E faaohipa anaˈe i te tahi mau api parau iti no te haamata i te mau aparauraa
1 E ere anei i te mea tano e e taaihia te manuïaraa o ta tatou pororaa i te rahiraa o te mau opuaraa ta tatou e rave ra no te haamata i te tahi mau aparauraa? Te fifi, o te faahitiraa ïa i te tahi parau o te faatupu i te anaanatae o te taata e o te aratai ia ˈna ia paraparau. Nafea ïa?
2 Ua ite e rave rahi feia poro e, maoti te tahi mau parau maiti-maitai-hia, e nehenehe e faatupu i te hoê aparauraa ma te pûpû atu i te hoê o ta tatou mau api parau iti Bibilia. Mea anaanatae ta ratou mau upoo parau e e huti ta ratou mau hohoˈa peni i te ara maite-raa. E au ra e eita e painu ia taio i te mau api parau iti. Teie râ, mea faahiahia te mau poroi maramarama e vai ra i roto e maoti te reira e nehenehe ai e haamata i te hoê haapiiraa Bibilia.
3 Teie te manaˈo o te hoê Ite: “I roto i teie nei ao ru haere noa, mea varavara te taata i te rave i te taime no te taio. Teie râ, ua tano maitai noa taua mau api parau iti ra no te faahiti i te hoê poroi faufaa, e e tano maitai i te poto ia ore e fiu oioi noa i te hiˈoraa ˈtu. Ua taio vau e rave rahi api parau iti . . . e e mea na reira to ˈu iteraa i te parau mau.” Eiaha roa ˈtu tatou e haafaufaa ore i te mana o te Parau a te Atua i faataahia i roto i taua mau poroi poto i neneihia.—Heb. 4:12.
4 Maha raveraa ohie: E rave rahi o tei manuïa na roto i te raveraa ohie. 1) E faaite anaˈe e rave rahi api parau iti i te hoê taata e e ani anaˈe ia ˈna teihea ta ˈna e anaanatae ra. 2) Ia maiti te hoê taata hoê, e ui anaˈe ia ˈna i te hoê uiraa maiti-maitai-hia o te haamatara ra hoê o te mau manaˈo faufaa i faahitihia i roto i te api parau iti. 3) No te pahono i taua uiraa ra, e taio anaˈe i roto i te api parau iti hoê paratarapha aore ra hoê irava e tano. 4) Mai te peu e e farii te taata, e tamau anaˈe i te hiˈopoa i te api parau iti, aore ra e faahaere anaˈe i nia i te hoê haapiiraa o te buka rairai ra Titau aore ra i nia i te hoê pene o te buka ra Te ite, o te faahohonu roa ˈtu â i te reira. Peneiaˈe e haamata roa tatou i te hoê haapiiraa Bibilia i reira iho. E tauturu mai te mau manaˈo i muri nei ia tatou ia faaineine i te tahi mau aparauraa no roto mai e maha api parau iti:
5 E uiraa te upoo parau o te api parau iti ra “O vai mau na te faatere o te ao nei?” o te nehenehe e uihia.
◼ Mai te peu e pahono mai te taata ta tatou e paraparau ra “Te Atua” aore ra “Aita vau i ite,” e taio anaˈe ïa na pereota matamua e piti i te api 2 e te paratarapha matamua o te api 3. E faahiti anaˈe i te Ioane 1, 5:19 e te Apokalupo 12:9. Te feaa ra te taata aore ra aita i te vai-mau-raa o te Diabolo ra o Satani e te farii ra oia aore ra aita e te faatere ra Satani i te ao nei, e nehenehe tatou e aparau noa ma te apee i te haaferuriraa i raro aˈe i te upoo parau iti ra “Te tahi pahonoraa maoti te mau tupuraa o te ao nei.” Mai te peu e te anaanatae ra oia, e nehenehe tatou e faataa ˈtu ia ˈna nohea mai te Diabolo ma te faaohipa i te mau api 3 e te 4 o te api parau iti.
6 E faatupu ohie noa te api parau iti ra “Eaha te tiaturiraa no te feia herehia e tatou tei pohe?” i te anaanatae. E nehenehe tatou e faatupu i te hoê aparauraa ma te ui atu e:
◼ “E manaˈo anei oe e i te hoê mahana e ite faahou tatou i te mau taata tei herehia e tatou e tei pohe?” Ia pahono mai te taata ta tatou e paraparau ra, e hiˈopoa anaˈe i te paratarapha piti i te api 4 e e taio anaˈe i te Ioane 5:28, 29. I muri iho, e faataa anaˈe e e tauturu te reira ia taa i te mea e faahitihia ra i raro aˈe i te upoo parau iti matamua o te api parau iti. E faaau anaˈe i te tauaparau i nia i te reira.
7 No te mau utuafare o te ao atoa nei te api parau iti ra “A fanaˈo i te hoê oraraa utuafare oaoa.” E nehenehe tatou e parau e:
◼ “E faˈi mau paha oe e te ino ra te utuafare i teie mahana. Ia manaˈo oe, eaha te nehenehe e ravehia no te haapaari i te mau taairaa utuafare? Ia pahono mai te taata, e huti anaˈe i to ˈna ara-maite-raa i nia i te mau manaˈo e vai ra i te paratarapha matamua o te api 6. E rave anaˈe hoê o te mau irava i faahitihia i te mau api 4 e te 5 o te api parau iti e e faataa anaˈe ia ˈna i te reira. I muri iho, e pûpû anaˈe i te hoê haapiiraa Bibilia tamoni ore i to ˈna fare.
8 E nehenehe e faaohipahia te api parau iti ra “No te aha e tiaturi ai i te Bibilia” e teie faaiteraa:
◼ “Ua faaroo te rahiraa o te taata i te aamu o Kaina raua o Abela, tei itehia i roto i te buka matamua o te Bibilia. Te parau atoa ra te faatiaraa o te Genese no nia i te vahine a Kaina. Ua uiui aˈena anei oe e nohea mai oia?” E pahono anaˈe ma te faaohipa i te paratarapha hopea o te api 2. E faataa anaˈe e te tuatapapa atoa ra te api parau iti i te mau faaiteraa faufaa e vai ra i roto i te Bibilia no nia i te tau a muri aˈe. E tamau anaˈe i te tauaparau mai te paratarapha toru o te api 5, ma te faaohipa i te mau irava.
9 Ua riro te opereraa o te mau api parau iti Bibilia ei ravea no te faaiteraa i te parau apî maitai o tei manuïa na. I te mea e mea ohie ia afai haere, e tano maitai te mau api parau iti na te mau fare e i roto i te pororaa-faanaho-ore-hia. E tuhaa faufaa to te reira i roto i ta tatou taviniraa. Ia rave ïa tatou e rave rau atoa api parau iti e ia faaohipa pinepine tatou i te reira no te haamata i te mau aparauraa.—Kol. 4:17.