Eaha ta outou e parau i te hoê Mahometa?
1 Ua poro aˈena anei outou i te hoê Mahometa? Mai te peu e e, ua ite paha outou e mea tiaturi roa te mau Mahometa i te Atua. Aita râ ratou i ite maitai eaha te Paradaiso o te fatata i te haamauhia i nia i te fenua mai tei faaitehia e te mau peropheta a Iehova. Aore ra, e hinaaro tatou e faaite ia ratou i taua tiaturiraa ra. (Tim. 1, 2:3, 4) E tia i te mau haamaramaramaraa i muri nei ia tauturu ia tatou ia horoa i te hoê faaiteraa maitai.
2 E tiaturi te mau Mahometa ia Allah, aore ra te Atua, oia atoa râ e e peropheta o Mahomet na te Atua. Te Coran o ta ratou ïa buka moˈa, e e parauhia ta ratou haapaoraa te Islam, oia hoi te auraa “auraro.” Te na ô ra te Coran e e mea ino ia haavare e ia haamori i te mau idolo, hoê anaˈe Atua e e ere oia i te Toru Tahi. Te haapii atoa ra te reira i te pohe-ore-raa o te nephe, te po auahi e te paradaiso i nia i te raˈi. E farii te mau Mahometa e e Parau na te Atua te Bibilia, e manaˈo râ ratou e ua tavirihia te reira, area te Coran ra, tei paruruhia i roto i to ˈna reo tumu, aita ïa i taui.
3 A faaite i te huru maitai, a faatano i te parau e a ite i te haapaoraa: Ia aparau outou i te hoê Mahometa, a faaite i te huru maitai e a faatano i te parau. (Mas. 25:15) Ia taa ia outou e ua aˈa roa ta ˈna mau tiaturiraa i roto ia ˈna e ua mau aau te reira i te rahiraa o te mau Mahometa. Eita ta ratou haapaoraa e haapii ia ratou ia haaferuri i nia i te mau haapiiraa faaroo e ia feruri e ia papu ia ratou iho eaha te hinaaro o te Atua. (Roma 12:2) No te tauturu i te hoê Mahometa, e titauhia te faaoromai e te taaraa i te huru.—Kor. 1, 9:19-23.
4 Eiaha outou e faaohipa i te tahi mau parau e ia manaˈo te hoê Mahometa e e melo outou no te hoê Ekalesia a te Amuiraa faaroo Kerisetiano. A faaite maitai e e ere outou i te hoê Katolika, e ere atoa i te hoê Porotetani, mea taa ê râ outou. A paraparau no nia i te Bibilia mai te Buka a te Atua. I te mea e e huru ê te mau Mahometa i te mau parau ra “Tamaiti a te Atua,” mea hau aˈe eiaha e faaohipa i te reira e eiaha e tauaparau i nia i taua tumu parau ra hou ratou e haere maitai ai i mua i te pae varua. E nehenehe râ outou e aparau no nia ia Iesu mai te hoê peropheta aore ra vea. Eiaha outou e aimârô atu. Ia ite outou e te haamata ra ta outou taata e paraparau ra i te riri, ma te mǎrû, a faarue oioi atu ia ˈna.
5 Mea hau aˈe ia paraparau i te hoê anaˈe taata maoti i te hoê pǔpǔ. E pinepine mea maitai ia poro te mau vahine i te mau vahine, e te mau tane i te mau tane. Papu maitai e te vai ra te tahi mau tupuraa taa ê, e tia râ ia hiˈo maitai. Hau atu â, e rave rahi mau Mahometa aita e au nei i te mea ta ratou e hiˈo ra mai te hoê faaahuraa aore ra hoê pahereraa rouru tei erehia i te haehaa no te hoê vahine. E tia ïa i te mau tuahine ia haapao maitai i te reira.—Kor. 1, 10:31-33.
6 Tumu parau tauaparauraa: A paraparau ma te anaanatae i te tiaraa rahi o te Atua e o to ˈna here. A parau oioi atu e e taata tiaturi mau outou, hoê anaˈe Atua (aita e Toru Tahi) e eita e fariihia te haamoriraa idolo. A paraparau no nia i te ino i te ao nei i teie mahana: te mau tamaˈi, te mau arepurepuraa tivila, te feii i te pae o te iri e te huru haavare o te taata e rave rahi e parau ra e e taata tiaturi ratou.
7 E horoa mai te buka rairai ra La direction venant de Dieu: le chemin qui mène au Paradis i te tahi atu mau manaˈo i nia i te mau tumu parau o te nehenehe e faaohipahia no te haamata i te hoê aparauraa e te mau Mahometa. Ua neneihia te reira ia anaanatae mai te mau Mahometa e ora ra i te hoê vahi e nehenehe ai ratou e haapii noa i te Bibilia.
8 Ei omuaraa, e nehenehe outou e parau e:
◼ “Te tutava ra vau i te tauaparau i te mau Mahometa iho â râ. I te mea e ua taio vau i te mau papai no nia i ta outou haapaoraa, te manaˈo ra vau ma te ore e hape e te tiaturi ra te mau Mahometa i te hoê Atua otahi e te mau peropheta atoa. [A vaiiho i te taata ia pahono.] Te hinaaro ra vau e tauaparau ia oe no nia i te hoê parau tohu tahito roa e faaite ra e e riro te fenua ei paradaiso. E nehenehe anei au e taio atu ia oe eaha ta taua peropheta ra i papai? [A taio i te Isaia 11:6-9.] Te faahaamanaˈo maira teie parau tohu ia ˈu i te hoê irava o te Coran i faahitihia i roto i teie buka rairai.” A tatara i te buka rairai ra Direction venant de Dieu i te api 9 e a taio i te faahitiraa i papai-meumeu-hia e faaite ra e e parahi te feia parau-tia i nia i te fenua. Mai te peu e e faaite te taata i te tahi anaanatae, a tamau i te aparau ma te hiˈopoa i te mau paratarapha 7 e tae atu i te 9 o te tahi atu api. A horoa ˈtu i te buka rairai i te taata e a faaau i te hoê hoˈi-faahou-raa e farerei e o ˈna.—E itea mai ia outou te tahi atu faaiteraa i roto i Te taviniraa o te Basileia no Febuare 1998, api 6, par. 27.
9 Ia hinaaro outou e titau manihini i te hoê taata ia hiˈopoa i te buka rairai ra Direction venant de Dieu, mea hau aˈe ia tauaparau mai te hoê aparauraa maoti i te hoê haapiiraa Bibilia. Ia oti roa te buka rairai i te hiˈopoahia, e tia i te taata ia ineine i te haapii i te buka rairai ra Titau aore ra te buka ra Te ite. Te vai ra te tahi atu mau papai i neneihia no te mau Mahometa, ei hiˈoraa te api parau iti ra Le chemin du Paradis: Comment le trouver? e te buka rairai ra Le temps de la vraie soumission à Dieu.
10 Maoti te iteraa i te mau tiaturiraa e te manaˈo o te mau Mahometa e nehenehe ai tatou e maiti ma te ite maite i te mau papai ta tatou e pûpû atu ia ratou e te ravea e horoa ˈi tatou i te faaiteraa. Ia tamau Iehova i te haamaitai i ta outou mau tutavaraa no te tauturu i te mau taata e rave rau ia tiaoro i to ˈna iˈoa e ia ora mai!—Ohi. 2:21.