Eaha te ravea rapaauraa maitai roa ˈˈe?

“E fanaˈo te hoê taata maˈi i tâpûhia ma te pâmu ore i te toto i te hoê rapaauraa maitai roa ˈˈe.” Te parau ïa a te taote Michael Rose, faatere i te hoê tuhaa faataotoraa. Eaha râ te mau faanahoraa e ravea monoraa i te pâmuraa toto e ô i roto i te ‘tâpûraa ma te pâmu ore i te toto’? Mea faufaa roa ia ite oe i te reira no te faaoti maite eaha te ravea rapaauraa e te tâpûraa e maiti. A mataitai i te video Pas de sang: la médecine relève le défi. I muri iho, a tamata i ta oe i maramarama maoti te mau uiraa i muri nei.—Nota: No te mea e hohoˈa tâpûraa poto to roto i te video, na te mau metua e faaoti e mataitai atu e ta ratou mau tamarii apî aore ra eita.

(1) Eaha te tumu matamua roa e patoi ai te mau Ite no Iehova i te pâmuraa toto? (2) No nia i te ravea rapaauraa, eaha ta te mau Ite no Iehova e hinaaro? (3) Eaha te tiaraa mau o te feia maˈi? (4) No te aha e mea tano e e mea paari ai ia maiti i te mau ravea monoraa i te pâmuraa toto? (5) Ia pau rahi te toto o te hoê taata, eaha na ohipa ru e piti ta te mau taote e rave na mua? (6) Eaha na manaˈo tumu e maha o te mau ravea monoraa i te pâmuraa toto? (7) E nafea te mau taote e nehenehe ai (a) e faaiti mai i te toto e pau, (b) e faaherehere i te toropuru ura, (c) e faaaraara i te hamaniraa i te toto, e (d) e rave faahou mai i te toto i tahe? (8) A faataa i te mau ravea rapaauraa mai (a) te faatarapaperaa toto e (b) te rave-faahou-raa mai i te toto i tahe. (9) Ia faaarahia oe i te aha no nia i te mau ravea monoraa atoa i te pâmuraa toto? (10) E nehenehe anei e rave i te mau tâpûraa atâta e te fifi roa ma te ore e pâmu i te toto? (11) Eaha te tupuraa maitai e itehia ra i rotopu i te mau taote?

Na te taata taitahi e faaoti e farii i te tahi mau ravea rapaauraa i patahia i roto i te video, ia au i to ˈna manaˈo haava haapiihia e te Bibilia. Ua feruri anei oe eaha te mau ravea monoraa i te pâmuraa toto ta oe i ineine i te farii no oe e no ta oe mau tamarii? E mea tia atoa ia faaara maitai i te mau melo o to oe utuafare e ere i te Ite no nia i ta oe mau faaotiraa e te mau tumu o te reira.—A hiˈo i te “Uiraa a te feia taio” i roto i te mau Pare Tiairaa o te 1 no Tiurai 2004 e te 15 no Atopa 2000.