‘E anaana anaˈe mai te mau tiarama’
1 I rotopu i te pouri i te pae morare e i te pae varua o teie nei faanahoraa o te mau mea, e ono mirioni tiahapa feia haamori i te Atua mau ra o Iehova o ‘te anaana ra mai te mau tiarama’ i roto e 234 fenua e tuhaa fenua. (Phil. 2:15) No reira, e itehia tatou. E nafea tatou e faaanaana ˈi i te tiarama faufaa o te parau mau no ǒ mai ia Iehova ra?—Kor. 2, 3:18.
2 Ta tatou mau ohipa: E ite oioi noa te mau taata i to tatou haerea. (Pet. 1, 2:12) Ua ite te hoê vahine e mea maitai e mea tauturu te hoê hoa ohipa Ite no Iehova, e aita oia e parau ino ra e aita e au ra i te parau hauti faufau. Ia tamata te tahi atu i te faatihaehae ia ˈna ma te parau ino, e faaea hau noa oia e e tapea i te hoê â huru haerea. Eaha te faahopearaa o to ˈna huru i nia i tera vahine? “Ua maere roa vau i to ˈna haerea,” o ta ˈna ïa e parau ra, “e ua ui au ia ˈna i te uiraa no nia i te Bibilia. Ua haamata vau i te haapii i te Parau a te Atua, e i muri aˈe ua bapetizohia vau.” Te parau râ o ˈna e: “No to ˈna haerea i hinaaro ai au e ite hau atu â i te mau tiaturiraa a te mau Ite no Iehova.”
3 Na to tatou faatura i te feia mana, to tatou manaˈo i nia i te mau peu a teie nei ao e te afaro o ta tatou huru paraparau e faariro ia tatou te mau Ite no Iehova, ei nunaa taa ê, o te ora ra ia au i te mau ture aveia o tei hau ê o te Bibilia. E faahanahana taua mau ohipa maitatai ra ia Iehova e e faatae i te tahi atu mau taata i ta ˈna haamoriraa.
4 Ta tatou mau parau: Parau mau, eita paha te feia o te hiˈopoa ra i to tatou haerea maitai e taa no te aha tatou e mea taa ê ai mai te peu e eita tatou e paraparau ia ratou no nia i ta tatou mau tiaturiraa. Ua ite anei to outou mau hoa ohipa aore ra to outou mau hoa haapiiraa e e Ite no Iehova outou? Te imi ra anei outou, na roto i te hoê aparauraa matauhia i te taime no te horoa i te faaiteraa? Ua faaoti maite anei outou e ‘ia anaana to outou maramarama i mua i te aro o te taata nei’ i te mau taime atoa outou e nehenehe ai?—Mat. 5:14-16.
5 No te rave i ta tatou hopoia ei feia taˈitaˈi i te maramarama, e mea titauhia ia faahotu tatou i te feruriraa haapae. Mai te peu e e horoa tatou ia tatou iho ma to tatou nephe atoa, eita tatou e taiâ i te tuu i te mau ohipa e ere i te mea faufaa roa i te hiti, no te faaitoito i roto i te ohipa faaoraraa o te pororaa e o te faariroraa i te taata ei pǐpǐ.—Kor. 2, 12:15.
6 Na roto i ta tatou mau ohipa e ta tatou mau parau, e tamau tatou i te anaana mai te mau tiarama. Ia na reira tatou, e hinaaro ïa vetahi ê i te apiti mai ia tatou no te faahanahana ia Iehova.