“O te tia ia ˈna ia farii i teie nei parau, a farii oia”
1 I te hoê mahana a paraparau ai oia i ta ˈna mau pǐpǐ no nia i te faaipoiporaa, ua faataa o Iesu i te faaea-taa-noa-raa mai te “ô,” hou a na ô ai e: “O te tia ia ˈna ia farii i teie nei parau, a farii oia.” (Mat. 19:10-12; MN) Tau matahiti i muri aˈe, ua faataa te aposetolo Paulo i te mau haamaitairaa o te faaea-taa-noa-raa e ua faaitoito i te tahi atu mau Kerisetiano ia pee i to ˈna hiˈoraa ma te faaea taa noa. (Kor. 1, 7:7, 38) I to tatou nei tau, ua “farii” te taeae e te tuahine e rave rahi i te faaea taa noa e te ite ra ratou i te maitai o te reira. Teie râ, eaha te mau haamaitairaa?
2 E tavini “ma te peapea ore”: Ua ite maite o Paulo e e pûpû te faaea-taa-noa-raa i te ravea e tavini ai ia Iehova “ma te peapea ore.” I teie mahana, e nehenehe te hoê taeae taa noa e faaî i ta ˈna parau aniraa no te apiti i te Haapiiraa faaineineraa no te taviniraa; e pinepine e mea ohie aˈe no te hoê taata taa noa ia rave i te taviniraa pionie, ia haapii i te hoê reo ê, ia haere i reira e hinaarohia ˈi te feia poro, ia tavini i te Betela, aore ra ia vata no te tahi atu taviniraa taa ê. E taime atu â to ˈna no ta ˈna iho haapiiraa hohonu e no te feruriruriraa i te mau Papai, e no te aparauraa piri e o Iehova na roto i te pure. E pinepine e taime atu â to te taata taa noa no te tauturu i te tahi atu. No ‘to ˈna iho maitai’ tera mau ohipa atoa.—Kor. 1, 7:32-35; Ohi. 20:35.
3 E horoa mai te taviniraa i te Atua ma te peapea ore i te haamaitairaa e rave rahi. I muri aˈe e 27 matahiti i Kenya, ua papai te hoê tuahine taa noa e: “E rave rahi roa to ˈu hoa e e rave rahi ohipa. E mea rahi te ohipa ta matou i rave amui e e farerei noa na matou. . . . Ua tauturu te tiamâraa e te ravea e hahaere ia ˈu ia ohipa noa i roto i te taviniraa, na te reira i faaoaoa rahi ia ˈu.” Te na ô faahou ra oia e: “I te roaraa o te mau matahiti, ua piri atu â to ˈu mau taairaa e o Iehova.”
4 Te faaohipa-maitai-raa i te faaea-taa-noa-raa: Ua parau o Iesu e e faahotu i te ô o te faaea-taa-noa-raa “no te basileia o te ao ra.” (Mat. 19:12) Mai te tahi atu mau ô, ia noaa te oaoa e te mau haamaitairaa, e mea tia ia faaohipa-maitai-hia te faaea-taa-noa-raa. Na roto i te faaohiparaa i te mau ravea atoa ta tera huru tupuraa e horoa mai e na roto i te aniraa ia Iehova i te paari e te puai, ua taa i te mau taata taa noa e rave rahi e mea faufaa mau â ia farii i te reira.