“Feia poro itoito rahi i te Basileia”—Tairururaa mataeinaa 2002 a te mau Ite no Iehova
1 “Oaoa aˈera vau e te feia atoa i parau mai ia ˈu e, [E haere] tatou i nia i te fare o Iehova.” (Sal. 122:1; MN) Na roto i teie parau a te papai salamo, te ite ra tatou (1) eaha to ˈna manaˈo i to ˈna titau-manihini-raahia ia apiti i roto i te haamoriraa ia Iehova, (2) e te fanaˈo ra oia i te auhoaraa maitai o te feia e hinaaro ra mai ia ˈna e rave i te haamoriraa mau, e (3) e mau faaineineraa tei ravehia no te horoa i taua titau-manihini-raa ra, no te putuputu e no te haere i te fare o te Atua ra.
2 Aita anei te mau parau a te papai salamo e faaite ra i te huru o to tatou aau ia faaarahia mai e te faaineinehia ra ta tatou mau tairururaa mataeinaa i mua nei? E tiai ru tatou i te reira, no te mea te haamanaˈo ra tatou i te oaoa ta tatou i ite i te mau tairururaa i mairi e i te tiaturiraa e fanaˈo faahou i te hoê tairururaa taa ê e to tatou mau hoa e here ra ia Iehova mai ia tatou. E mau faanahoraa tei ravehia ia tupu na toru mahana tairururaa mataeinaa “Feia poro itoito rahi i te Basileia” i te matahiti 2002 i roto i te tuhaa fenua taatoa. Teie ïa te taime no te faaineine ia tatou iho ia tae iho â tatou e ia faufaa-roa-hia tatou i te amuraa maa pae varua e tiai maira ia tatou.
3 Ua haamata “te tiaau haavare ore e te haapao maitai” i te faaineine i te maa varua e tano i te mau tupuraa o te horoahia i tera mau tairururaa. (Luka 12:42) E titau-manihini-hia te amuiraa taitahi i te hoê tairururaa taa maitai. Hau atu â, mea rahi te mau taeae e faanaho ê na ra i te mau tuhaa rau ia ‘ravehia te mau mea atoa ma te tia e ma te [nahonaho].’ (Kor. 1, 14:40; MN) I te mea e mea rahi te mau faanahoraa i rave-ê-na-hia no tatou, eaha ïa ta tatou iho e nehenehe e rave no te faaineine ia tatou no te tairururaa?
4 A faanaho i teie nei iho ia tae outou i na mahana e toru: E tia anei ia outou ia ani i te tahi faaearaa ohipa i ta outou paoti no te haere i ta outou iho tairururaa taatoa? Ua ite Iehova e mea “faefaea” te tahi mau paoti. (Pet. 1, 2:18) Tera râ, mea faufaa roa ta tatou mau tairururaa, e e hinaaro tatou e tutava puai no te fanaˈo i te porotarama taatoa. A pure ia Iehova ia horoa mai oia i ta ˈna tauturu e ta ˈna aratairaa ia manuïa outou.—Neh. 2:4.
5 Nohoraa: Ia farerei outou i te tahi fifi, a faaara ˈtu i te tuhaa haapao i te nohoraa na roto i te arai o te papai parau o ta outou amuiraa.
