Te hoê ohipa o te tamahanahana
1 E tamahanahana te poroi o te Bibilia i te feia atoa e farii i te reira e e faaohipa atu i roto i to ratou oraraa. (Sal. 19:7, 8) E tauturu te reira ia ratou ia tiamâ mai i te mau haapiiraa hape e te mau peu atâta, e e pûpû atu i te hoê tiaturiraa papu no a muri aˈe. Teie râ, e ere o te feia anaˈe o te farii i te parau apî maitai o te fanaˈo taa ê. E tamahanahana-atoa-hia te feia e tufa i te pue parau mau bibilia na vetahi ê.—Mas. 11:25.
2 Itoitohia maoti te taviniraa: Ua parau Iesu e te feia e rave i te zugo o te Kerisetianoraa, oia hoi te pororaa e te faariroraa i te taata ei pǐpǐ, ‘e noaa te ora i to ratou [nephe].’ (Mat. 11:29; MN) Ua ite o ˈna iho nei i te itoito i roto i te pororaa. E au te reira i te maa ra na ˈna. (Ioa. 4:34) Ia ˈna i tono i na pǐpǐ e 70 e poro, ua oaoa ratou i te iteraa e ua turu Iehova ia ratou i roto i ta ratou mau tutavaraa.—Luka 10:17.
3 I teie mahana, e itoitohia e rave rahi Kerisetiano ia poro ratou. Ua parau te hoê tuahine e: “Mea tamahanahana te taviniraa no te mea e horoa mai te reira i te auraa e te tumu o to ˈu oraraa. E iti mai to ˈu iho mau fifi e te mau ahoaho o te mau mahana atoa ia haere au i roto i te taviniraa.” Ua parau te tahi atu vahine poro itoito e: “Maoti te taviniraa . . . e riro Iehova ei mea mau no ˈu i te mau mahana atoa e e ite au i te hau e te tahi oaoa i roto ia ˈu, o te ore hoi e noaa mai na roto i te tahi atu ravea.” Auê ïa tatou i te fanaˈo i te riroraa ei ‘hoa rave ohipa no te Atua’!—Kor. 1, 3:9.
4 Mea mǎrû te zugo a te Mesia: Noa ˈtu e te faaitoitohia ra te mau Kerisetiano ia “faaitoito hua,” eita Iesu e titau hau atu i tei maraa ia tatou. (Luka 13:24) Te titau manihini nei râ oia ia tatou ma te here ia ‘rave mai i ta ˈna zugo i nia ia tatou.’ (Mat. 11:29) Ia papu i te feia e ahoaho ra e te au ra te Atua i te taviniraa ta ratou e rave ra ma to ratou nephe atoa, noa ˈtu e e mea taotiahia.—Mar. 14:6-8; Kol. 3:23.
5 Auê i te tamahanahana ia tavini i te hoê Atua o te haafaufaa i te mau mea atoa ta tatou e rave no to ˈna ra iˈoa! (Heb. 6:10) Ia nehenehe noa tatou e horoa na ˈna i te mea maitai roa ˈˈe o tatou nei!