E rave faahou anei tatou i te reira?—Aniraa apî no te mau pionie tauturu
1 E rave faahou anei tatou i te reira? E rave i te aha? E rave anei tatou i te taviniraa pionie tauturu i te taime o te oroa Haamanaˈoraa? Ua tapea mai te api hau o Te taviniraa o te Basileia no Febuare 1997 i to tatou ara-maite-raa e ta ˈna tumu parau itoito: “Te imihia nei 100 000 pionie tauturu.” Ua papu ia matou e e haafaufaa outou i teie aniraa. I te tapaoraahia te tabula taviniraa no Mati 1997, ua oaoa matou i te iteraa 116 335 feia poro i te mau Hau Amui no Marite tei rave i te taviniraa pionie tauturu. Mai te peu e e apitihia ˈtu i teie numera i na pionie tamau e 70 472 e i na pionie taa ê 181 o tei faahoˈi i te hoê tabula i taua avaˈe ra, e itehia ïa e fatata i te 20 % o te taatoaraa o te feia poro tei rave i te taviniraa pionie. Te faito au noa tei matauhia, oia hoi e toru ahuru tiahapa pionie tauturu i Polinesia Farani nei i te avaˈe, auê ïa te oaoa e ua tapaohia i te avaˈe Mati i te matahiti i mairi aˈenei e 268 feia poro o tei rave i teie huru taviniraa. E rave faahou anei tatou i te reira i te taime o te oroa Haamanaˈoraa i teie matahiti?
2 Te haapopou nei matou ma te aau rotahi i te feia atoa i tutava i te apiti rahi atu â i roto i te pororaa i taua area taime ra. Papu maitai, e ua turaihia outou paatoa e te here haavare ore no te Atua ra o Iehova e no to outou taata-tupu. (Luka 10:27; Pet. 2, 1:5-8) Ua faanahonaho te feia poro i roto e rave rau mau huru tupuraa, ia ratou iho no te riro ei pionie tauturu. I roto i te hoê amuiraa, e 51 feia poro o tei riro ei pionie i te hoê â avaˈe, e matahiapo te rahiraa, te vai atoa ra te metua vahine o te hoê tamahine iti 15 avaˈe, te hoê tuahine o tei faarue i ta ˈna ohipa e tei itea mai ia ˈna te hoê ohipa taime poto ia nehenehe oia e tavini ei pionie, e te hoê tuahine ruhiruhia o tei ore i rave aˈenei i teie taviniraa. Ua papai te tiaau haaati e: “Ua ravehia te hoê tutavaraa rahi i roto i te pororaa. . . . Aita te reira i ohipa noa i nia i te tuhaa fenua, ua anaanatae roa atoa râ te mau amuiraa. Te oaoa nei te mau taeae i te ite-maitai-aˈe-raa ia ratou iho, e i te mau faahopearaa maitatai roa i noaa mai i roto i te taviniraa.”
3 Aita te mau taurearea i tuuhia i te hiti. Ua tiai ru noa na te hoê tamahine poro bapetizo-ore-hia, 13 matahiti to ˈna, i te taime e faataipe ai oia i ta ˈna pûpûraa ia ˈna no Iehova. Ua bapetizohia oia i te avaˈe Febuare, e teie ta ˈna i papai no nia i to ˈna hinaaro e riro ei pionie tauturu i te avaˈe Mati: “I te mea hoi e aita e mea e tapea faahou ra ia ˈu i teie nei, ua horoa oioi au i ta ˈu parau aniraa. . . . Ahiri e aita teie aniraa î i te here ta outou e riro ei pionie, eita roa ˈtu ïa matou e ite i te mau taime faahiahia roa e rave rahi o ta matou i fanaˈo. Te haamauruuru nei au ia Iehova i to ˈna horoaraa mai ia ˈu i teie haamaitairaa taa ê.” Ua haamau oia i te tapao e haamata faahou.
4 Peneiaˈe tei rotopu atoa outou i na feia poro e 268 o tei rave i te taviniraa pionie tauturu i te avaˈe Mati i mairi aˈenei i Polinesia Farani, aore ra i na 117 i te avaˈe Eperera, aore ra i na 86 i te avaˈe Me. E rave faahou anei outou i teie matahiti? Mai te peu e aita outou i nehenehe e riro ei pionie i te mau avaˈe Mati, Eperera, e Me i te matahiti i mairi aˈenei, e nehenehe anei ta outou i teie matahiti? E hemo anei ia tatou e 300, te numera ïa o te feia i rave na i te taviniraa pionie tauturu i te avaˈe Mati 1992? Tera hoi te numera rahi roa ˈˈe o te mau pionie tauturu i naeahia aˈenei i Polinesia Farani.
