‘A poro i te parau ma te onoono maite’
1 Eaha ta outou e taa ra ia parauhia ia outou e onoono maite? Teie te auraa o teie ihoparau, ‘e tamau i te rave i te hoê ohipa.’ No reira te aposetolo Paulo i parau ai i te mau Kerisetiano ia ‘[poro] i te parau ma te onoono maite.’ (Tim. 2, 4:2; MN) Te faaroo ra anei tatou i ta ˈna aˈoraa ma te tamau i roto i taua ohipa ra?
2 Peneiaˈe e ua faaitehia ia Paulo e te “toaruaru” ra te tahi mau taeae ‘i ta ratou ohipa’ Kerisetiano. (Roma 12:11) Ei faahopearaa, aita ta ratou mau tutavaraa i hotu-rahi-roa e aita ratou i oaoa rahi atu â i ta ratou tauturu ia vetahi ê.
3 Te manaˈo o Iesu no nia i te taviniraa: E anaanatae rahi mau to Iesu i te rave i ta ˈna taviniraa. Ua parau oia e: “Teie ta ˈu maa, o te haapao i to ˈna hinaaro o to tei tono mai ia ˈu nei, e te faaoti i ta ˈna ohipa.” Ua turai to ˈna hiˈoraa ia ohipa ta ˈna mau pǐpǐ, ta ˈna i faaitoito ma te parau e ‘ua teatea te mau aua no te auhune.’ (Ioa. 4:34, 35) Mai te haamataraa e tae atu i te hopearaa o ta ˈna taviniraa, ua taa noa ia Iesu te faufaaraa ia onoono maite. E itehia te reira i roto i ta ˈna mau parau i ta ˈna mau pǐpǐ: “E teie nei, e pure outou i te Fatu o te ohipa ia tono â oia i te rave ohipa ei ooti.” (Mat. 9:38) Ua ite Iesu e o te pororaa ta ˈna ohipa faauehia, e ua faaoti papu oia eiaha roa ˈtu e vaiiho i te hoê mea e faaatea ê ia ˈna i te reira.
4 E o tatou? Mea ru atu â te pororaa ma te onoono maite i teie mahana i to mutaa ihora. I te mau vahi e rave rahi o te ao nei, ua paari te mau aua no te auhune. Tae noa ˈtu i te mau fenua e au ra e ua tia te pororaa i ǒ, te bapetizo nei e mau tausani taata i te mau matahiti atoa. I te mea e te piri oioi noa maira te hopea o teie faanahoraa o te mau mea, mea “rahi â te rave i te ohipa a te Fatu.” (Kor. 1, 15:58) Mea faufaa roa ˈtu â ia tutava rahi tatou i te tufa i te poroi o te Basileia i teie tau i to mutaa iho ra.
5 E haaparare tamau anaˈe i te parau apî maitai, i tera e tera fare anei aore ra i te mau vahi atoa o te tuhaa fenua to reira te mau taata. Ma te apiti rahi atu â i roto i te pororaa, te faaite ra tatou e te tuu ra tatou i te Basileia i te parahiraa matamua o to tatou oraraa. (Mat. 6:33) Ia poro tatou i te parau ma te taiva ore e te onoono maite, e oaoa rahi ïa tatou.