Ia moˈa outou i to outou haerea atoa
1. No te aha e mea faufaa ˈi ia moˈa tatou i to tatou haerea atoa?
1 Ei tavini a te Atua moˈa ra o Iehova, te tutava nei tatou i te moˈa i to tatou haerea atoa. (Pet. 1, 1:15, 16) Oia hoi, te tutava nei tatou i te faatura i ta ˈna mau ture aveia i roto i te mau tuhaa atoa o to tatou oraraa. E horoa te tairururaa mataeinaa o teie matahiti i te taime taa ê ia moˈa i to tatou haerea atoa.
2. E nafea tatou e faaite ai i te haerea maitai i te hotera?
2 I te hotera: Ua parau te hoê taata faatere hotera i reira te mau tia tairururaa i te nohoraa i te matahiti i mairi aˈenei e: “E mea au mau ia farii i te mau Ite no Iehova i ǒ nei. . . . O outou te mau huru hoani ta matou e hinaaro e farii.” E atuatu tatou i teie roo maitai ma te auraro i te mau haamanaˈoraa i muri nei: (1) Eiaha e tarahu i te piha hau aˈe i te hinaaro-mau-hia, e a faatura i te rahiraa taata faaotihia no te hoê piha. (2) Mai te peu e e mea titauhia ia faaore outou i ta outou tarahuraa, a faaara oioi i te hotera. (3) A rave i te hoê paepae turairaa taihaa ia ineine noa outou i te faaohipa i te reira. (4) Eiaha e tunu i te maa i roto i te mau piha mai te peu e aita e vahi tunuraa maa to roto. (5) Ia pûpûhia te taofe aore ra te tahi atu maa mea taotia-ore-hia te faito ia vai faito noa ïa outou. E maa teie e amuhia i te hotera e te mau hoani. (6) A faaite i te hotu a te varua i nia te mau rave ohipa, i te taime iho â râ o te tapaoraa i te taeraa mai e te revaraa, e pinepine e mea huehue.—Gal. 5:22, 23.
3. E nafea te haerea o te mau Ite apî e haamaere ai ia vetahi ê?
3 E nehenehe ta tatou mau peu maitatai e horoa i te hoê faaiteraa puai. I te matahiti i mairi aˈenei, ua ani te hoê Ite apî ma te peu maitai i te vahine farii o te hotera i te hoê penitara, e ua haamauruuru atura ia ˈna. Ma te maere, ua na ô oia e: “Mea papu e eita e ite-pinepine-faahou-hia te mau taurearea peu maitai mai tera.” I te tahi râ taime ua itehia te mau tamarii o ratou anaˈe i te haereraa i te vai auraa, i te hautiraa i roto i te piha utaraa, i te paraparau-puai-raa aore ra i te hororaa na te vahi haereraa taata. Eiaha te mau metua ia vaiiho i ta ratou mau tamarii ma te haapao ore. E mea tia ia ara ratou i te mau tamarii ia papu e e arue to ratou haerea ia Iehova.—Mas. 29:15.
4. E nafea tatou e haapao ai ia vetahi ê i te fare tamaaraa?
4 I te fare tamaaraa: Ua na ô te hoê tuati fare tamaaraa i pihai iho i te hoê tairururaa e: “E mea taa ê te mau Ite. Mea faatura ratou ia vetahi ê.” Te hoê haerea maitai, o te paraparauraa atoa ïa e te ataraa ma te au ia ore te mau hoani tapiri ia haama. Ia tamaa aore ra ia inu atoa tatou, e imi tatou i te ravea atoa no te faahanahana i te Atua.—Kor. 1, 10:31.
5. Eaha te titauhia no te faaite i te hoê haerea maitai i te vahi tairururaa?
5 I te tairururaa: E mea tia ia ite-taa-ê-hia to tatou haerea maitai i te vahi tairururaa. A ohipa amui e te taeae no te fariiraa, i te vairaa pereoo e i roto i te piha. (Heb. 13:17) E mea au aˈe ia parahi te mau tamarii e tae noa ˈtu te mau taurearea i pihai iho i to ratou mau metua ia vaiiho ia ratou ia parahi e te mau hoa. Eiaha e patia i te mau tauihaa faaharuharu i nia i te mau patiaraa uira aore ra i nia i te faanahoraa o te haapurororaa, e eiaha te faaohiparaa o te reira ia haapeapea i te feia i tae mai. Mai te peu e e hinaaro outou e pata i te hohoˈa i te tairururaa, a haamanaˈo e eita e fariihia te mori pura. E mea tia ia faatanohia te mau biper e te mau vini ia ore te taata e haapeapeahia. Ia tupu te hoê ati i te vahi tairururaa, eiaha e niuniu i te piha ru o te fare maˈi, a farerei i te taeae no te fariiraa aore ra i te mau utuuturaa matamua. I reira e ineine noa te hoê pǔpǔ utuuturaa.
6. E nafea to tatou haerea e faahanahana ˈi i te Atua i te tairururaa?
6 Na to tatou haerea e faataa ê ia tatou e e faahanahana i te Atua. (Pet. 1, 2:12) I te tairururaa mataeinaa, e itehia te mau ohipa a te mau Ite no Iehova e te taatoaraa. Ia faaoti papu tatou ia moˈa to tatou haerea atoa.
[Tumu parau tarenihia i te api 5]
Ia moˈa outou i to outou haerea
◼ A faatura i te mau faaueraa atoa o te hotera
◼ A ara i ta outou mau tamarii
◼ A haapao ia vetahi ê