E faaite anaˈe i te anaanatae mau: ma te faaau atu ia tatou iho
1 Ua vaiiho mai te aposetolo Paulo i te hoê hiˈoraa maitai roa: e faaau noa na o ˈna i ta ˈna huru faaiteraa i te parau apî maitai i te taˈere o te feia e faaroo ra ia ˈna e i to ratou huru hiˈoraa i te mau mea. (Kor. 1, 9:19-23) E mea tia ia tutava tatou i te pee i to ˈna hiˈoraa. E nehenehe te hoê faaineineraa iti e tauturu pinepine ia tatou ia faatano i te mau hohoˈa faaiteraa e vai ra i roto i Ta tatou taviniraa i te Basileia i te hinaaro o te mau taata o ta tatou tuhaa fenua. A haafatata ˈtu ai tatou i te uputa, e nota mai paha tatou i te tahi mau tapao e mau tuhaa rii o te faaite mai i ta te fatu fare e anaanatae ra, e e haapao tatou i te reira i roto i ta tatou faaiteraa. Tera râ, e nehenehe tatou e faaau atu ia tatou iho na roto i te tahi atu â ravea i roto i te taviniraa.
2 E patu anaˈe i nia i ta te fatu fare mau parau: I te rahiraa o te taime, ia faaite tatou i te parau apî maitai, e tuu tatou i te hoê uiraa e e titau manihini tatou i te fatu fare ia faaite i to ˈna manaˈo. E nafea outou i muri aˈe? E farii noa anei outou i ta ˈna e parau mai, a parau atu ai i ta outou i faaineine? Aore ra e faaite anei ta outou mau parau e ua tâuˈa outou i ta te fatu fare i parau mai? Mai te peu e e faaite outou i te hoê anaanatae haavare ore i nia i ta te fatu fare i parau mai, e nehenehe paha ïa outou e faaohipa i te tahi atu mau uiraa ma te aravihi no te ite atu e eaha ta ˈna e manaˈo mau ra. (Mas. 20:5) E nehenehe ïa outou e haafaufaa i te mau tuhaa o te poroi o te Basileia e haaputapû roa ra i te taata e faaroo ra.
3 Ia raea tera fa, mea titauhia ia ineine tatou i te aparau i nia i te tahi mau manaˈo tumu taa ê atu i ta tatou i faaineine na mua ˈtu i te aparau. Ia haamata tatou ma te faahiti i te hoê fifi e vai ra i roto i te mau parau apî a haapeapea ai te fatu fare no te hoê fifi o te fenua iho aore ra no ˈna iho, i te mea e te hinaaro mau ra tatou e haamâha i to ˈna mau hiaai, e niu ïa tatou i te aparauraa bibilia i nia i te mau mea o ta ˈna e haapeapea roa ˈˈe.—Phil. 2:4.
4 E faatano anaˈe i ta tatou faaiteraa: Ia ui mai te fatu fare i te hoê uiraa, e faaoti paha tatou e mea maitai aˈe ia vaiiho i te aparauraa no te tahi atu taime, i muri aˈe i to tatou raveraa i te maimiraa no nia i tera tumu parau. E nehenehe atoa tatou e pûpû i te mau papai e faahohonu ra i tera tumu parau. E faaite pauroa te reira i to tatou anaanatae haavare ore e tauturu i to tatou taata-tupu ia ite ia Iehova.—Kor. 2, 2:17.