E haamata anaˈe i te mau haapiiraa Bibilia e te buka rairai ra Titau
1 Te faaite nei te mau tabula na te ao atoa nei e ua riro te buka rairai ra Eaha ta te Atua e titau ra ia tatou? ei mauhaa aravihi roa no te haapii i te mau taata i te parau mau. Maoti te reira, tau tausani haapiiraa Bibilia tei haamatahia i te mau hebedoma atoa. E outou, te manuïa ra anei outou i te haamata e i te faatere i te mau haapiiraa Bibilia e teie nei buka rairai?
2 Mai te peu e mea ohie no te rahiraa o te feia poro ia pûpû i te buka rairai, e mea fifi râ no vetahi ia haamata i te hoê haapiiraa, no te mea aita ratou e taa eaha te parau. Nafea ïa vetahi e manuïa ˈi? Papu maitai e tauturu rahi mai teie mau manaˈo i muri nei ia tatou.
3 E faaite anaˈe nafea ia faatere i te hoê haapiiraa: I te aparauraa matamua aore ra i te hoˈi-faahou-raa e farerei, maoti i te pûpû-noa-raa i te hoê haapiiraa Bibilia, e faaite tatou i te taata nafea e faaterehia ˈi te hoê haapiiraa Bibilia. E tatara te reira i te huru miterio e te mǎtaˈu ta te taˈo ra “haapiiraa” e faatupu mai i roto i te rahiraa. Ia taa anaˈe ia tatou i te na reira, e ite ïa tatou e ma te hoê noa omuaraa ohie, e nehenehe tatou e haamata roa ˈtu i te hoê haapiiraa.
4 Mea faufaa te faaineineraa: Ua taai-roa-hia ta tatou huru faaineineraa i to tatou anaanatae ia haamata i te mau haapiiraa Bibilia. Ma te faaineine oioi ia tatou, e haapaiuma ïa tatou i te feaaraa ia haamata e ia faatere i te mau haapiiraa Bibilia. E faahiti anaˈe i ta tatou mau faaiteraa e rave rahi taime. E tauturu te reira ia tatou ia paraparau mai ta tatou i matau, oia hoi ma to tatou iho huru e na roto i ta tatou iho mau parau. Eita noa te reira e tamǎrû ia tatou, e faatopa atoa râ i te hau o te taata o ta tatou e paraparau ra.
5 Ia na nia iho noa tatou i te faahiti, e faito anaˈe i te taime ia nehenehe tatou e faaara i te taata no nia i te maororaa o te faahiˈoraa. I muri aˈe i to ˈna faaiteraa o vai o ˈna, teie ta te hoê taeae e parau: “Te hinaaro nei au e faaite ia oe nafea matou e haapii ai i te Bibilia e te mau taata. E pae noa minuti te titauhia. E pae minuti anei ta oe?” E nehenehe te faahiˈoraa i nia i te haapiiraa 1 o te buka rairai ra Titau e ravehia fatata e pae minuti. Parau mau, e nehenehe noa tatou e taio i te tahi mau irava maiti-maitai-hia, mai te peu râ e ua tae tatou i te hopea o te haapiiraa i roto i na minuti e pae, ua haamata ïa te taata i ta ˈna haapiiraa Bibilia matamua. I muri iho, e faaara anaˈe ia ˈna e i te hebedoma i mua nei, e ravehia 15 minuti no te haapiiraa 2.
