E haamau anaˈe i te tahi mau fa pae varua
1 Auê ïa fanaˈoraa taa ê te arueraa ia Iehova a tau a hiti noa ˈtu! Ia manuïa te reira, e nehenehe ta tatou i teie iho nei e haamau i te tahi mau fa pae varua e e haa ia naeahia te reira. E tauturu te reira ia tatou ia faaohipa i to tatou puai ma te paari. (Kor. 1, 9:26) Eaha te mau fa e au ia outou ia haamau?
2 Te haapiiraa i te Bibilia: Te faaineine ra anei outou ia outou no te mau putuputuraa atoa a te amuiraa? Mai te peu e e, te rave ra anei outou i te taime no te mau maimiraa e te feruriruriraa? Ei hiˈoraa, ia faaineine outou i te haapiiraa tahebedoma o Te Pare Tiairaa e te haapiiraa buka, e reni noa anei outou i te mau pahonoraa, aore ra e rave anei outou i te taime no te taio i te mau irava i horoahia ˈtu e no te hiˈopoa i te mau faataaraa? No te aha e ore ai e haamau ei fa e faahohonu, i te mau hebedoma atoa, i te tahi mau manaˈo o te tuhaa o te taioraa i te Bibilia no te Haapiiraa o te taviniraa teotaratia? E titauhia te taime e te mau tutavaraa no te paheru i te Parau a te Atua, e mau haamaitairaa rahi râ te noaa mai.—Mas. 2:4, 5.
3 Te mau putuputuraa a te amuiraa: Te tae-tamau-raa mai i na putuputuraa e pae: tera te tahi fa ê atu e haamau. Ia tae oioi mai tatou no te amuimui e to tatou mau hoa Kerisetiano e ia apiti i te himene omuaraa e i te pure, te turu ra tatou i te huru maitai o te amuiraa. E tutava anaˈe, i te mau putuputuraa atoa, i te horoa i te tahi mau pahonoraa e i te haamaitai atu. E nehenehe paha ta outou e faataa e nafea te hoê irava i faahitihia i roto i te paratarafa e haamahitihiti ai i te mau manaˈo i vauvauhia, aore ra e faaite i te faufaaraa mau o te mau manaˈo no te oraraa o te mau mahana atoa.—Heb. 10:24, 25.
4 Te pororaa: E maitai mau â ta tatou ohipa ia haamau tatou i te tahi mau fa. Ua haamau anei outou iho ei fa e horoa i te hoê rahiraa hora i roto i te taviniraa i te mau avaˈe atoa? Te ite ra vetahi e mea faufaa te reira. Aore ra, e nehenehe anei ta outou e haamaitai ia outou i roto i te hoê tuhaa taa ê, ei hiˈoraa, ma te faaohipa i te Bibilia i tera fare i tera fare, ma te rave i te mau farerei-faahou-raa o te manuïa, ma te tutava i te haamata i te hoê haapiiraa bibilia, aore ra ma te haapii ma te aravihi atu â i roto i te mau haapiiraa bibilia?
5 E te mau metua, te faaitoito ra anei outou i ta outou mau tamarii ia haamau i te tahi mau fa i roto i te taviniraa a Iehova? A tauturu atu ia taa ia ratou e e ravea maitai roa te haaraa i roto i te taviniraa pionie, mitionare aore ra ei melo o te utuafare o te Betela no te faaite i te hohonuraa o to ratou mauruuru ia Iehova.—Koh. 12:1.
6 E hiˈopoa anaˈe i ta tatou mau ohipa, e haamau anaˈe i te tahi mau fa pae varua e e haa anaˈe ia naeahia te reira; e oaoa ˈtu â ïa tatou i ta tatou taviniraa e e riro tatou ei tamahanahanaraa no vetahi ê.—Roma 1:12.