E haapii anaˈe i te buka ra Prophétie de Daniel
1 Mai te hebedoma o te 17 no Eperera, e haapii tatou i te buka ra Prêtons attention à la prophétie de Daniel! i roto i te mau haapiiraa buka. E rave rahi tei taio aˈena i teie buka faahiahia roa; i teie nei râ, e ravea ïa ta tatou no te faaô atoa mai i te hoê tuatapaparaa anaanatae e te hoê pǔpǔ. Oia, te titau-manihini-hia ra e te faaitoitohia ra te feia poro atoa, te feia hinaaro mau e te mau tamarii ia tae mai i taua haapiiraa hohonu ra o te buka Bibilia a Daniela i te mau hebedoma atoa.—Deut. 31:12, 13.
2 Porotarama haapiiraa e mau faaueraa: Tei roto te porotarama haapiiraa taatoa o te buka ra Prophétie de Daniel i Te taviniraa o te Basileia no Mati 2000 na roto i te reo Farani. A haamanaˈo i te tuu i te hoê hohoˈa i roto i ta outou buka haapiiraa. E faaite te porotarama no te mau hebedoma atoa i te pene e te mau paratarapha o te buka e tae noa ˈtu i te mau irava o te buka a Daniela e aparauhia ˈi. Te faataa ra te mau nota nafea e afea te tahi mau tuhaa o te buka e tuatapapahia ˈi. Ia oti te haapiiraa taitahi, te faaitoitohia ra te taeae faatere ia hiˈo faahou e te pǔpǔ i te mau irava o te buka a Daniela e vai ra i roto i te porotarama no te hebedoma. Ia taimehia, e nehenehe te mau irava e taiohia e e tatarahia. E tuatapapahia te tahi mau irava i nia e piti hebedoma, no te mea e titauhia ia haamaoro rii aˈe no te faataa i te reira.
3 A faaineine ia outou no te hoê haapiiraa hohonu: Ua haapaohia ia navai maite te taime no te tuatapapa i te mau tumu parau rii atoa i te mau hebedoma atoa. E maha haapiiraa poto rii. No reira, ia oti te haapiiraa no te hebedoma o te 5 no Tiunu, e nehenehe te taeae faatere e faaô mai i te hoê hiˈo-faahou-raa o te Daniela 2:1-40. I te hebedoma o te 26 no Tiunu, e nehenehe oia e hoˈi mai i nia i te Daniela 3:1-30. E faaôhia te hoê tuatapaparaa huˈahuˈa i te mau faahohoˈaraa e te mau irava o te api 139 i roto i te haapiiraa o te hebedoma o te 4 no Setepa. E tia ia tuatapapahia te faahohoˈaraa o te mau api 188 e 189 i te hebedoma o te 2 no Atopa.
4 A faaineine maite ia outou no te mau haapiiraa o te mau hebedoma atoa e a anaanatae i te apiti atu. A oaoa i ta outou haamaitairaa, oia hoi te amuiraa e te faanahonahoraa ite-mata-hia a Iehova e te fanaˈoraa i te ite maite e te haamaramaramaraa ta ta ˈna mau tavini haapao maitai faatavaihia e faatae ra. (Dan. 12:3, 4) A faaitoito ma te hamani maitai ia vetahi ê ia tae pinepine mai i te haapiiraa buka. Ia nehenehe tatou paatoa e haapao maitai i te parau tohu a te Atua mai tei faaitehia i roto i te buka faahiahia a Daniela!—Heb. 10:23-25; Pet. 2, 1:19.