6 Ua manuïa te faahiˈoraa i muri nei:
◼ “Te hinaaro nei au e faaite ia oe nafea ia faatere i ta matou haapiiraa Bibilia; e mea ohie roa te haapiiraa e te vitiviti, i niuhia i nia i te buka rairai ra Eaha ta te Atua e titau ra ia tatou? Maoti teie haapiiraa, 15 minuti noa i roto 16 hebedoma, ua itea te mau taata e rave rahi i te mau pahonoraa Bibilia papu no nia i te tahi mau uiraa faufaa roa mai teie.” E taio oioi anaˈe i te tabula o te mau tumu parau. I muri iho, e rave anaˈe i te haapiiraa 1 ma te parau atu e: “Mai te peu e e pae minuti ta oe, e faaite atu vau ia oe i te tereraa. Teie te tumu parau o te haapiiraa 1 ‘Nafea oe e ite ai eaha ta te Atua e titau ra?’” E taio anaˈe i na uiraa e toru e e faataa anaˈe eaha te mau numera i roto i te mau tapao paruru. E taio anaˈe i te paratarapha matamua e e faaite anaˈe i te taata nafea ia ite i te pahonoraa. E haere anaˈe mai i te paratarapha 2. E nehenehe tatou e ani ia ˈna ia taio mai. E parau anaˈe mai teie e: “Ia au i ta oe i taio mai nei, nafea oe e pahono ai i teie uiraa? [E taio faahou anaˈe i te uiraa e e titau manihini anaˈe i te taata ia pahono mai.] A hiˈo e mau irava Bibilia tei papaihia i te mau paratarapha atoa. Te huti maira te reira i to taua ara-maite-raa i nia i te pahonoraa ta te Bibilia e horoa nei. Ei hiˈoraa, e rave anaˈe taua i te Timoteo 2, 3:16, 17 e e hiˈo anaˈe e te haapapu ra anei te reira i ta oe pahonoraa no nia i te Fatu o te Bibilia.” E taio anaˈe i te paratarapha 3, e hiˈopoa anaˈe i te uiraa e e taio anaˈe i te Ioane 17:3. I muri iho, e haafaufaa anaˈe i te ite ta te taata i noaa mai ma te faahaamanaˈo faahou i te haapiiraa. Ia tae i reira, e huri anaˈe i te api e e ui anaˈe i te uiraa hopea o te haapiiraa 2: “Eaha na ravea e piti e nehenehe ai tatou e haapii no nia i te Atua?,” i muri iho, e faaoti anaˈe mai teie: “No te hiˈopoa i te haapiiraa 2 e no te ite i te pahonoraa, e hinaaro ïa taua 15 minuti. Afea oe e vata ˈi?”
7 Mea faufaa ia faaohie e mai te peu e nehenehe, ia haapopou i te taata. Ia paraparau tatou ia ˈna no nia i te hoˈi-faahou-raa e farerei i mua nei, maoti hoi i te ani atu ia ˈna te hinaaro ra anei oia e haapii faahou, e faaitoito anaˈe ia ˈna ia hiˈopoa, ma te pee i taua noâ huru raveraa ra, i te haapiiraa i muri iho. E faaite anaˈe ia ˈna e te hinaaro roa nei tatou e hoˈi faahou mai. Ua ani vetahi feia poro ia hiˈopoahia te hoê haapiiraa na roto i te niuniu paraparau ia fifihia i te faanaho i te hoê taime farereiraa. E faaitoito anaˈe atoa i te taata e haapii ra ia tuu i ta ˈna buka rairai i te vahi papu e ia ohie ia rave mai ia ore oia ia imi i te hebedoma i muri iho.
8 Ia opua papu tatou: Mai te peu e e mea faufaa mau te faaineineraa, e tia atoa ia tatou ia opua papu i te faatere tamau i te haapiiraa. Mea fifi paha ia faatere i te hoê haapiiraa i roto i te tahi noa minuti. Ia opua papu ïa tatou i te faahiti noa i ta tatou faahiˈoraa no nia i te haapiiraa e rave rahi taime e titauhia, e tae roa ˈtu i te taime e nehenehe ai tatou e faatere ma te ohie. E na reira anaˈe i mua i te mau taata atoa ta tatou e poro ra, na te mau fare anei, ma te faanaho-ore-hia aore ra na roto i te niuniu paraparau. Mai te peu e mea fifi no tatou ia haamata i te hoê haapiiraa Bibilia, eiaha tatou e haaparuparu. Ia noaa mai te reira, e tia ia tatou ia opua papu e ia hinaaro mau e faaite i te parau mau.—Gal. 6:9.
9 Na roto i te faaohiparaa i teie mau manaˈo, e nehenehe atoa outou e fanaˈo i te haamaitairaa e tauturu i te hoê taata ia haere na nia i te eˈa o te ora, na roto i te haamataraa e i te faatereraa i te hoê haapiiraa Bibilia e te buka rairai ra Titau.—Mat. 7:14.