Te faaohipa ra anei outou i te mau api parau titau-manihini-raa?

I te hoê mahana, ua ite te hoê tamaroa 11 matahiti i te hoê api parau titau-manihini-raa i te hoê oreroraa parau no nia i te po auahi. “Ua puta roa to ˈu aau i tera tumu parau,” ta ˈna ïa i faataa i muri aˈe, “mea ohipa ino roa paˈi au e mea riaria roa na ˈu e haere i te po auahi ia pohe au.” Ua haere oia i tera oreroraa parau e, fatata hoê matahiti i muri aˈe, ua bapetizohia oia i muri aˈe tau haapiiraa bibilia. Mea na reira te haamataraa te toroa pae varua o Karl Klein, tei tavini i muri aˈe e rave rahi matahiti i te maoro ei melo o te Tino aratai a te mau Ite no Iehova. Ua haamata te reira maoti te hoê api parau titau-manihini-raa.

I teie â mahana, e mauhaa pororaa maitai te mau api parau titau-manihini-raa. E rave rahi taata poro tei ite e te hoê ravea maitai no te faaite o vai ratou e no te haamata i te aparauraa, o te horoaraa ïa i te hoê api parau titau-manihini-raa i te taata ta ratou e paraparau ra. E nehenehe te mau metua e faaô i ta ratou mau tamarii rii i roto i te taviniraa ma te parau ia ratou ia horoa i te hoê titau-manihini-raa i te taata ta ratou e farerei. E nehenehe te feia poro e poro ra na roto i te rata e tuu atoa i roto i te vehî i te hoê api parau titau-manihini-raa no te faataa i te mau putuputuraa. Parau mau, e ravea tano atoa te mau api parau no te titau manihini i te mau putuputuraa i te feia e haapii ra i te Bibilia aore ra e anaanatae ra i te parau mau.

E o outou, te faaohipa maitai ra anei outou i te mau api parau titau-manihini-raa i roto i ta outou taviniraa?