâta te Internet ia ore tatou e ara maitai. E tia iho â râ i te mau metua ia haapeapea i te faaohiparaa a ta ratou mau tamarii i te Internet.

³⁵ Ua riro te tapearaa i te hoê manaˈo faito noa no nia i te Internet ei paruru. Te haafaufaa nei tatou i te faahaamanaˈoraa tano maitai i papaihia e Paulo: “Te feia i rave i to teie nei ao [ia riro ïa ratou], mai te mea aore e rave; te mou nei hoi te huru o teie nei ao.” (Kor. 1, 7:29-31) Ia vai noa te reira i roto i to tatou feruriraa, e tapea taua mau manaˈo ra ia tatou, tatou e to tatou utuafare, ia ore e haapeapeahia e te mau mea atoa ta teie ao e pûpû ra, oia atoa i nia i te Internet.

³⁶ Mea faufaa ia piri noa tatou i to tatou mau taeae e mau tuahine i roto i te amuiraa e ia faaohipa tatou ma te paari i te taime e toe ra; e ineine ïa tatou i te faahaere i te mau faufaa o te Basileia i mua. E fatata teie faanahoraa i te hope: “eiaha roa” ïa tatou e haere “i ta te tahi pae Etene haerea, i te haapaoraa i te parau maamaa a to ratou aau,” teie râ ‘ia ite tatou i to [Iehova] ra hinaaro.’—Eph. 4:17; 5:17; MN.