A faaineine ia outou no te haapii i te parau tohu a Isaia
1 “Ia papu i to ˈna mau taata haamori haapao maitai e eita Iehova . . . e vaiiho e ia vai mai â te ao a Satani hoê mahana hau aˈe i ta te parau-tia e titau ra.” Auê ïa faahitiraa faaitoito e! Nohea mai te reira? No roto mai i te buka ra La prophétie d’Isaïe, lumière pour tous les humains I. E horoa anei te parau tohu a Isaia i te mau tumu maitatai na tatou ia huti i te tahi faaotiraa faaitoito roa ˈˈe? Oia mau. I roto i teie buka o te Bibilia, ua haamahitihiti-puai-maitai-hia te tumu parau o te faaoraraa. (Isa. 25:9) No reira, e faaitoito-roa-hia tatou na roto i te haapiiraa i teie tuhaa o te Parau a te Atua i roto i te haapiiraa buka a te amuiraa. E haere anei tatou i te mau hebedoma atoa? No te aha e tia ˈi ia tatou?
2 I roto i te Isaia 30:20 (MN), ua parauhia Iehova to tatou “Orometua Rahi.” E tia ïa i te Kerisetiano taitahi ia faaroo maitai eaha ta Iehova e parau maira na roto i ta ˈna Parau e te mau papai bibilia e horoahia ra e “te tavini haapao maitai e te paari.” (Mat. 24:45; Isa. 48:17, 18) Papu maitai e e tano atoa te reira no te buka ra Prophétie d’Isaïe, buka 1. Nafea tatou e faufaa-roa ˈˈe-hia ˈi i te haapiiraa i te reira?
3 A faaineine ia outou no te apiti atu: A faaherehere maite i te taime i te mau hebedoma atoa no te faaineine i te haapiiraa buka. A taio i te mau tumu parau i faanahohia no te hebedoma, tera e tera paratarafa. A feruri i te mau uiraa taitahi i papaihia. A tapao i te mau pahonoraa i roto i ta outou buka. Ua papaihia te mau irava o te buka a Isaia ma te meumeu; a taio maitai i te reira. Area te tahi atu mau irava i horoahia, a taio atu i roto i ta outou Bibilia ia taa ia outou te taairaa e te mau tumu parau e hiˈopoahia ra. A feruriruri i te mea ta outou e haapii ra. I muri aˈe, a faaite i ta outou maimiraa i te mau melo o ta outou haapiiraa buka.
4 E tia i te taeae o te aratai i te haapiiraa buka ia tauturu i te feia atoa i haere mai ia faaohipa maitai i te Bibilia e ia taa ia ratou te faufaaraa mau o te mau tumu parau e haapiihia ra. Mai te peu e o outou te paraparau na mua, a pahono tia ˈtu e ma te ohie. Mai te peu e ua pahono aˈena te hoê taata, e nehenehe ta outou e faahohonu atu i te manaˈo e aparauhia ra. Peneiaˈe e nehenehe ta outou e faataa nafea te hoê irava faufaa e paturu ai i te tumu parau. A faaitoito i te pahono na roto i ta outou iho mau parau e ia oaoa outou i te apitiraa i roto i te aparauraa.
5 Tatou paatoa, e hiˈopoa anaˈe ïa ma te aau tae i te poroi faufaa e vai ra i roto i te buka a Isaia. E faaitoitohia ïa tatou ia ora i te mau mahana atoa i roto i te tiairaa oaoa o te faaoraraa a Iehova.—Isa. 30:18.