Te mau ‘vahine o tei ohipa puai nei i roto i te ohipa a te Fatu’
1 Na roto i teie mau parau, te faataa ra Paulo ia Teruphaina e ia Terophosa, e piti tuahine o te amuiraa no Roma o tei ohipa puai na. No nia i te tahi atu, o Peresi, te na ô ra oia e: “[Ua] rave papu [oia] i te ohipa a te Fatu nei.” Te parau atoa ra oia ma te haapopou no nia ia Phebe: te faataa atoa ra oia ia ˈna ei ‘tauturu no te taata e rave rahi.’ (Roma 16:2, 12) I roto i te mau Papai, ua faahitihia o Doreka ei hiˈoraa no te mea ‘ua rahi ta ˈna ohipa maitai i rave, e te horoa hoi i te taoˈa.’ (Ohi. 9:36) Ua riro te mau vahine maitai i te pae varua ei haamaitairaa no te amuiraa.
2 Te poihere ra anei outou i te mau tuahine o ta outou amuiraa o te ohipa puai nei? Te rave ra ratou i te tuhaa rahi roa ˈˈe i roto i te pororaa, te aratai ra ratou i te rahiraa o te mau haapiiraa Bibilia e te tauturu ra ratou e rave rahi feia apî. Te horoa atoa ra ratou i te hoê taime rahi no te tauturu i te mau tamarii ia haere i mua i te pae varua. Te turu ra ratou e ia vai noa te here, te oaoa, te hau e te itoito i roto i te amuiraa. Maoti ta ratou turu i roto i te mau tuhaa rau e nehenehe ai ta ratou tane e te tahi atu mau melo utuafare e haa i roto i te taviniraa a Iehova.
3 Te mau tuahine i roto i te taviniraa ma te taime taatoa: I rotopu i te mau tuahine o te ohipa puai nei i roto i te Fatu, te vai ra te mau mitionare; e tuhaa ta e rave rahi i hauti i te haamataraa o te pororaa i te mau fenua e rave rahi. I roto i te mau amuiraa e tavinihia ra e ta ratou mau tane, te haa ra te mau vahine a te mau tiaau haaati i roto i te taviniraa e te faaitoito ra ratou e rave rahi tuahine. Eiaha ia moehia te mau tuahine o te Betela o te rave ra i te hoê taviniraa moˈa ma te itoito no te tururaa i te faanahonahoraa a Iehova. E te mau tuahine pionie tamau o te tauturu ra e mau tausani taata ia ite i te parau mau maoti te mau tutavaraa ta ratou e horoa ra ma te taiva ore no te arue i te Atua.
4 Te mauruuru mau ra teie mau vahine haapao maitai no to ratou oraraa faatusia. (Tim. 1, 6:6, 8) E tia ia tatou ia haapopou, ia faaitoito e ia turu ia ratou.
5 Mea faufaa te mau tuahine Kerisetiano no te faanahonahoraa a Iehova; te rave ra ratou i te hoê taviniraa taiva ore o te hopoi mai i te mau haamaitairaa no te taatoaraa. E tamau anaˈe i te poihere i taua mau vahine ra e e pure anaˈe ia Iehova ia haamaitai ia ratou, no te mea ‘te ohipa puai nei ratou i roto i te ohipa a te Fatu.’