Te haapiiraa e aratai i te ora
1 Auê te mauruuru ia ite i te mata o te taata ia anaana a ite ai ratou i te parau mau e vai ra i roto i te Parau a te Atua e! E mea anaanatae mau ia tufa na vetahi ê te ite no nia i te Atua e ta ˈna opuaraa no te huitaata. E nehenehe tera huru haapiiraa e aratai i te hoê taata i te ora mure ore.—Ioa. 17:3.
2 No te aha e mea teitei aˈe ai: I to tatou nei tau, e nehenehe e haapii na roto e rave rau ravea e i nia i te mau tumu parau atoa e nehenehe e ferurihia. (Koh. 12:12) E ere râ hoê â faufaaraa to tera huru ite ia faaauhia i “te peu taa ê a te Atua.” (Ohi. 2:11) Ua nehenehe anei te haapiiraa pûpûhia e te ao e aratai i te huitaata ia haafatata roa ˈtu â i te Atua Poiete e ia ite i ta ˈna opuaraa? Ua tauturu anei te reira i te taata ia maramarama eaha te tupu ia pohe tatou aore ra no te aha e rave rahi roa ˈi te mauiui? Ua horoa anei te reira na te taata te hoê tiaturiraa? Ua tauturu anei te reira ia haamaitai i te oraraa utuafare? Aita. Na roto noa i te haapiiraa e horoahia e te Atua e nehenehe ai tatou e ite i te mau pahonoraa tano i te mau uiraa faufaa roa ˈˈe o te oraraa.
3 Te pûpû ra ta te Atua haapiiraa i te mea e ere-roa-hia ra e to teie nei ao—te mau faufaa morare. E tatara roa te Parau a te Atua i te riri i te nunaa ê, te hereraa i to ˈna iho opu fetii, e te here aiˈa mai roto mai i te aau o te feia e farii e e faaohipa i ta ˈna mau haapiiraa. (Heb. 4:12) Ua turai te reira i te taata ia haapae i te mau huru haavîraa uˈana atoa e ia “faa-taata-apî” ia ratou iho. (Kol. 3:9-11; Mika 4:1-3) Hau atu â, ua horoa ta te Atua haapiiraa i te puai i te mau mirioni taata no te upootia i nia i te mau peu e te mau huru au-ore-hia e te Atua tei aˈa hohonu roa i roto ia ratou.—Kor. 1, 6:9-11.
4 No te aha e mea ru ai i teie nei: Te faaara nei to tatou Orometua Rahi ia tatou no nia i te auraa o te mau tupuraa o te mau tau ta tatou e ora nei. Te vai ra i roto i ta ˈna haavaraa parau tohu te mau haamaramaramaraa no to tatou nei tau, e e mea tia ia porohia na te ao atoa nei. (Apo. 14:6, 7) Te faatere nei te Mesia i nia i te raˈi, ua fatata roa te hau emepera o te haapaoraa hape na te ao atoa nei i te haamouhia, e ua ineine to te Atua Basileia i te haamou i te mau faatereraa atoa o te fenua. (Dan. 2:44; Apo. 11:15; 17:16) No reira, e mea ru ia farii te taata i teie nei â i te Arii faatere ta te Atua i haamau, ia haere ê mai i rapae ia Babulonia Rahi, e ia tau i te iˈoa o Iehova ma te faaroo. (Sal. 2:11, 12; Roma 10:13; Apo. 18:4) Ia tufa hope roa ïa tatou ma te faaite ia vetahi ê i te haapiiraa e aratai i te ora.