Pahonoraa i ta outou mau uiraa

◼ Na vai te hopoia e tamâ i te Piha no te Basileia?

E haamaitai te hoê Piha no te Basileia mâ e te farii maitai i te poroi ta tatou e poro ra. (Hiˈo Petero 1, 2:12) Mea faufaa ïa ia vai mâ noa oia e te naho. E nehenehe te taata taitahi e turu i te reira. Eiaha tatou e manaˈo e na vetahi ê noa taua ohipa ra. I te rahiraa o te taime, na te haapiiraa buka taitahi, te tahi i muri aˈe i te tahi, te tamâraa e na te tiaau o te haapiiraa buka aore ra to ˈna apiti, e aratai i te ohipa. Mai te peu e te putuputu ra e rave rahi mau amuiraa i roto i te hoê â piha, e faanaho ïa te mau matahiapo i te tamâraa ia nehenehe te taatoaraa o te mau amuiraa e apiti mai.

Eaha te ravea maitai roa ˈˈe no te amo i taua hopoia ra? Te tamâraa ïa i te piha ia au i te hoê porotarama tamau. E titauhia te tauihaa e te puˈa e hinaarohia. E piahia, i te vahi ta te feia hinaaro e nehenehe e hiˈo, i te hoê tabula o te mau ohipa te tia ia rave. E nehenehe e faaohipa e piti tabula: hoê no te hoê tamâraa poto ia oti te putuputuraa, hoê no te hoê tamâraa rahi aˈe tahebedoma. Na te tiaau o te haapiiraa buka e faanaho i te tamâraa rahi i te mahana e te hora e tano ra no te taatoaraa i te apiti mai. Ia atuatu-tamau-atoa-hia te mau aua, te mau tiare e te mau raau iti. Eiaha te mau pehu ia vaiihohia i nia i te eˈa haereraa taata e i te vahi tapearaa pereoo. I te mau matahiti atoa, na mua rii noa ˈˈe paha i te oroa Haamanaˈoraa, ia faanahohia te hoê tamâraa rahi. Te vai ra te horoiraa i te mau haamaramarama, te mau pǎpai, te mau tapoˈi tahua e te mau paruru.

Papu maitai e e nehenehe taua ohipa ra e iti mai ia ara te taata taitahi i te faatopa i te chewing-gum aore ra vetahi atu â mau pehu i roto anei aore ra i rapae au i te piha. Ia vai nahonaho e ia vai mâ noa te mau vahi haumitiraa i muri aˈe i te faaohiparaahia no to muri iho. E ara anaˈe i te tuino i te mau tauihaa. E tapao anaˈe i te mau tafetafeta i nia i te tapoˈi tahua, te mau parahiraa ino, te mau fifi tuio pape, te mau hiˈo mori uira paapaa, e te vai atu â, e e faaite anaˈe i te taeae haapao i te atuaturaa o te Piha no te Basileia.

Ia ineine tatou i te rave i ta tatou tuhaa. E riro ïa ta tatou vahi haamoriraa ei mea au maitai e e faaite ïa tatou e e nunaa mâ tatou e faahanahana ra i te Atua ra o Iehova.—Pet. 1, 1:16.