5 A feruri no te mau avaˈe Eperera e Me: I teie matahiti, e tupu te oroa Haamanaˈoraa i te Mahana maa 11 no Eperera, e riro ïa te avaˈe Eperera ei avaˈe tano maitai no te faarahi i ta tatou ohipa i roto i te taviniraa. (Kor. 2, 5:14, 15) I na mahana matamua 11 o te avaˈe, e tutava ïa tatou i te titau manihini e rave rahi mau taata anaanatae e nehenehe ia haere mai i te oroa Haamanaˈoraa. Mai te peu e te opua ra outou e riro ei pionie tauturu, a horoa ïa i ta outou parau aniraa na mua ˈˈe i te taio mahana outou e hinaaro ai e haamata.—Kor. 1, 14:40.
6 I te mea hoi e e pae hopea hebedoma taatoa to te avaˈe Me, e mea ohie roa ïa no te feia poro haere haapiiraa aore ra rave ohipa ma te taime taatoa, ia riro ei pionie tauturu i taua avaˈe ra. Na roto i te faanahoraa hoê ahuru hora pororaa i na hopea hebedoma e pae tataitahi, e imi noa ïa outou i te rave hoê ahuru hora i roto i te avaˈe ia naeahia e 60 hora titauhia.
7 I te mau avaˈe Eperera e Me, e pûpû tatou i Te Pare Tiairaa e te A ara mai na! E tia i te reira ia faaitoito i e rave rahi o tatou ia rave i te taviniraa pionie. No te aha tatou e na reira ˈi i te parau? No te mea e mea ohie e mea au roa ia pûpû i te mau vea. E nehenehe e pûpûhia i roto i te mau tuhaa atoa o te taviniraa: te pororaa na te mau fare e na te mau fare toa, e ia paraparau atoa anaˈe tatou i te taata na te aroâ, i roto i te mau vahi tapearaa pereoo, i te mau aua e i te tahi atu mau tupuraa o te faaiteraa faanaho-ore-hia. E te vahi faufaa, te turu nei Te Pare Tiairaa e te A ara mai na! i te mau parau mau o te Basileia. Te huti ra teie nau vea i te ara-maite-raa i nia i te tupuraa o te mau parau tohu a te Bibilia, e te faaite ra e ua haamauhia te Basileia o te Atua. Te ohipa atoa ra raua i nia i te oraraa o te feia taio, no te mea te hohora ra raua i te mau mea e hinaaro-mau-hia ra e te taata. Mai te peu e e feruri tatou e mea nafea teie nau vea faufaa roa i te ohiparaa i nia i to tatou oraraa, e turaihia ïa tatou ia opere rahi i te mau avaˈe Eperera e Me.
8 No te faaineine i teie opereraa rahi i te mau vea, e mea maitai ia hiˈo faahou outou i teie mau tumu parau: “Te Pare Tiairaa e te A ara mai na!—E mau vea parau mau i te tau au” (Te Pare Tiairaa o te 1 no Tenuare 1994), “E faaohipa maitai anaˈe i ta tatou mau vea” (Te taviniraa o te Basileia no Setepa 1995), e “E faaineine anaˈe i ta tatou iho faaiteraa i te mau vea” (Te taviniraa o te Basileia no Atopa 1996).
9 Te horoa ra te mau matahiapo i te hiˈoraa: No to ratou hinaaro e turu i te feia poro e rave rahi o tei riro na ei pionie i te matahiti i mairi aˈenei, ua faanaho te mau matahiapo o te hoê amuiraa i te hoê Mahana maa o te avaˈe ei mahana ohipa taa ê no te taatoaraa o te amuiraa. Ua faanahonahohia te mau putuputuraa no te pororaa i te mau taime taa ê o te mahana, ua nehenehe ïa te mau melo atoa o te amuiraa e apiti i roto i te mau tuhaa huru rau o te faaiteraa. Ua poro ratou i roto i te mau vahi raveraa ohipa, na roto i te aroâ e na te mau fare, ua hoˈi ratou e farerei i te taata, ua papai i te mau rata, e ua horoa i te faaiteraa na roto i te niuniu paraparau. E mea faahiahia te ohipa ta te feia poro i rave: 117 tei apiti mai i roto i te pororaa i taua mahana ra. Ia amuihia, ua rave ratou e 521 hora i roto i te taviniraa e ua opere ratou e 617 vea, vea iti e buka! Ua vai noa te anaanatae i itehia i taua Mahana maa ra e Sabati noa ˈtu, e e rave rahi roa hoi taata tei haere mai i te putuputuraa huiraatira e i te haapiiraa o Te Pare Tiairaa.
