Te porotarama no te mahana rururaa taa ê i mua nei
Ua haamatahia i te faanaho i te mau mahana rururaa taa ê i te matahiti 1987. E patu teie mau haaputuputuraa hoê mahana i te mau tavini o Iehova e te feia anaanatae o te apiti mai. I te avaˈe Setepa 1998, e vauvauhia te hoê porotarama apî i te mahana rururaa taa ê. E faufaahia outou i te pae varua na roto i na oreroraa parau e iva, e rave rahi mau uiuiraa manaˈo e te mau tupuraa ora-mau-hia.
“E haafaufaa anaˈe i te amuraa maa a Iehova,” teie te tumu parau o te rururaa. (Isa. 65:14; Kor. 1, 10:21) Na te reira e haapuai i to tatou hinaaro mau ia tuu i te haamoriraa ia Iehova i te parahiraa matamua i roto i to tatou oraraa. (Sal. 27:4) E vauvau te tiaau haaati i te tuhaa teie hoi te tumu parau “E hiˈopoa anaˈe i te mau hinaaro o to tatou nei mafatu,” o tei niuhia i nia i to tatou haerea ia apiti tatou i te mau putuputuraa. E horoa te hoê taeae orero ratere i te oreroraa parau i muri nei: “A tapea i to outou huru i te pae varua ma te tamaaraa i te amuraa maa a Iehova.” E horoa-atoa-hia te mau faaitoitoraa ohie i te mau melo apî o te faanahonahoraa a Iehova ia nehenehe ratou e tapea maite i te taviniraa a te Atua. E faaite mai te oreroraa parau tumu a te taeae orero ratere oia hoi “Puaihia i te pae varua no te poro ma te mǎtaˈu ore,” e mea nafea te mau faanahoraa i ravehia i roto i te amuiraa ia tauturu ia tatou ia poro ma te mǎtaˈu ore i te Basileia. O vai te ore e hinaaro ia faufaahia i teie porotarama?
E tia i te feia o tei pûpû iho nei ia ratou i te Atua e o te hinaaro ra e bapetizo, ia faaara oioi atu i te tiaau peretiteni. I te mea hoi te tomo ra tatou i roto i te 12raa o te matahiti no te mau mahana rururaa taa ê, ua papu ia tatou e e paarihia te feia atoa e tae mai i te pae varua no te ohipa e toe ra te tia ia ravehia.