Te nunaa oaoa roa ˈˈe i te fenua nei
1 “E [oaoa] to te feia, o Iehova to ratou Atua.” (Sal. 144:15; MN) Te faaite ra teie mau parau e o te mau Ite no Iehova te nunaa oaoa roa ˈˈe e vai nei. Aita ˈtu e oaoa rahi aˈe ta tatou e fanaˈo i te taviniraa i te Atua ora mau hoê roa ra o Iehova. I te mea e oia “te Atua no ˈna te ao,” e faaite te feia e haamori ra ia ˈna i to ˈna oaoa. (Tim. 1, 1:11) Eaha te tahi mau tuhaa o ta tatou haamoriraa o te tauturu ia tatou ia oaoa?
2 Te tahi mau tumu e oaoa ˈi: Ua haapapu mai Iesu e ia oaoa noa tatou, e tia ia tatou ia ‘ite i to tatou veve i te pae varua.’ (Mat. 5:3, MN) E haamâha tatou i to tatou veve i te pae varua ma te haapii tamau i te Bibilia e ma te haere i ta tatou mau putuputuraa Kerisetiano atoa. Ua faatiamâ mai te parau mau o te Parau a te Atua ia tatou i te mau parau haavare a te haapaoraa hape. (Ioa. 8:32) Ua haapii atoa mai te mau Papai ia tatou i te oraraa maitai roa ˈˈe. (Isa. 48:17) Maoti te reira, e mau amuimuiraa maitai ta tatou i rotopu i to tatou autaeaeraa Kerisetiano oaoa.—Tes. 1, 2:19, 20; Pet. 1, 2:17.
3 E hopoi mai te auraroraa i te mau faaueraa tumu morare teitei a te Atua i te hoê oaoa rahi, no te mea ua ite tatou e e paruru te reira ia tatou e e faaoaoa ia Iehova. (Mas. 27:11) Ua faahiti te hoê papai vea e: “Noa ˈtu ta ratou mau faaueraa tumu etaeta, e au ra e e ere te mau Ite no Iehova i te mau taata oaoa ore. E ere roa ˈtu. Te faaite maira te feia apî . . . mai te feia paari aˈe i te hohoˈa maere o te mau taata oaoa e te faito noa.” Nafea tatou e nehenehe ai e tauturu i to tatou taata-tupu ia ite i taua oaoa ra?
4 E tauturu anaˈe ia vetahi ê ia itea mai te oaoa: Ua î te ao i te mauiui, e e hiˈoraa peapea to te rahiraa o te taata i te tau no a muri aˈe. Ei manaˈo maitai râ to tatou, no te mea ua ite tatou e i te hoê mahana, no mutaa iho ïa te oto. (Apo. 21:3, 4) No reira tatou e apiti ai i roto i te taviniraa ma te itoito rahi, ma te imi i te feia haehaa o ta tatou e faaite atu i ta tatou e tiaturi ra e ta tatou mau tiaturiraa no nia ia Iehova.—Ezek. 9:4.
5 Ua parau te hoê tuahine pionie e: “Aita ˈtu e mea e faaauhia i te mau oaoa e noaa mai ia tauturu i te taata ia ite ia Iehova e ta ˈna parau mau.” E rave anaˈe ïa i te mau mea atoa no te faaitoito i te tahi atu mau taata ia farii i te hoê haapiiraa bibilia i te fare. E oaoa i te rahi to tatou ia tavini ia Iehova e ia horoa ia tatou iho no te tauturu ia vetahi ê ia na reira atoa.—Ohi. 20:35.