“E hamani maitai tatou i te taata atoa”
1 “A faaite hua i te parau a te Atua” e “Ia taoˈahia outou i te mau ohipa maitatai,” tera te mau tumu parau e vai ra i roto i te mau api hau o Ta tatou taviniraa i te Basileia no Fepuare e no Mati 2002. (Kol. 1:25; Tim. 1, 6:18) Ua faaitoito mai tera nau tumu parau ia tutava ˈtu â tatou i te tauturu i te feia aau farii ia haere mai i te Oroa haamanaˈoraa, te feia aita e poro faahou ra ia apiti faahou mai i te amuiraa, e te mau tamarii e te mau taata e haapii ra i te Bibilia e faaî ra i te mau titauraa ia haamata i te poro i te parau apî maitai. Aita e feaaraa e ua manuïa aˈena ta tatou mau tutavaraa itoito rahi. I teie nei e ‘te vai nei ta tatou ravea, e tamau ïa tatou i te hamani maitai i te taata atoa.’—Gal. 6:10.
2 E titau manihini tatou ia ratou ia haere faahou mai: I roto i te tuhaa fenua a te amaa no Tahiti, i nia i te numera taatoa o te feia e tae mai i te Oroa haamanaˈoraa i te mau matahiti atoa, e hau atu i te 3 000 e ere i te feia poro i te parau apî maitai. I te mea e te faaite maira to ratou taeraa mai i te tahi anaanatae i te parau mau, eaha ïa te tia ia tatou ia rave no te faaitoito i te feia “[aau farii e tano] no te ora mure ore” ia riro mai ei feia “faaroo”? (Ohi. 13:48; MN) E faaitoito ïa tatou ia ratou ia haere vave mai i te mau putuputuraa a te amuiraa i te neheneheraa iho â.
3 No te aha e ore ai e titau manihini i te hoê taata e anaanatae ra i te Haapiiraa buka ia fanaˈo oia i te hiˈopoaraa au roa o te parau tohu a Isaia? Mai te peu e ua matau outou i tera taata aore ra e fetii outou, e nehenehe outou e titau manihini ia ˈna ia haere mai e faaroo ia outou mai te peu e e tumu parau ta outou i te Haapiiraa o te taviniraa teotaratia i mua nei. A faaite ia ˈna eaha te mau upoo parau o te mau oreroraa parau no te taatoaraa o te hohorahia i te mau hebedoma i mua nei. (Ia tuuhia te hoê porotarama tia i nia i te tapura piaraa.) A imi i te taime maitai no te faaara i te hinaaro e haamori ia Iehova i roto i tera taata. E parau mau, mai te peu e aitâ oia e haapii ra i te Bibilia e te hoê melo o te amuiraa, a pûpû atu i ta outou tauturu ma te mahanahana.
4 E faaitoito noa tatou i te feia aita e poro faahou ra: I rotopu i te feia e tae mai i te Oroa haamanaˈoraa, ua pûpû aˈena te tahi pae i to ratou oraraa na Iehova. I te hoê râ taime, ua faaea ratou i te poro i te parau apî maitai. Te aˈo maira râ te aposetolo Paulo e ia ‘hamani maitai tatou i to te fetii faaroo iho â râ.’ (Gal. 6:10) No reira, o te feia aita e poro faahou ra ta tatou e haapao na mua.
5 Peneiaˈe, ua farii aˈena te tahi pae i te faaitoitoraa a te mau matahiapo e a te tahi atu feia poro e haere faahou i roto i te taviniraa. Mai te peu e ua ani mai te mau matahiapo ia outou ia poro e te hoê melo e poro faahou ra, ia papu ïa ia outou e na to outou here ia Iehova e to outou hinaaro i te pororaa e patu i te tiaturi i roto ia ˈna. A faaite ia ˈna nafea outou e rave ai i te mau tuhaa rau o te taviniraa, ia ite oia i te oaoa, ia tamau maite oia, e ia fanaˈo oia i te mau haamaitairaa a Iehova.
6 E tauturu tatou i te feia poro apî ia haamata maitai: Ua taa i te hoê vahine o tei faaite i te anaanatae aita i maoro aˈenei e ua itea mai ia ˈna te faanahonahoraa mau a te Atua. Ua hinaaro oioi aˈera oia e poro. I to ˈna iteraa eaha te mau titauraa, ua parau oia e: “E haamata anaˈe.” Mai te peu e ua farii te mau matahiapo e ia poro te taata ta outou e haapii ra i te Bibilia, a faataa ïa ia ˈna e mea faufaa ia “haamata,” e nehenehe atu ai oia e haamata maitai. A tauturu ia ˈna ia haamau i te hoê porotarama ia faaineine oia ia ˈna no te rave i te taviniraa i te mau hebedoma atoa.
7 Mai te peu e e taata poro apî bapetizo-ore-hia ta outou tamarii, a tauturu ia ˈna ia haere i mua ma te haapao i to ˈna faito matahiti e to ˈna aravihi. Maoti ta outou tauturu iti ia ˈna, e maere paha outou i to ˈna ohie e tauaparau e te taata, e taio i te hoê irava bibilia e e pûpû i te mau papai. Ia farerei oia i te hoê taata aau farii, a faaineine ia ˈna no te farerei faahou i tera taata e no te atuatu i to ˈna anaanatae.
8 E faaaano tatou i ta tatou taviniraa: Ia au i to outou huru tupuraa, e nehenehe anei outou e rave rahi atu â i te ohipa pororaa evanelia i muri aˈe i te tau o te Oroa haamanaˈoraa? E nehenehe anei outou e rave hoê aore ra e piti hora hau atu i tei matauhia i te mau hebedoma atoa? Te ite ra anei outou i nia i te tarena eaha te mau avaˈe e nehenehe ai outou e riro faahou ei pionie tauturu? Aore ra e nehenehe anei outou e faanaho i to outou oraraa no te rave i te taviniraa taime taatoa? E nehenehe ta tatou mau tutavaraa e rave ra i roto i te taviniraa e tauturu i te tahi taata ia farii i te parau mau! (Ohi. 8:26-39) A hiˈo ai tatou i mua, ‘e titau maite noa tatou i te maitai eiaha e faaea, i roto ia tatou iho e te taata atoa ra.’—Tes. 1, 5:15.
[Tumu parau tarenihia i te api 3]
E tamau tatou i te tauturu i:
□✔ Te feia i tae mai i te Oroa haamanaˈoraa
□✔ Te mau melo e poro faahou ra
□✔ Te feia poro apî bapetizo-ore-hia