Te mau oaoa o te taviniraa taime taatoa
1 O outou te feia apî, papu roa e te feruri ra outou i to outou oraraa no a muri aˈe. Te parau maira te Maseli 21:5 (MN) e “e noaa te maitai i te mau opuaraa a te taata itoito.” Mea maitai ïa ia feruri maite outou i ta outou mau fa. A rave ai outou i te tahi mau opuaraa, a feruri i te taviniraa taime taatoa. No te aha?
2 A ani i te manaˈo o te tahi mau taata paari o tei tavini ei pionie i to ratou apîraa ra, e e parau mai iho â ratou e: “O te mau matahiti maitai roa ˈˈe ïa o to ˈu oraraa!” Teie ta te hoê taeae, o tei ite i te oaoa i roto i te taviniraa taime taatoa i to ˈna apîraa, i parau: “Ia feruri tatou i to tatou apîraa, e ite tatou i te mauruuru iti rahi no te mea ua pee tatou i teie aˈoraa paari: ‘E tena na, e haamanaˈo i tei Hamani ia oe i to apîraa ra.’” (Koh. 12:1) E te mau taurearea tamaroa e te mau taurearea tamahine, ia hinaaro outou e haere na te hoê eˈa e ite atu ai outou i tera oaoa, mea maitai ïa ia faanaho maite outou i te reira, i teie nei, e to outou mau metua.
3 E te mau metua, a faaitoito ia ratou ia tavini ma te taime taatoa: Mai te hoê Metua hamani maitai, te faaite maitai maira Iehova eaha te eˈa e rave. (Isa. 30:21) Na roto i te aratairaa ia tatou ma te here, te horoa ra oia i te hiˈoraa maitai na te mau metua Kerisetiano. Eiaha e vaiiho e na ta outou mau tamarii e maiti eaha te mea maitai aˈe no ratou, a faaineine maori râ ia ratou ma te paari ia haere na te eˈa e haamaitai atu ai Iehova ia ratou. Ia paari mai ratou, e tauturu ta outou faaineineraa ia ratou ia ‘ite to ratou aau i te maitai e te ino.’ (Heb. 5:14) Ua ite te feia paari, na roto i ta ratou i farerei, e eita ratou e nehenehe e tiaturi i to ratou iho manaˈo; e tia ia ratou ia turui i nia ia Iehova no te faatitiaifaro i to ratou mau haerea. (Mas. 3:5, 6) Mea faufaa roa ˈtu â ïa te reira no te feia apî, aita hoi ratou i ite i te oraraa.
4 E te mau metua, a tauaparau ma te huna ore e ta outou mau tamarii apî aore ra e fatata i te riro mai ei taurearea, no nia i ta ratou mau fa. E tamata hoi te feia aˈo i te fare haapiiraa, te mau orometua haapii e te mau hoa haapiiraa i te turai ia ratou ia tapi i te mau fa materia a teie nei ao. A tauturu i ta outou mau tamarii ia maiti i te mau haapiiraa o te horoa mai i te tahi faaineineraa e au ia faaohipahia, ia nehenehe ratou e haapao i to ratou mau hinaaro ma te ore e haapae i te mau faufaa a te Basileia. (Tim. 1, 6:6-11) I roto e rave rahi tupuraa, e navai noa te hoê haapiiraa tuarua ma te tahi faaineineraa toroa ia noaa mai te tahi imiraa e ia rave i te taviniraa pionie tamau.
5 A faaitoito i te mau Kerisetiano apî ia faahotu i te ô e faaea taa noa. Ia opua ratou e faaipoipo a muri aˈe, ua ineine maitai aˈe ïa ratou i te amo i te mau hopoia teimaha o te faaipoiporaa. (A hiˈo i te tumu parau hau o Ta tatou taviniraa i te Basileia no Tiunu 2001, “E riro anei outou ei rima tauturu?” paratarafa 19.) Ma te faahiti i te mau manaˈo maitatai no nia i te taviniraa pionie, te taviniraa i te vahi e hinaaro-rahi-hia ˈi te tauturu, te taviniraa i te Betela, aore ra te ohipa mitionare, a faahotu oioi roa i roto i te feia apî i te hinaaro e ora i te hoê oraraa o te faaoaoa ia Iehova, no to vetahi ê maitai, e o te faaoaoa ia ratou.
6 E te feia apî, a tuu i te taviniraa taime taatoa i te parahiraa matamua: Aita e faufaa ia uiui outou mai te aha te huru te oraraa o te hoê pionie. E nehenehe outou e tamata i te rave i te taviniraa pionie tauturu no te hoê taime ia nehenehe outou i te roaraa o ta outou tau haapiiraa e ta outou tau faaearaa haapiiraa. E ite ïa outou e mea au mau â tera taviniraa. E nehenehe anei outou e rave i te taviniraa pionie tauturu mai teie atu nei e i te hopea o te avaˈe Atete?
7 O outou te mau taeae apî, a feruri maite i te faaineine ia outou no te riro ei tavini tauturu. (Tim. 1, 3:8-10, 12) Hau atu â, a ui ia outou iho e eita anei outou e nehenehe e faaî i te hoê aniraa no te tavini i te Betela aore ra no te Haapiiraa faaineineraa no te taviniraa, ia naeahia to outou matahiti. Maoti te taviniraa pionie, e haapii mai outou i te tahi mau mea faufaa, ei hiˈoraa, nafea ia ora ma te faatura i te hoê tapura ohipa, nafea ia faanaho maitai aˈe ia outou, nafea ia afaro e vetahi ê e nafea ia haapii i te amo i te hopoia. E faaineine teie mau mea atoa ia outou ia amo i te mau hopoia rahi atu â i roto i te taviniraa a muri aˈe.
8 Hoê o te mau ravea e manuïa ˈi outou i roto i te taviniraa taime taatoa, o te raveraa ïa i te mau ohipa teotaratia ma te itoito rahi. Ua faaitoito te aposetolo Paulo i tera huru feruriraa e ua faaite oia eaha te mau haamaitairaa: ‘E ta outou mau mea atoa e rave ra, e rave ma te aau atoa mai te mea ra e e na te Fatu, ua itea hoi e e noaa mai ta outou ra utua no ǒ mai i te Fatu ra.’ (Kol. 3:23, 24) Ia haamaitai mai Iehova ia outou e ia horoa mai oia i te mau oaoa e rave rahi i roto i te taviniraa taime taatoa!