Mea mamahu anei outou?
1 Eita tatou e maere ia ite tatou i te hoê tamarii iti, e parahi roa ra i roto i to ˈna metua vahine, o te hiˈo taue mai ia tatou. E naturaraa te mamahu i ǒ te mau tamarii apî. Ia paari atoa mai ratou, e naturaraa mamahu noa to te mau taata e rave rahi. E nafea ïa ia haafifi te mamahu ia outou ia apiti i roto i te taviniraa?
2 A haavî i to outou mamahu: E mea faufaa ia ohipa i nia i ‘te taata moe o te aau.’ (Pet. 1, 3:4) A haapaari i to outou here no Iehova e no to outou taata-tupu. Ia papu roa ia outou e e ravea maitai roa ˈˈe te pororaa no te faaite i te hoê here miimii ore. A tapea noa i te mau peu maitatai i te pae o te haapiiraa taitahi e te taeraa mai i te mau putuputuraa. A pure tamau e ma te papu no te fanaˈo i te tauturu a Iehova. E horoa mai te hoê faaroo e te hoê tiaturi puai no outou i te tiaturi ia outou iho e e tauturu ia ‘rahi roa to outou itoito ia parau i te parau [a te Atua] ma te mǎtaˈu ore.’—Phil. 1:14; MN.
3 A haapae i te mau manaˈo haafaufaa ore ia outou iho atoa. E au ra hoi e ua na reira o Timoteo. Ua faaitoito Paulo ia ˈna ‘eiaha e taata e vahavaha i to ˈna apîraa,’ ma te haamanaˈo ia ˈna e “e ere hoi i te aau taiâ ta te Atua i horoa mai no tatou, i te aau itoito râ.” (Tim. 1, 4:12; Tim. 2, 1:7) Ua faaohipa-rahi-hia o Timoteo e Iehova, o te faaohipa atoa ia outou mai te peu e e tutava outou i te haere i mua ma te tiaturi taatoa i te Atua.—Sal. 56:11.
4 No to ˈna mamahu, ua itoitohia te hoê tuahine e mǎtaˈu ra i ta ˈna tane o tei patoi i ta ˈna mau tiaturiraa, na roto i te feruri-hohonu-raa i te mau irava Bibilia mai te Mataio 10:37. Ma te tuutuu ore, mea ohie roa no ˈna te pororaa, e i te pae hopea, ua farii ta ˈna tane, to ˈna metua vahine e to ˈna mau taeae i te parau mau.
5 Mea faufaa te faaineineraa: E rahi atu â to outou tiaturi ia outou iho mai te peu e e faaineine maite outou no te taviniraa. A maiti i te hoê faaiteraa ohie i roto i te buka ra Comment raisonner aore ra i roto i Te taviniraa o te Basileia, a haamanaˈo maitai i te mau manaˈo e a faahiti noa. Maoti i te hepohepo noa aita e tumu, a tapea i te manaˈo maitai. A huti i te faaitoitoraa na roto i te rave-amui-raa i te ohipa e o vetahi ê. A haamanaˈo e, i rotopu i te mau taata e rave rahi ta outou e farerei, mea mamahu atoa e rave rahi mai ia outou. E hinaaro te taata atoa i te parau apî maitai o te Basileia.
6 Mai te peu e mea mamahu outou, eiaha e haaparuparu. A faaohipa i to mua ˈtu mau manaˈo, e e tauturu mai Iehova ia outou ia riro ei taata poro aravihi i te parau apî maitai. E itea mai ïa ia outou te oaoa i roto i ta outou taviniraa.—Mas. 10:22.