E haapii tatou i te buka ra Te oaoa i te utuafare
E oaoa outou i te iteraa e, mai te hebedoma o te 6 no Atopa 1997, e tuatapapa tatou i te buka ra Te ravea e itehia ˈi te oaoa i te utuafare i roto i te mau haapiiraa buka a te amuiraa. Aita ïa tatou e hinaaro ra e mairi i te haapiiraa tapǔpǔ no nia i teie buka aratai tano maitai no te hoê oraraa utuafare oaoa, buka aratai niuhia i nia i te mau Papai. Na roto i te porotarama haapiiraa, e nehenehe e tuatapapa hohonu i te mau paratarapha tataitahi e te mau irava tataitahi i faahitihia i roto i te buka.
E haapiihia te pene matamua taatoa i te hebedoma matamua, no te mea aita i rahi te mau irava i faahitihia o tei ore i papai-pauroa-hia. No teie atoa tumu, e tuatapapa tatou i te pene 15 i te hoê anaˈe taime. Teie râ, e haapii tatou i te tahi atu mau pene atoa e piti aˈe taime, oia hoi fatata te afaraa i te hebedoma taitahi. E navai maitai ïa te taime no te taio e no te tatara i te mau irava atoa i faahitihia e no te tuatapapa maitai e nafea ia faaohipa i te mau irava atoa i papai-pauroa-hia i roto i te paratarapha tataitahi.
Ua riro te tuatapaparaa i te mau uiraa haamanaˈoraa i tarenihia i te hopea o te pene tataitahi, ei tuhaa faufaa roa o te haapiiraa. E tia ïa ia navai maitai te taime no te pahono i teie mau uiraa e no te hiˈopoa i te mau irava i faahitihia.
Te anihia nei i te mau taeae faatere i te haapiiraa buka ia faaineine taa ê ia ratou; e faaitoito ratou i te mau melo o te pǔpǔ o ta ratou e haapao ra, e tae noa ˈtu i te feia apî, ia faaineine maitai ia ratou, ia haere tamau mai i teie putuputuraa e ia horoa atoa i te mau pahonoraa.—om 75-77.