10 I te mau avaˈe Eperera e Me, e tia ia faahaamanaˈo i te amuiraa i te mau putuputuraa tataitahi no te taviniraa e afea e ihea e faatupuhia ˈi te mau putuputuraa no te pororaa i te hebedoma i muri iho, mai te peu iho â râ e ua ravehia te mau faanahoraa taa ê atu i tei matau-noa-hia na. Te faaitoitohia nei te mau pionie tamau e te feia poro o te ore e riro ei pionie tauturu, ia turu i te pororaa tapûpû mai te peu e e faatia to ratou huru tupuraa.
11 E tia i te tiaau no te taviniraa e te taeae haapao i te mau tuhaa fenua, ia rave i te mau faanahoraa no te poro i te mau tuhaa fenua mea varavara i te ravehia. A tutava i te maimi i te feia aita i te fare e i te poro na roto i te mau aroâ e na te mau fare toa. E nehenehe e faaitoito ia poro i te ahiahi. E tia ia ani e ia navai te mau vea no te mau avaˈe Eperera e Me no te opereraa rahi.
12 E nehenehe e rave rahi feia poro e manuïa: Te na ô ra te pereota matamua o te parau aniraa e rave i te taviniraa pionie tauturu, e: “Na to ˈu here no te Atua e to ˈu hinaaro e tauturu i to ˈu mau taata-tupu ia ite ratou ia Iehova e i ta ˈna mau opuaraa maitatai, e turai ra ia ˈu ia apiti rahi atu â i roto i te pororaa, ma te tapao ia ˈu ei pionie tauturu.” Ua taaihia te here no Iehova e te hinaaro e tauturu ia vetahi ê i te pae varua, i te pûpûraa ia tatou. (Tim. 1, 4:8, 10) No te riro ei pionie tauturu, e taata bapetizohia ïa outou, e haerea maitai to outou e ia maraa ia outou i te rave e 60 hora i roto i te taviniraa i roto i te avaˈe. Mai te peu e e hiˈopoa tatou paatoa i to tatou huru tupuraa, e nehenehe anei vetahi i rotopu ia tatou, o tei ore i riro aˈenei ei pionie, e rave i teie taviniraa i teie matahiti i te mau avaˈe Eperera aore ra Me?
13 I roto i te mau amuiraa, e rave rahi o te ite e e nehenehe atoa ratou e riro ei mau pionie, na roto i te hiˈoraa i te tahi atu mau taeae e mau tuahine, hoê â hoi to ratou huru tupuraa, ia rave i teie taviniraa. Ua nehenehe te mau tamarii haere haapiiraa, te mau ruhiruhia, te mau Kerisetiano e rave ra i te ohipa ma te taime taatoa, e tae noa ˈtu te mau matahiapo e te mau tavini tauturu, e vetahi atu, e riro ei mau pionie tauturu. Ua poro te hoê vahine tamâ fare, e piti tamarii e e ohipa ma te taime taatoa ta ˈna, e 60 hora, ua vaiiho oia 108 vea e ua haamata e 3 haapiiraa Bibilia i roto i te avaˈe i riro ai oia ei pionie tauturu. Mea nafea to ˈna raveraa? Ua faaohipa oia i ta ˈna hora tamaaraa i te vahi raveraa ohipa, no te haere e poro i roto i te hoê tuhaa fenua tapiri, ua poro oia ma te papai i te rata, e i roto i te mau vahi tapearaa pereoo, e na roto i te aroâ. I te mahana aita ta ˈna e ohipa i te hebedoma tataitahi, ua poro ïa oia e ta ˈna amuiraa. Ua manaˈo oia i te omuaraa e eita e naeahia te fa o te taviniraa pionie tauturu, na roto râ i te mau faaitoitoraa a vetahi ê e te hoê tabula ohipa ohie, ua nehenehe oia e haapaiuma i te mau fifi.
