E horoa anaˈe te tuhaa matamua i te mau mea hau atu i te faufaa
1 Eaha vetahi mau mea faufaa tei titauhia no te maitairaa i te pae varua? I roto i taua mau mea ra, te vai ra te haapiiraa tataitahi, te haereraa i te mau putuputuraa, te tamau-maite-raa i te pure, te mau amuimuiraa maitatai e te taviniraa kerisetiano. Eita tatou e vai oraora maitai noa i te pae varua, mai te peu e eita tatou e tapea i teie mau mea faufaa ei tuhaa matamua i roto i to tatou nei oraraa.
2 Tera râ, te aro nei tatou paatoa i te mau hinaaro o te tino nei e te hiaai nei tatou i te aˈo. (Gal. 5:17) Eiaha roa ˈtu e manaˈo e faufaahia tatou ia rave i te mau ohipa miimii. (Ier. 17:9) No reira, mai te peu e e hinaaro tatou e paruru i to tatou mafatu ia ore hoi ia haavarehia, e tia mau â ia hiˈopoa tamau ia tatou iho.—Mas. 4:23; Kor. 2, 13:5.
3 E hiˈopoa anaˈe i to tatou mafatu: No te reira, e uiui na tatou ma te papu i teie mau uiraa: Te hiaai uˈana ra anei au i te taio i te Parau a te Atua? (Pet. 1, 2:2) Te ite ra anei au i te faufaaraa ia haere i te mau putuputuraa atoa a te amuiraa? (Heb. 10:24, 25) Te tamau maite ra anei au i te pure? (Roma 12:12) Te amuimui ra anei au i te feia pae varua? (Roma 1:11, 12) Te titau ra anei au ia ˈu iho ia poro i te parau apî maitai? (Kor. 1, 9:16) Mai te peu e e pahono tatou e e i teie mau uiraa, te hinaaro ra ïa tatou e horoa te tuhaa matamua i te mau mea hau atu i te faufaa.
4 E hiˈopoa anaˈe i ta tatou porotarama tamahana: No te ohipa ia au i te hiˈopoaraa o te mau hinaaro o to tatou nei mafatu, e tia ia faataa i te mau mea matamua i roto i ta tatou porotarama ohipa. Te auraa o te reira, taa ê atu i vetahi atu mau mea, ia faanaho ïa i te taime no te taio tamau i te Bibilia e te numera tataitahi o Te Pare Tiairaa e te A ara mai na!, e no te faaineine i te mau putuputuraa. E tia atoa ia faaherehere i te taime no te utuafare fetii, no te haapiiraa anei aore ra no te pure tahoê. E taotia anaˈe i te taime no te tele aore ra no te matini roro uira. E rave anaˈe i te opuaraa papu e haere i te mau putuputuraa atoa a te amuiraa, e ia tuu i te reira na mua ˈˈe i te mau mea atoa ra. E faanaho anaˈe i te poro e to tatou utuafare fetii i te mau hebedoma atoa.
5 E mea papu maitai e ia horoa anaˈe tatou te tuhaa matamua i te mau mea hau atu i te faufaa i roto i to tatou nei oraraa, e oaoa ïa tatou i te reira.