E faufaahia anei oe ia noaa ta oe iho tuhaa fenua?
1. Ta oe iho tuhaa fenua pororaa, eaha ïa te auraa?
1 Ta oe iho tuhaa fenua pororaa, eaha ïa te auraa? Ua rahi anaˈe te tuhaa fenua a te amuiraa, e horoahia ˈtu te hoê na oe, peneiaˈe i pihai iho mai i to oe fare. I te api 103, te faataa ra te buka Organisés: “Mai te peu e ua horoahia ˈtu te hoê tuhaa fenua piri atu i to oe vahi nohoraa, e poro e e aravihi atu â ïa oe. E nehenehe atoa oe e ani i te tahi atu taata poro ia apiti ia oe i roto i ta oe iho tuhaa fenua.”
2. Taa ê atu i ta te pǔpǔ pororaa, e nafea ia poro i roto i ta oe iho tuhaa fenua?
2 Taa ê atu i ta te pǔpǔ pororaa: Ua piri anaˈe ta oe iho tuhaa fenua i ta oe vahi raveraa ohipa, e nehenehe oe e poro i te taime faafaaearaa aore ra hou e hoˈi ai i te fare. E apiti atoa mai paha te tahi taata poro e rave ra i te ohipa na te reira vahi. E mai te peu e mea piri atu tera tuhaa fenua i to oe fare, mea ohie ïa no oe e to utuafare ia poro i te ahiahi. Aita anaˈe oe e haere i te putuputuraa no te pororaa, mea tano ia ani ma te pure i ta Iehova aratairaa hou a poro ai. (Phil. 4:6) Ia aifaito râ te taime e ohipa ˈi oe i roto i ta oe iho tuhaa fenua e ta to pǔpǔ pororaa. I te mau hopea hebedoma, e rave rahi te poro, mea maitai aˈe ïa ia amui atu e o ratou.
3. Eaha te mau maitai ia noaa ta oe iho tuhaa fenua?
3 Te mau maitai: Mai te peu e e tuhaa fenua ta oe iho, e nehenehe e poro atu i reira ia vata oe. E haa atu â ïa oe i roto i te pororaa e eita to taime e pau. Maoti tera faanahoraa e riro mai paha te tahi ei pionie tauturu aore ra tamau. Ua anaanatae mai paha te mau taata fare o te hoê â aroâ, mea ohie ïa ia hoˈi atu e farerei no te faatere i te haapiiraa Bibilia. No e rave rahi, ua tauturu te pororaa i roto i ta ratou iho tuhaa fenua ia haamatau i te mau taata fare. I to ratou iho â râ ohiparaa i te reira e rave rahi taime hou a faahoˈi ai no te tahi atu taata poro. Ia tauturu ta oe iho tuhaa fenua ia oe e to utuafare ia faahope roa i ta outou taviniraa e tia ˈi.—Tim. 2, 4:5.