14 Ua haapapu o Iesu i ta ˈna mau pǐpǐ e: “Te mǎrû nei hoi ta ˈu zugo e te mâmâ nei ta ˈu hopoia.” (Mat. 11:30) O te upoo parau ïa teie o te hoê tumu parau faaitoito i roto i Te Pare Tiairaa o te 15 no Atete 1995. Te faatia ra teie tumu parau i te tupuraa o te hoê tuahine, o tei ite i te hepohepo rahi no ta ˈna ohipa ma te taime taatoa. Ua manaˈo anei oia e e ere no ˈna te taviniraa pionie tauturu? Aita. Inaha, ua nehenehe oia e riro ei pionie tauturu i te mau avaˈe atoa. No te aha? No te mea, i to ˈna manaˈoraa, ua tauturu teie ohipa ia ˈna ia vai aifaito noa. Te tautururaa ia vetahi ê ia haapii i te parau mau a te Bibilia e te iteraa ia ratou ia taui i to ratou oraraa ia fariihia ratou e te Atua, na te reira ïa e faaoaoa rahi ra ia ˈna i roto i to ˈna oraraa tei î i te ohipa.—Mas. 10:22.
15 Noa ˈtu eaha te mau haapaeraa e te mau tauiraa te tia ia tatou ia rave no te riro ei pionie, e hoona-rahi-hia te reira na roto i te mau haamaitairaa e fanaˈohia. Teie ta te hoê tuahine i papai i muri aˈe i to ˈna raveraa i te taviniraa pionie tauturu: “Ua tauturu mai teie taviniraa ia ˈu ia ore e manaˈo noa ia ˈu e ia tutava rahi i te tauturu ia vetahi ê. . . . Te faaitoito nei au i te feia atoa e nehenehe ta ratou, ia rave i teie taviniraa.”
16 E ani te reira i te hoê tabula ohipa maitai: I te api hopea o teie tumu parau hau, ua rave faahou mai matou i te mau hiˈoraa o te mau tabula ohipa i roto i Te taviniraa o te Basileia no Febuare 1997. E tano paha te hoê o ratou i to outou huru tupuraa. Na roto i te hiˈo-faahou-raa ia ratou, a feruri i ta outou ohipa i matau na i te rave i te avaˈe. Eaha te mau ohipa utuafare te nehenehe e ravehia hou outou e riro ai ei pionie aore ra e faanuu e tae noa ˈtu i te hopearaa o ta outou taviniraa? E nehenehe anei outou e faaiti i te taime o ta outou e rave nei i roto i te mau faafaaearaa, faaanaanataeraa, e i ta outou mau taime vata? Eiaha e hiˈo i te taatoaraa e 60 hora e titauhia, a haamau i ta outou tabula ohipa i te mahana aore ra i te hebedoma. E navai noa e 2 hora i te mahana aore ra 15 hora i te hebedoma no te riro ei pionie tauturu. A hiˈopoa i te mau tabula ohipa i pûpûhia ˈtu e, te hoê penitara i te rima, a hiˈo e teihea te mea tano aˈe no outou e no to outou utuafare.
17 Ua faaara te huru maitai e te turu hau a te amuiraa i roto i te taviniraa i te matahiti i mairi aˈenei, i te anaanatae o te hoê pionie tamau, o tei papai e: “Mauruuru roa no ta outou faaitoitoraa î i te here ia tutava taa ê i te turu i te taviniraa pionie tauturu. . . . Ua tauturu te mau tabula ohipa ta outou i pûpû mai i te feia poro e rave rahi, o tei ore i riro aˈenei ei pionie, ia ite e e nehenehe ta ratou. . . . Te oaoa rahi nei au i te riroraa ei melo no te faanahonahoraa a Iehova e i te peeraa i te aratairaa oaoa e te here a te tavini haapao maitai e te paari.”
