E feruriraa haapao maitai to outou a fatata mai ai te hopea
1 Te faaite pinepine ra te Parau a te Atua e e tae mai te mahana o Iehova “mai te eiâ,” oia hoi ma te taue, te oioi, te omoe. (Tes. 1, 5:2; Mat. 24:43; Pet. 2, 3:10; Apo. 3:3; 16:15) “E teie nei,” ta Iesu ïa i parau, “ia parahi ineine noa outou; ei te hora manaˈo-ore-hia e outou na e tae mai ai te Tamaiti a te taata nei.” (Mat. 24:44) E nafea ia vai ara noa i te pae varua a fatata mai ai te hopea? To roto hoê ravea i teie aˈoraa faauruahia: “E [feruriraa] haapao maitai [to] outou.”—Pet. 1, 4:7; MN.
2 Te auraa o te hoê feruriraa haapao maitai, o te hiˈoraa ïa i te mau mea ia au i ta Iehova hiˈoraa. (Eph. 5:17) E mea ohie ïa no tatou ia hiˈo ia tatou ei “taata ěê e te purutia” i roto i teie faanahoraa. (Pet. 1, 2:11) E nehenehe ïa tatou e haroaroa i te mea faufaa mau, e haamau i te mau fa matamua roa e e rave i te mau faaotiraa maitatai.—Phil. 1:10.
3 A haamau i te mau fa pae varua: Ia haapao maitai te feruriraa, mea titauhia ia haamau i te mau fa pae varua e ia raea te reira. Te tapi ra anei outou i teie nei i te tahi o tera mau fa? Te tutava ra anei outou i te taio i te Bibilia i te mau mahana atoa, i te haere i te mau putuputuraa Kerisetiano atoa, i te taio i te numera taitahi o Te Pare Tiairaa e te Réveillez-vous! aore ra i te rave atu â i te taviniraa? Mai te peu e e haamau outou i te tahi mau fa e tano i to outou huru tupuraa, e e tamau i te tapi atu e e ani ia Iehova ia haamaitai i ta outou mau tutavaraa, mea papu e e maere outou i te mau faahopearaa.
4 Ua ui te hoê matahiapo i te tahi na taata faaipoipo apî no nia i ta raua mau fa pae varua. Ua haaferuri taua uiraa ra ia raua, mai te peu e e faahaehaa raua i to raua oraraa e e faahoˈi i ta raua mau tarahu rahi, e tia ïa ia raua ia riro ei pionie. Ua faaoti atura raua e faariro i te reira ei fa na raua. Ua faahoˈi maite raua i ta raua mau tarahu e ua imi i te faaiti mai i te tahi mau ohipa hau o te rave rahi ra i to raua taime e to raua ito. Hoê noa matahiti i muri aˈe, ua raea ta raua fa. Eaha te faahopearaa? Te na ô ra te tane e: “Ahiri aita mâua i haamau i te tahi mau fa, eita ïa mâua e ite i ta mâua e fanaˈo nei i teie mahana. Mea oaoa aˈe mâua. Mea maitai aˈe e mea hau aˈe to mâua oraraa, e auraa e e tumu hoi to te reira.”
5 A tiai noa ˈi i te mahana o Iehova, e vai ara noa anaˈe i te pae varua ma te feruriraa haapao maitai e ma te rave na mua i te hinaaro o te Atua.—Tito 2:11-13.