Ua ineine anei oe i te faaruru i te hoê ati natura?
1. No te aha e haerea paari ai ia ineine no te mau ati?
1 I te mau matahiti atoa, e mirioni taata e ati aˈe te ao taatoa tae noa ˈtu e rave rahi o to tatou taeae e tuahine, o tei faaruru i te mau aueueraa fenua, tsunamis, ûa puai, mataˈi rorofai, puahiohio, e te vai pue. I te mea e e tupu taue te mau ati natura e e nehenehe e tairi ia tatou paatoa, e haerea paari ïa ia ineine oioi tatou.—Mas. 21:5.
2. No te aha e mea tia ˈi ia faaara tatou i te mau matahiapo i to tatou vahi faaearaa e ta tatou (mau) numera niuniu apî?
2 Eaha te nehenehe e rave-oioi-hia: I te tahi mau taime e nehenehe te feia mana toroa e faaara ia tae mai te mau ati. E mea faufaa ia haapao atu i tera mau faaararaa. (Mas. 22:3) I roto i taua mau tupuraa ra, e tamata te mau matahiapo i te niuniu i te taatoaraa i roto i te amuiraa no te tauturu ia ratou ia rave i te mau faaineineraa e hinaarohia. I muri aˈe i te hoê ati, e tutava atoa te mau matahiapo i te niuniu i te taatoaraa o tei taaihia i te amuiraa no te hiˈo e mea maitai anei ratou e no te taa i to ratou mau hinaaro. E taime faufaa te nehenehe e pau mai te peu e aita e tapura o te mau numera niuniu o te faaapîhia ta te mau matahiapo. No reira, e mea faufaa ia faaite te feia poro i te papai parau o te amuiraa e i ta ratou tiaau o te haapiiraa buka i to ratou vahi faaearaa e ta ratou (mau) numera niuniu apî.
3. E nafea tatou ia haa amui e te mau matahiapo mai te peu e te faaea ra tatou i te hoê vahi atâta?
3 Mai te peu e tei te hoê vahi atâta te amuiraa, e ani paha te mau matahiapo i te feia poro ia faaite i te iˈoa e te numera niuniu o te hoê melo o te utuafare aore ra o te hoê hoa o te ore e ora ra na tera vahi e e mea titauhia ia niuniu atu i roto i te hoê tupuraa ru. E nehenehe ïa te mau matahiapo e taa teihea tera mau taata i te faa-reva-raahia. E hinaaro atoa paha te mau matahiapo e feruri i te hoê faanahoraa ru na te amuiraa, oia hoi te hoê tapura iti o te mau mauhaa e hinaaro-oioi-hia ta ˈna e tapea noa ia ˈna ra, te mau faanahoraa no te faarevaraa, e e nafea te feia e hinaaro taa ê to ratou ia tauturuhia. E mea faufaa ia turu i tera mau faanahoraa î i te here.—Heb. 13:17.
4. Eaha te titauhia ia rave ia tupu te hoê ati i to tatou vahi?
4 I muri aˈe i te hoê ati: Eaha te titauhia ia rave oe mai te peu e e tupu te hoê ati i to oe vahi? Ia papu ia oe e ua haapaohia te mau hinaaro pae tino ru o to oe utuafare. Mai te peu e e nehenehe ta oe, a tauturu i te tahi atu o tei atihia. A tutava i te niuniu oioi i te tiaau o ta oe haapiiraa buka aore ra i te tahi atu matahiapo mai te peu e e nehenehe. E mea tia ia ravehia te reira noa ˈtu e e mea maitai oe e aita oe e hinaaro ra i te tauturu. Mai te peu e e hinaaro oe i te tauturu, ia papu ia oe e e rave to oe mau taeae i te mau tutavaraa atoa no te tauturu ia oe. (Kor. 1, 13:4, 7) A haamanaˈo e te ite maira Iehova i to oe tupuraa; a tiaturi ia ˈna no te turu ia oe. (Sal. 37:39; 62:8) A ite i te mau taime maitatai no te horoa i te turu pae varua e huru aau i te tahi atu. (Kor. 2, 1:3, 4) A rave oioi faahou i ta oe ohipa teotaratia matauhia mai te peu e e nehenehe.—Mat. 6:33.
5. E nafea te fifi o te mau ati e ohipa ˈi i nia ia tatou ei Kerisetiano?
5 Noa ˈtu e te faatupu ra te fifi o te ati i te ahoaho e rave rahi o te ao, e nehenehe tatou e hiˈo i te tau no a muri aˈe ma te tiaturi. Ua fatata roa te mau ati atoa i te riro ei ohipa tahito. (Apo. 21:4) A tiai noa ˈi tatou, e nehenehe tatou e rave i te mau taahiraa au no te faaineine no te mau taime fifi a tamau ai tatou i te faaite i te parau apî maitai ma te itoito.