Tairururaa haaati: te porotarama apî
1 Ia aueue ore noa to tatou faaroo i roto i te hoê ao papu ore, e tia ia tatou ia tiaturi ia Iehova. Eaha mau na te auraa? E nafea te tiaturiraa ia Iehova e ohipa ˈi i nia i to tatou oraraa e to to tatou utuafare? E nafea te reira e tauturu ai ia tatou ia patoi atu i te mana o te ao a Satani? E haamataratara te tairururaa haaati o te matahiti taviniraa 2003 i taua mau uiraa ra. Teie te manaˈo tumu: “E tiaturi anaˈe ia Iehova, a rave ai i te parau maitai.”—Sal. 37:3.
2 Aita to tatou tiaturiraa ia Iehova i taotiahia i nia i te mau huru tupuraa taa ê aore ra i te mau taime fifi. E ohipa te reira i nia i to tatou oraraa i te mau mahana atoa. Tera ta te oreroraa parau omuaraa “E tiaturi anaˈe ia Iehova eiaha e faaea” e haamataratara mai. (Sal. 62:8) E faaite mai te oreroraa parau e maha tuhaa “E faaite anaˈe i te tiaturiraa ia Iehova” e nafea ia imi e ia faaohipa i te mau haapiiraa o te Bibilia o te tauturu ia oaoa i roto i te faaipoiporaa e ia faaruru i te mau fifi utuafare e ia haapao i to tatou mau hinaaro.
3 Te haa puai ra te ao a Satani i te tuino i ta tatou hiˈoraa i te mea maitai e te mea ino e te mau mea faufaa roa ˈˈe. (Isa. 5:20) E haapuai te mau oreroraa parau “Eiaha tatou ia tapi i te mau mea faufaa ore o te oraraa nei” e “E faarue anaˈe i te mea ino, e rave anaˈe i te mea maitai” i ta tatou faaotiraa e faatura i te mau faaueraa tumu teitei a Iehova.—Amo. 5:14.
4 E tia i te feia e tavini ra ia Iehova ia tiaturi roa ia ˈna ia haamou oia i te faanahoraa nei o te mau mea. Tera ta te oreroraa parau no te taatoaraa “Ua fatata mai te hopea o te ahoaho o te ao atoa nei” e haamataratara mai. Apitihia mai i muri aˈe e te tumu parau “E faarirohia anei outou ei taata e au ia outou te Basileia o te Atua?” o te titau ia tatou ia hiˈopoa ia tatou iho. E hope te porotarama na roto i teie faaueraa: “E tiaturi anaˈe i te mau parau fafau a Iehova.”
5 E taime puai te oreroraa parau no te bapetizoraa i roto i te mau tairururaa. E faaite oioi atu te feia e hinaaro ra ia bapetizohia ratou i te tiaau peretiteni ia ravehia te mau faanahoraa.
6 I to tatou nei tau papu ore, o Iehova anaˈe ta tatou e tiaturi e ei ia ˈna ra e itea mai ai te aueue ore. (Sal. 118:8, 9) E haapaari paatoa anaˈe i to tatou tiaturiraa ia ˈna ma te ore e mairi i te hoê noa ˈˈe tuhaa o ta tatou tairururaa haaati!