18 Te haapapu maira te Maseli 21:5 e: “Te imiraa o te feia faaitoito ra, tei nia ïa i te taoˈa rahi.” I roto i te Maseli 16:3, te vai nei teie faaitoitoraa: “E tuu atu i ta oe ohipa ia Iehova ra, e e haapapuhia ta oe i opua ra.” Oia mau, ma te rave i ta tatou faaotiraa i muri aˈe i te tauaparauraa ia Iehova na roto i te pure, e ma te tiaturi taatoa ia ˈna ia tauturu mai oia ia tatou ia manuïa, e nehenehe tatou ma te feaa ore e opua i te riro ei pionie tauturu. Peneiaˈe, i muri aˈe i te iteraa e mea ohie ta tatou tabula ohipa no te riro ei pionie tauturu hoê aore ra e piti avaˈe, e tapao ïa tatou i nia i te parau aniraa no teie taviniraa, i te vahi o te na ô ra e: “A tapao i teie vahi, mai te peu e te hinaaro ra oe e tavini ei pionie tauturu ma te maumau ore e tae noa ˈtu i te tahi parau faaite apî.” Noa ˈtu râ, e nehenehe tatou e faanaho i te riro faahou ei pionie tauturu i te avaˈe Atete, no te mea e pae hopea hebedoma taatoa to taua avaˈe ra. E faahope ïa te taata tataitahi i te matahiti teotaratia na roto i te tutavaraa i te apiti rahi ia nehenehe i roto i te taviniraa.
19 Ua tohu o Iesu e: “O te faaroo mai ia ˈu ra e rave atoa oia i teie nei mau ohipa ta ˈu e rave nei, e e rahi atu â ta ˈna e rave i teie.” (Ioa. 14:12) E haamaitairaa oaoa ta tatou e riro ei mau hoa ohipa no te Atua a tupu rahi ai teie parau tohu. Teie te taime no te poro i te parau apî maitai ma te uˈana roa ˈtu â, a faaherehere ai i te taime e au no te rave i taua ohipa ra. (Kor. 1, 3:9; Kol. 4:5) Te hoê ravea maitai roa no te rave i ta tatou tuhaa ei feia poro i te Basileia, o te riro-pinepine-raa ïa ei pionie tauturu. Te hiaai ru nei tatou e ite e eaha te uˈanaraa o te himene arueraa a te mau pionie tauturu i teie matahiti i te taime o te oroa Haamanaˈoraa. (Sal. 27:6) Ma te manaˈo i te mau faahopearaa i noaa mai i te matahiti i mairi aˈenei, te uiui nei tatou e: ‘E rave faahou anei tatou i te reira?’ Ua papu ia matou e oia mau.
[Box on page 3]
E nehenehe anei outou e riro ei pionie tauturu?
“Noa ˈtu eaha to outou huru tupuraa, mai te peu e ua bapetizohia outou, e haerea maitai to outou e e nehenehe ta outou e rave e 60 hora i te avaˈe i roto i te pororaa, e te manaˈo ra outou e e nehenehe outou e tavini ei pionie tauturu hoê aore ra e rave rahi avaˈe, e oaoa ïa te mau matahiapo o ta outou amuiraa i te hiˈopoa i ta outou parau aniraa e rave i teie haamaitairaa taa ê o te taviniraa.”—Organisés pour bien remplir notre ministère, api 114.
[Box on page 6]
Mau tabula ohipa no te riro ei pionie tauturu
Mau hiˈoraa no te rave 15 hora pororaa i te hebedoma
Mau poipoi—mai te Monire e tae atu i te Mahana maa
E nehenehe te Sabati e mono i te tahi atu mahana
Mahana Taime Rahiraa hora
Monire poipoi 2h30
Mahana piti poipoi 2h30
Mahana toru poipoi 2h30
Mahana maha poipoi 2h30
Mahana pae poipoi 2h30
Mahana maa poipoi 2h30
Mau hora taatoa: 15
E piti mahana taatoa
E piti mahana maitihia i roto i te hebedoma
Mahana Taime Rahiraa hora
Mahana toru mahana 7h30
Mahana maa mahana 7h30
Mau hora taatoa: 15
E piti ahiahi e te hopea hebedoma
E piti ahiahi maitihia i roto i te hebedoma
Mahana Taime Rahiraa hora
Monire ahiahi 1h30
Mahana toru ahiahi 1h30
Mahana maa mahana 8
Sabati afa mahana 4
Mau hora taatoa: 15
Avatea i te hebedoma e te Mahana maa
E nehenehe te Sabati e mono i te tahi atu mahana
Mahana Taime Rahiraa hora
Monire avatea 2
Mahana piti avatea 2
Mahana toru avatea 2
Mahana maha avatea 2
Mahana pae avatea 2
Mahana maa mahana 5
Mau hora taatoa: 15
Ta ˈu iho porotarama pororaa
A faaoti i te rahiraa hora e rave no te taime tataitahi
Mahana Taime Rahiraa hora
Monire
Mahana piti
Mahana toru
Mahana maha
Mahana pae
Mahana maa
Sabati
Mau hora taatoa: 15