Te hoê ahuraa roo maitai o te faaite i te viivii ore
1. A faaineine ai tatou no te tairururaa mataeinaa, no te aha e mea titauhia ˈi ia feruri tatou i to tatou ahuraa?
1 “Mea faahiahia roa ˈˈe te mau Ite no Iehova. Mea maitai outou, mea au te ahuraa, e mea faatura roa.” Ta te hoê fatu hotera ïa i parau no nia i te mau taeae e tuahine o tei apiti i te hoê tairururaa mataeinaa i te matahiti i mairi aˈenei. Ua parau te tahi atu rave ohipa o te hotera e: “Mea papu e te ahu ra outou no te Atua.” Tera te tupuraa: mea hiˈohia te mau tia tairururaa. No reira tatou e hinaaro ai e ahu ‘ia au i te evanelia,’ e pinepine mea na reira tatou e haapopouhia ˈi e e haapapu ai e e mau tavini a te Atua tatou. (Phil. 1:27) A faaineine ai tatou no te tairururaa mataeinaa, e mea tano ia feruri oioi tatou i to tatou ahuraa.
2. No te aha e mea fifi ai ia faaite i te viivii ore i roto i te ahuraa e te faito ahu?
2 “Te paari no nia maira, e mea [viivii ore] ïa,” ta te pǐpǐ Iakobo ïa i papai. (Iak. 3:17; MN) Mea fifi paha ia ahu ma te hoê huru e faaite ra i te viivii ore. E faito ahu tia ore, te faahinaaro e te huru ê to te ao morare ore a Satani, eita ïa e tano no te hoê Kerisetiano. (Ioa. 1, 2:15-17) No reira, hou tatou e maiti ai i te ahu, e mea tia ia pee tatou i te aˈoraa bibilia e ‘haapae i te paieti ore, e te hinaaro i teie nei ao, e e parahi ma te haapao maitai i teie nei ao.’ (Tito 2:12) E ara anaˈe ia ore to tatou huru rapaeau ia faahuru ê i te taata, to tatou anei mau taeae, te mau rave ohipa o te hotera, o te fare tamaaraa aore ra te tahi atu feia mataitai.—Kor. 1, 10:32, 33.
3. Eaha te mau uiraa e tauturu ai ia tatou ia hiˈopoa i to tatou huru rapaeau?
3 Te hoê ahuraa faaieie ore, e te au maitai: A faaineine ai tatou no te tairururaa, e ui anaˈe: ‘E mea faaieie ore anei to ˈu ahu aore ra te huti ra anei te reira i te ara-maite-raa i nia ia ˈu? Te faatura ra anei te reira i to vetahi ê huru aau? E ahu anei to ˈu e itehia ˈi te titi e te opu? Mea rairai anei aore ra mea piri i nia i te tino? Mea maitai anei to ˈu ahu e e mea hauˈa mâ? I te hotera, ia inu vau i te taofe aore ra ia faafaaea vau i muri aˈe i te mahana tairururaa, mai te tavini mâ anei au, aore ra e ahu haapaoraa ore anei to ˈu, e ahu huru ê, e ahu mahana, eita ïa e tano i te tareta e amohia ra e te hoê tia tairururaa? I te taime e faafaaea ˈi au, e taiâ anei au i te poro ma te faanaho-ore-hia no to ˈu ahu?’—Roma 15:2, 3; Tim. 1, 2:9.
4. E nafea te feia ta tatou i matau e nehenehe ai e tauturu ia tatou ia faaite i te viivii ore na roto i to tatou ahuraa?
4 E nehenehe te manaˈo o te mau Kerisetiano paari e tauturu ia tatou. E mea titauhia ia ui te mau vahine i ta ratou mau tane: Eaha te hohoˈa ta to ratou ahuraa e faaite ra? E nehenehe te mau metua paieti e tauturu i ta ratou mau tamarii taurearea i te reira pae. Hau atu â, e nehenehe te mau tuahine ruhiruhia o te mǎtaˈu ra i te Atua ‘e aˈo i te mau vahine apî ra [ia feruri ma te haapao maitai, ia viivii ore]’ to ratou huru rapaeau “ia ore ia faainohia te parau a te Atua.” (Tito 2:3-5; MN) Te horoa ra ta tatou mau papai i te mau hohoˈa no nia i te ahuraa faaieie ore, e te au maitai.
5. E nafea tatou taitahi e nehenehe ai e faahanahana ia Iehova i te tairururaa mataeinaa?
5 A faahanahana ia Iehova: Te pûpû nei te mau tairururaa mataeinaa ia tatou atoa, eiaha noa i te feia e apiti ra i te porotarama, i te taime faahiahia no te arue ia Iehova. Parau mau, e faahanahana to tatou haerea Kerisetiano e ta tatou mau parau ia ˈna. Tera râ, te ohipa matamua ta te rahiraa o te taata e hiˈo o to tatou ïa ahuraa. Ia faahanahana tatou paatoa ia Iehova ma te hoê ahuraa roo maitai o te faaite i te viivii ore!—Sal. 148:12, 13.
[Tumu parau tarenihia i te api 6]
Te tahi mau tauturu no te hoê ahuraa e haapopouhia
◼ Te Parau a te Atua
◼ Te hiˈopoaraa ia ˈna iho
◼ Te manaˈo o te feia paari
◼ Te mau papai Kerisetiano