6 A haapao i te tahi atu mau melo o te amuiraa: Mai te peu e ua ite tatou e mea fifi roa no te tahi o to tatou mau taeae e mau tuahine ia haere i te tairururaa, no te tahi mau fifi i te pae tino aore ra te pae materia, e nehenehe anei tatou e “mahora” i to tatou here e e tauturu ia ratou? (Kor. 2, 6:12, 13; Deut. 15:7) Tera te huru feruriraa ta Paulo e faaitoito ra i roto i te Korinetia 2, 8:14. No te aha e ore ai e parau ia ratou e na outou e afai ia ratou i te tairururaa? Mai te peu e e pionie ratou, eita e ore e mea rahi ta ratou mau aamu faaitoito i roto i te pororaa e faatia i roto i te pereoo. Peneiaˈe e aamu teotaratia faahiahia to te mau melo ruhiruhia o te amuiraa e aita ratou i faatia aˈenei ia outou. Eita anei te auhoaraa o tera mau taeae e mau tuahine e ohipa maitai i nia ia outou e to outou utuafare? E mauruuru ratou i to outou aau horoa, e e haamauruuru mai Iehova ia outou.—Mas. 28:27; Mat. 10:42
7 Noa ˈtu e na te mau fetii Kerisetiano na mua e haapao i te feia e mau hinaaro taa ê to ratou, e nehenehe te mau matahiapo e te tahi atu mau melo o te amuiraa, tei ite hoi i to ratou huru tupuraa, e tauturu ia ratou ma te here ia rave i te mau faanahoraa. (Tim. 1, 5:4) Ia horoahia ˈtu te mau Demandes de chambre pour cas particuliers i te tomite tiaauraa a te amuiraa, e tia i teie tomite ia hiˈopoa e te faaî maitai ra anei te taata ani taitahi i te mau titauraa hou a hapono ai i teie mau api parau i te tuhaa haapao i te nohoraa. E tapao te papai parau o te amuiraa i ta ˈna numera niuniu i nia i te mau api parau ia nehenehe te tuhaa haapao i te nohoraa e taniuniu ia ˈna mai te peu e te vai ra te tahi mau uiraa. A hapono i te mau aniraa i fariihia i te vahi nohoraa o te tairururaa e vai ra i muri i te api parau.
8 A tauturu atu: I te roaraa o te tairururaa, e turu te mau hanere rima tauturu i te tere-maitai-raa o te mau tuhaa. Na te mau taeae no te fariiraa i roto i te piha e imi i te parahiraa no tatou e, i nia i te vairaa pereoo, na ratou e tiai i to tatou mau pereoo i te mahana taatoa. E fanaˈoraa taa ê ta te tuhaa haapao i te tamâraa e atuatu i to tatou roo maitai o te vai-mâ-raa, no te mea ia hoˈi tatou i te fare, mea mâ aˈe ta tatou vahi haamoriraa no te hoê taime hou to tatou faaohiparaa ˈtu. E nehenehe anei tatou e turu i tera mau tuhaa aore ra te tahi atu o te hinaaro i ta tatou tauturu? E hinaaro anei outou e tauturu atu i te tavini “ma te aau hoê” e to outou mau taeae?—Zeph. 3:9.
9 Te ite mau ra anei te taata eaha ta tatou e rave ra? I te matahiti i mairi aˈenei, i te hoê tairururaa mataeinaa, te rave ra te hoê taata tei faaea i te haapii e te mau Ite e hau atu i te 20 matahiti i teie nei, i te ohipa i roto i te hoê hotela. Ua parau oia e te opua ra oia i teie nei e haapii faahou e e hoˈi faahou i te mau putuputuraa. No te aha? No te mea ua faaite te mau Ite i te aau maitai i nia ia ˈna a faaea ˈi ratou i te hotela.
10 Teie ta te hoê tia no te hoê anairaa hotela i parau no nia i to tatou mau taeae: “O outou te pǔpǔ maitai aˈe i faaea mai i ta matou mau hotela. Mea faaoromai roa e mea ite roa to outou mau taata i te peu!” Eaha râ paha to tatou Metua i te raˈi i te oaoa ia ite oia ia tatou ia pee i teie faaitoitoraa a Iesu: “To outou maramarama, ia anaana ïa i mua i te aro o te taata nei, ia hiˈo ratou i ta outou parau maitai, e ia haamaitai i to outou Metua i te ao ra.”—Mat. 5:16.
11 E faaite anaˈe ïa i te huru feruriraa o te arii Davida, o te tiai ra ma te oaoa i te haere i te fare i reira Iehova e haamorihia ˈi. E taime taa ê roa ta tatou mau tairururaa mataeinaa no te fanaˈo i te maa varua e no te farerei i te mau taeae e te mau tuahine. No reira matou e titau manihini ai ia outou ma te aau tae ia haamata i te rave i te mau faanahoraa ia tae outou i te mau ruru atoa o tera na mahana e toru, teie te manaˈo tumu “Feia poro itoito rahi i te Basileia.”
[Tumu parau tarenihia i te api 3]
Hora o te mau rururaa
Mahana pae e Mahana maa
9:30 — 5:00
Tapati
9:30 — 4:00