E haapii anaˈe i to tatou taata-tupu ia faufaahia oia
1 Te hinaaro nei Iehova e ‘ia faufaahia’ te taatoaraa o te taata. (Isa. 48:17, MN) Ua ite oia te tumu o te oaoaraa mau. To ˈna hinaaro rahi roa ˈˈe, ia ape ïa te mau taata i te ati e ia oaoa ratou i te oraraa ma te haapao maite i ta ˈna mau faaueraa. E faufaa-rahi-hia tatou ia ora tatou ia au i te eˈa o te Atua. (Sal. 34:8) Nafea ia haapii i to tatou taata-tupu ia na reira atoa?
2 Eaha ta te mau taata e hinaaro nei? Eaha te mau tapitapiraa a te mau taata i to outou vahi? E ere anei te parururaa i to ratou fare, te mau-papu-raa to ratou faaipoiporaa, te oraraa no a muri aˈe no ta ratou mau tamarii e vetahi atu â? Ia fifihia ratou, ihea ratou e imi ai i te tauturu? E tiaturi ratou ia ratou iho e to ratou mau aravihi aore ra e imi ratou i te mau aˈoraa i pihai iho ia vetahi ê. A na reira ˈi ratou, e rave rahi o te huru ê ra i mua i te mau manaˈo tano ore, e ere i te mea ohie ia faaohipa e eita ratou e faufaahia. E tia ïa ia tatou ia haapapu ia ratou e mea maitai aˈe te mau aˈoraa a te Parau a te Atua i te tahi atu mau aˈoraa. (Sal. 119:98) Nafea? Ma te faaite ia ratou e e nehenehe ratou e ora i te hoê oraraa maitai aˈe i teie nei â mai te peu e e tutava ratou i te haapii i te Bibilia e i te faaohipa i te reira.—Tim. 2, 3:16, 17.
3 Te hoê oraraa utuafare maitai aˈe: Mea iti te mau taata e ite mau ra e mea maitai mau te mau aˈoraa i faauruahia i roto i te Ephesia 5:22–6:4 no te faatitiaifaro i te mau fifi o te utuafare. Ei hiˈoraa: I muri aˈe hoê ahuru matahiti faaipoiporaa, te opua ra te hoê tane e ta ˈna vahine e faataa ia raua. Ua haapii râ te vahine i te Bibilia, e ua haapii oia i te mau faaueraa tumu a te Bibilia no nia i te faaipoiporaa. I te mea e te faaohipa ra oia i te reira, ua tapao oioi ta ˈna tane i te tahi mau tauiraa e ua apiti atu oia i roto i te haapiiraa. Ua faˈi oia i muri iho e: “Ua ite mâua i teie nei eaha te niu o te hoê oraraa utuafare oaoa mau.”
4 E auraa mau to te oraraa: Ua faataahia i te hoê taurearea i rave na i te raau taero o tei ani i te tauturu i te mau Ite no Iehova e te tapitapi ra Iehova ia ˈna. Te faatia ra oia e: ‘Ua itea ia ˈu e e opuaraa ta te Poiete no te mau taata e e horoa oia i te ora mure ore na te feia ta ˈna e farii. Eita ta outou e nehenehe e feruri i to ˈu oaoa rahi. I teie mahana, e mea oraora maitai au e te fanaˈo nei au i te hau o te feruriraa e te mau taairaa piri e o te Atua.’
5 E nehenehe te mau taata atoa e faufaahia i te tauturu ohie ta te Parau a te Atua e horoa ra. Mai te peu e e faariro tatou i teie buka ei aratai no tatou, te faaite ra ïa tatou e mea maitai roa ˈtu â te eˈa o Iehova i te mau eˈa o teie nei ao. (Sal. 116:12) Tei ia tatou te haamaitairaa e faaite haere i teie poroi e e haapii i to tatou taata-tupu ia faufaahia oia. Ma te na reira, e noaa ïa ia tatou te mau faahopearaa maitatai e rave rahi.