Eiaha outou e taiâ!
1 Ia faaineine tatou ia tatou no te haere e poro i tera e tera uputa, te uputa ta tatou e taiâ roa ˈˈe, o to tatou iho â paha. E tapea paha te hoê manaˈo eita e maraa ia tatou eiaha e haere e paraparau i te parau mau i “te taata atoa.” (Tim. 1, 2:4) Teie râ, eiaha tatou e taiâ i te poro i te parau apî maitai. No te aha?
2 Na Iehova teie poroi: Te faatae maira Iehova i ta ˈna parau na roto i te Bibilia. Ia faaite tatou i taua poroi ra ia vetahi ê, te horoa ra ïa tatou i to ˈna mau manaˈo, eiaha to tatou. (Roma 10:13-15) Ia patoi te mau taata i te poroi o te Basileia, o Iehova mau â ïa ta ratou e patoi ra. Eiaha râ tatou ia toaruaru. Ua papu ia tatou e e haaputapû taua poroi ra i te mafatu o te feia e hinaaro uˈana ra ia taui te tupuraa o te ao nei e o te ite ra i to ratou veve i te pae varua.—Ezek. 9:4; Mat. 5:3, 6.
3 E faatae mai Iehova i te taata: E farii paha te hoê taata o tei patoi i te faaroo ia tatou i mutaa ihora i te poroi no te mea ua taui to ˈna tupuraa e ua mǎrû mai to ˈna aau. E nehenehe atura ïa Iehova e faaite i to ˈna hamani maitai i teie taata e e ‘faatae mai ia ˈna.’ (Ioa. 6:44, 65) Ia tupu te reira, e hinaaro tatou ia ineine tatou i te faaohipahia e Iehova e ia vaiiho e na te mau melahi e aratai ia tatou ia itea mai taua taata ra.—Apo. 14:6.
4 E horoa mai te Atua i to ˈna varua: E tauturu te varua moˈa ia tatou ia paraparau ‘ma te mǎtaˈu ore maoti te puai o Iehova.’ (Ohi. 14:1-3, MN) Ia haamanaˈo tatou e te fanaˈo ra tatou i taua turu puai ra i roto i ta tatou taviniraa, eita tatou e taiâ i te paraparau i te parau mau i to tatou mau taata tapiri, i to tatou mau hoa ohipa, i to tatou mau hoa haapiiraa, i to tatou fetii, tae noa ˈtu i te feia taoˈa aore ra maramarama roa.
5 Ua haapii mai Iesu nafea: Ua faaohipa Iesu i te tahi mau uiraa o te haaferuri, i te tahi mau faahohoˈaraa o te oraraa o te mau mahana atoa e te tahi mau manaˈo bibilia. Ua faataa oia i te parau mau ma te ohie e te oraora, ma to ˈna aau. I teie mahana, tera noa iho â te raveraa maitai roa ˈˈe. (Kor. 1, 4:17) E nehenehe te mau tupuraa o ta tatou pororaa e taui, tera noa iho â râ te poroi puai o te Basileia.
6 Te horoa maira Iehova i te haamaitairaa taa ê e faaohipa ia tatou no te tauturu i te tahi mau taata ma te ravea faahiahia roa ˈˈe ia nehenehe ratou e fanaˈo i te ora. Eiaha tatou e tapeapea ia tatou. Ia itoito tatou e ia vaiiho tatou e ia ‘iriti Iehova i te opani parauraa na tatou,’ ia nehenehe hoi tatou e faaite i te parau apî maitai i to tatou mau taata-tupu.—Kol. 4:2-4.