Tairururaa haaati: te porotarama apî
Ua ite tatou e e au i te Atua ra o Iehova to tatou here e to tatou taairaa ia ˈna anaˈe. Te imi nei râ te ao i te haafifi ia tatou eiaha tatou ia tapea i te taairaa piri e oia. (Ioa. 17:14) No te haapuai i to tatou here ia Iehova e ta tatou faaoti-papu-raa e patoi i te mau mea i roto i teie nei ao o te haafifi i to tatou huru pae varua, teie te tumu parau o te porotarama o te tairururaa haaati no te matahiti taviniraa 2001: “A here i te Atua—Eiaha e hinaaro i te mau mea o teie nei ao.”—Ioa. 1, 2:15-17.
E turai to tatou here hohonu ia Iehova ia tatou ia riro ei ite no ˈna. Teie râ, no te mau tavini a te Atua e rave rahi, e ere te pororaa i te mea ohie. Ia faaroo outou i te oreroraa parau “E faaitoito te here i te Atua ia tatou i roto i ta tatou taviniraa,” e ite outou nafea to te tahi pae faarururaa i to ratou mamahu e te tahi atu â mau fifi no te rave maite i teie ohipa.
Nafea te toparaa o te mau maitai morare o teie nei ao e ohipa ˈi i nia ia tatou? I teie nei, e peu matau noa te mau ohipa tei ore i fariihia i mutaa ihora. E haapuai te oreroraa parau “E riri te feia e here ia Iehova i te ino” e te tahi atu e vauvau-tatuhaa-hia “Te mau mea i roto i teie nei ao—Eaha to tatou manaˈo i te reira?” i ta tatou faaoti-papu-raa e patoi i te mau hinaaro iino.
E faaterehia e piti hiroa putuputuraa: te Haapiiraa o te Taviniraa Teotaratia e te Putuputuraa no te Taviniraa, e e vauvauhia te hoê haapotoraa o te haapiiraa o Te Pare Tiairaa no taua hebedoma ra. E titau te oreroraa no te taatoaraa, “Nafea teie nei ao e vî ai maoti te here e te faaroo,” ia tatou ia pee ia Iesu na roto i te patoiraa i te mana ino o teie nei ao. (Ioa. 16:33) Eiaha e haamoe i te titau manihini mai i te feia e haapii ra i te Bibilia e o tatou. Te taata atoa e hinaaro ia bapetizohia oia, ia paraparau oioi roa ˈtu ïa oia i te tiaau peretiteni, ia ravehia te mau faanahoraa e titauhia.
E tauturu mai teie tairururaa haaati ia haamau tatou i to tatou feruriraa i nia i te mau mea iho e tia ia tatou ia poihere no te fanaˈo i te mau haamaitairaa e rave rahi a Iehova. Ia tae mai tatou mai te omuaraa e tae atu i te hopea!