A pee i te maitai o Iehova
1 Ia mataitai tatou i te hoê toparaa mahana haviti mau, aore ra ia tamata tatou i te hoê maa au maitai, eita anei tatou e hinaaro e haamauruuru ia Iehova, te Tumu o te mau maitai atoa? E turai to ˈna maitai ia tatou ia pee ia ˈna. (Sal. 119:66, 68; Eph. 5:1) E nafea e faatupu ai i taua huru o te maitai ra?
2 I te feia faaroo ore: Hoê ravea no te pee i te maitai o Iehova, o to tatou ïa haapaoraa ma te aau haavare ore i te feia e ere i to te fetii faaroo. (Gal. 6:10) E nehenehe te mau faaiteraa o te maitai e ohipa ma te oaoa i nia i te huru e hiˈo ai taua feia ra i te mau Ite no Iehova e tae roa ˈtu i te poroi ta tatou e faaite ra.
3 Ei hiˈoraa, i roto i te piha tiairaa o te hoê fare maˈi, te parahi ra hoê pionie taurearea i pihai iho i te hoê vahine ruhiruhia e hiˈoraa maˈi aˈe to ˈna i to vetahi atu feia maˈi. A tae mai ai to ˈna taime no te farerei i te taote, ua ani te taeae i teie vahine ia tomo na mua ia ˈna. I te hoê mahana, i te matete, ua farerei faahou atura oia ia ˈna. Ua oaoa roa oia i te ite-faahou-raa ia ˈna. Noa ˈtu e na mua ˈˈe aita oia i anaanatae i te parau apî maitai, ua parau oia e i teie nei, ua ite o ˈna e te here mau ra te mau Ite no Iehova i to ratou taata-tupu. Ua haamatahia te hoê haapiiraa bibilia tamau e o ˈna.
4 I to tatou mau taeae: E pee atoa tatou i te maitai o Iehova a pûpû ai tatou i te tauturu i to tatou mau hoa Kerisetiano. Ia tupu mai te hoê ati, tei roto tatou i te feia matamua o te haere atu e tauturu i to tatou mau taeae. E faatupu tatou i tauâ huru feruriraa ia turu tatou i te feia e hinaaro ra i te faurao no te haere i te mau putuputuraa, ia haere tatou e farerei i tei paruparu i te pae tino, e ia faaite tatou i to tatou here i te mau melo o te amuiraa o ta tatou i ore i matau maitai.—Kor. 2, 6:11-13; Heb. 13:16.
5 E faaite Iehova i te maitai ma te tahi atu â ravea, ma te “faaore mai i te hara nei.” (Sal. 86:5) Ia au i te hiˈoraa o te Atua, e faaite tatou e te hinaaro ra tatou i te maitai ma te faaore i te hara a vetahi ê. (Eph. 4:32) I te na reiraraa, e paturu tatou i te faariro i te amuimuiraa e to tatou mau hoa Kerisetiano ei mea “maitai e te popou.”—Sal. 133:1-3.
6 Ia turai ïa te maitai rahi o Iehova ia tatou ia “parau â” i te mau arueraa ia ˈna e ia “oaoa”! E ia nehenehe tatou e tutava i te pee i to ˈna maitai i roto i te mau mea atoa ta tatou e rave!—Sal. 145:7; Ier. 31:12, MN.