E faaohipa anaˈe i te mau vea iti no te haaputapû i te feruriraa e te mafatu
1 E tia ia tufahia te parau mau Bibilia ma te haaputapû i te feruriraa e tae noa ˈtu i te mafatu. Ia tufa anaˈe Iesu i te parau mau i te feia e faaroo maira ia ˈna, e maiti maitai oia i te mau tumu parau o tei faaanaanatae o tei turai rahi ia ratou. (Luka 24:17, 27, 32, 45) Ua taai-rahi-hia te manuïaraa o ta tatou taviniraa i te mau tutavaraa o ta tatou e rave nei no te ite i te mau hinaaro pae varua o te feia e faaroo maira ia tatou.
2 E nehenehe te mau vea iti e riro mai ei mau mauhaa aravihi no te haaputapû i te feruriraa e te mafatu o te feia o ta tatou e farerei nei i roto i te taviniraa. E feruri anaˈe na mua e o vai te farii i te poroi o teie mau vea tataitahi e pûpûhia i te avaˈe Atete:
—Te haapao mau ra anei te Atua ia tatou? E mauruuru te feia veve aore ra tei roto i te mau fifi atâta mau i te poroi faaitoito no nia i te hoê oraraa no a muri aˈe aita e mauiui faahou.
—Eaha te tumu o te oraraa? Nafea outou e ite ai i te reira? E faufaahia te feia apî o te feruri maitai ra i nia i to ratou oraraa no a muri aˈe i te mau pahonoraa Bibilia o ta ratou e ite i roto i teie vea iti.
—E oaoa oe i te fenua e a muri noa ˈtu! Auaa e rave rahi mau hohoˈa e mau irava Bibilia i faahitihia, e taa ïa i te mau tamarii apî e te feia e mea fifi no ratou ia taio, i te mau opuaraa a te Atua.
—Te faatereraa o te haamau i te Paradaiso. E nehenehe te feia atoa e ohipa ra i roto i te faatereraa a te taata nei aore ra i te pae oraraa totiale e anaanatae i teie poroi, oia hoi e faatitiaifaro te Basileia o te Atua i te mau fifi o te huitaata nei.
—Ia pohe tei herehia e outou na. E mauruuru e rave rahi mau taata haapao i te hunaraa i te fanaˈoraa i teie vea iti no te mau utuafare e heva nei. Te faaohipa nei te feia poro o te poro nei i te mau vahi tanuraa maˈi i teie vea iti no te tamahanahana i te feia e heva nei. Ua tauaparau e piti tuahine i te hoê utuafare e hitu melo o te pure ra i mua i te hoê menema. Ua faaite atu raua i te poroi tamahanahana o te vea iti, e ua haamatahia ihora te hoê haapiiraa Bibilia e te metua vahine i te mahana i muri aˈe!
—E tia anei ia tiaturi i te Toru Tahi? E farii paha te hoê taata tiaturi rahi i te Atua i te parau mau e faaitehia ra i roto i teie tumu parau vauvau-maitai-hia o te faahiti ra i te haapiiraa tumu a te Amuiraa faaroo kerisetiano.
3 E tuatapapa maitai anaˈe i teie mau vea iti atoa e a feruri i te ravea maitai aˈe no te faaohipa i te reira i roto i te tuhaa fenua. E hiˈo faahou anaˈe i te mau omuaraa parau e horoahia ra i te api hopea o Te taviniraa o te Basileia no te avaˈe Tiurai 1998. Ia haamaitai Iehova i ta tatou mau tutavaraa no te haaputapû i te feruriraa e tae noa ˈtu i te mafatu o te taata!—Mar. 6:34.