Nafea ia tahoê maite e te utuafare—i roto i te taviniraa
1 E ere anei i te mea oaoa ia hiˈo i te mau tane e ta ratou mau vahine, te mau metua e ta ratou mau tamarii, ratou paatoa i roto i te taviniraa Kerisetiano e arue ra i mua i te taata i te iˈoa o Iehova? (Sal. 148:12, 13) E tia i te mau utuafare atoa ia faanaho i te hoê porotarama maitai no te poro tamau. Ua faataa anei to outou utuafare i te hoê mahana no te apiti i roto i te taviniraa i te mau hebedoma atoa? Mai te peu e e, ua ite maitai ïa te taata tataitahi eaha te tia ia ˈna ia faanaho no te apiti roa ˈtu â.—Mas. 21:5a.
2 No nia i taua mahana ra, no te aha e ore ai e faanahonaho ia outou no te faaineine ei utuafare i te tahi mau faahiˈoraa? Taa ê atu i to ratou faufaaraa rahi, e faatupu mai te mau taime faaineineraa i te hoê manaˈo tahoê mau e te utuafare. Te hoê taviniraa o tei riro ei ohipa na te taatoaraa e ua faaineine maitai te taata tataitahi ia ˈna, e hopoi mai ïa te reira i te mau oaoaraa rarahi.
3 Ua apiti atu te hoê tiaau haaati i roto i te opereraa vea e te hoê utuafare taatoa. Ua poro oia na te mau fare e te hoê o te mau tamahine, ua ani teie tamahine ia ˈna e: “Ehia hora e poro ai tâua?” Ua faataa ihora oia e e haere oia e poro e to ˈna papa. Papu maitai e te oaoa mau ra o ˈna e to ˈna papa e rave amui i ta raua taviniraa. Auê ïa feruriraa utuafare nehenehe e!
4 E nehenehe paha te mau melo o vetahi mau utuafare e riro paatoa ei mau pionie tauturu i roto i te hoê avaˈe o te matahiti. Aore ra, e nehenehe te hoê o ratou e riro mai ei pionie tauturu tamau aore ra e rave i te taviniraa pionie tamau. Ma te faanahonaho maitai e ma te tahoê maite, e nehenehe paha ratou pauroa e apiti hau atu â i roto i te taviniraa na roto i te tururaa ˈtu i te hoê o ratou tei riro ei pionie. Papu maitai e hopoi mai teie faarahiraa i te ohipa e te mau tupuraa maitatai i itehia i roto i te taviniraa i te mau haamaitairaa no te utuafare atoa.—Mal. 3:10.
5 Te mau utuafare e te rave ra te mau melo i te maraa ia ratou i roto i te ohipa pororaa, e taairaa piri ïa to ratou, mea itoito, mea hotu e mea oaoa ratou i roto i te taviniraa a Iehova!—Hiˈo Philipi 2:1, 2.