Ua teatea te mau aua i teie nei ua auhune
1. Eaha te ohipa faufaa e ravehia ra?
1 I muri aˈe i to Iesu pororaa i te hoê vahine Samaria, ua parau oia i ta ˈna mau pǐpǐ: “E faateitei i to outou mata, e hiˈo i te mau aua ra, ua teatea ïa i teie nei ua auhune.” (Ioa. 4:35, 36) Ua haamata te hoê auhune i te pae varua e ua ite atea Iesu i te aanoraa o tera ohipa na te ao nei. Mai te raˈi mai, te turu rahi noa ra oia i te reira. (Mat. 28:19, 20) Eaha te mau haapapuraa e te rahi e te ru noa ˈtura tera ohipa a raea ˈi to ˈna faito hopea?
2. Na te aha e faaite ra e te rahi noa ˈtura te auhune na te ao nei?
2 Auhune na te ao atoa: I te matahiti taviniraa 2009, e 3,2 % te maraaraa o te feia poro na te ao nei. I te mau fenua ua taotiahia te pororaa, 14 % ïa te maraaraa. Ua hau atu i te 7 619 000 haapiiraa Bibilia i faaterehia i te mau avaˈe atoa, e mea rahi aˈe ïa i te numera maitai roa ˈˈe o te feia poro e ua fatata afa mirioni hau i te matahiti i mahemo. I te mea e te rahi oioi ra te ohipa i te tahi mau vahi, te ani-rahi-hia ra te mau mitionare no Gileada mai. Te hotu maitai ra te mau tuhaa fenua reo ê i te fenua e rave rahi. Te auraa ïa, te faatupu oioi ra Iehova i te ohipa a fatata ˈi te hopea o te auhune. (Isa. 60:22) E manaˈo maitai anei to oe i ta oe tuhaa fenua?
3. Eaha ta vetahi e faaoti no nia i te auhune i ǒ ratou?
3 Te auhune i ǒ oe: “E ere ta ˈu tuhaa fenua i te mea hotu roa,” ta vetahi e parau. Parau mau, e au ra e e ere te tahi mau tuhaa fenua i te mea hotu mai te tahi atu aore ra mai i mutaa iho. E faaoti paha vetahi mau Ite e ua farii aˈena te rahiraa o te taata i ǒ ratou e te ohipa i teie nei, o te ohi-haere-noa-raa ïa i te toea. Tera mau anei?
4. Eaha te manaˈo tano no nia i ta tatou taviniraa ta tatou e atuatu, e no te aha?
4 Mai te omuaraa e tae atu i te hopea, e tau haaraa rahi te auhune. A tapao i te huru ru o ta Iesu mau parau: “Te rahi mau nei te auhune, te iti nei râ te feia e rave: e teie nei, e pure outou i te Fatu o te ohipa ia tono â oia i te rave ohipa ei ooti.” (Mat. 9:37, 38) Na Iehova, te Fatu o te ohipa, e faaoti afea e ihea e hotu mai ai. (Ioa. 6:44; Kor. 1, 3:6-8) Eaha ta tatou tuhaa? Te pahono ra te Bibilia: “Ei te poipoi a ueue ai i ta oe huero, e ei te ahiahi eiaha e parahi noa.” (Koh. 11:4-6) Ia fatata te hopea o te auhune, e ere teie i te taime no te parahi noa!
5. No te aha ia poro noa ma te itoito rahi?
5 A ohipa noa: E tumu papu ta tatou no te ohipa ma te itoito rahi e ma te onoono maite â noa ˈtu e te poro-noa-hia ra ta tatou tuhaa fenua e e au ra e aita e tâuˈahia maira. (Tim. 2, 4:2) No te mau tauiraa peapea na te ao nei, e taui te taata i to ratou huru e manaˈo no nia i to ratou ananahi. Te imi nei paha te feia apî tei paari i te panoonoo ore e te hau o te feruriraa. E maere paha vetahi atu i to tatou tuutuu ore. E farii mai paha te feia i ore i faaroo ia tatou i na mua ˈˈe. E mea tia ia faaarahia atoa te feia o te patoi mau i ta tatou poroi.—Ezk. 2:4, 5; 3:19.
6. Mai te peu e e mea fifi ta tatou tuhaa fenua, eaha te tauturu mai ia itoito rahi noa?
6 Mai te peu e e mea fifi ta tatou tuhaa fenua, eaha te tauturu mai ia itoito rahi noa? E nehenehe paha tatou e rave i te tahi atu huru pororaa, te pororaa i te vahi tapihooraa aore ra na roto i te niuniu paraparau. E nehenehe atoa paha: e tauiui i ta tatou huru faaiteraa, e taui i ta tatou porotarama no te poro i te taperaa mahana aore ra i te taime tei te fare te taata, e haapii i te tahi atu reo no te poro i te parau apî maitai i te taata e rave rahi. E rave atoa paha i te taviniraa pionie tamau aore ra e haere i te hoê tuhaa fenua mea iti roa “te rave ohipa.” Mai te peu e e manaˈo maitai to tatou i te auhune, e tutava tatou i te apiti rahi roa i teie ohipa faufaa.
7. Ia tamau tatou i te ohipa haaputuputuraa e tae roa ˈtu i teihea taime?
7 E taime taotiahia to te feia faaapu no te auhune, eita ratou e faafaaea aore ra e faatautau ia oti roa te ohipa. Hoê â huru ru to te auhune i te pae varua. Ia tamau tatou i te ohipa haaputuputuraa e tae roa ˈtu i teihea taime? E tae roa ˈtu i te hopea. (Mat. 24:14; 28:20) Mai te Tavini rahi roa ˈˈe a Iehova, e faaoti tatou i te ohipa ta ˈNa i horoa mai. (Ioa. 4:34; 17:14) E tamau anaˈe ïa i te poro ma te itoito rahi, te oaoa, e te manaˈo maitai e tae roa ˈtu i te hopea. (Mat. 24:13) Aita te auhune i oti atura!
[Parau iti faaôhia i te api 2]
Mai te omuaraa e tae atu i te hopea, e tau haaraa rahi te auhune