E tauturu anaˈe i te taata ia ite i te tamǎrûraa
1 E rave rahi mau taata o tei rohirohi roa i te faaroo-noa-raa i te parau no te mau ati, te mau tamaˈi, te mau ohipa iino e te mau mauiui. Aita roa ˈtu te parau no te tamǎrûraa e faahitihia nei na roto i te mau parau apî, te hinaaro rahi nei râ te huitaata i te reira. Te auraa o te tamǎrûraa i te hoê taata, o te tamahanahanaraa ïa ia ˈna, o te horoaraa ˈtu i te puai e te mau tumu e tiaturi ai, te tautururaa ia ˈna ia faaoromai i te tamataraa. Ua faaineinehia te mau Ite no Iehova no te horoa i teie huru tauturu. (Kor. 2, 1:3, 4) Te vai ra i roto i ta tatou mau vea iti niuhia i nia i te Bibilia, o ta tatou hoi e pûpû i te mau avaˈe Tiurai e Atete, te mau poroi no te parau mau e no te tamahanahanaraa. (Roma 15:4) Teie te tahi mau manaˈo no te tauturu ia tatou ia vauvau atu i te reira i roto i te mau tupuraa huru rau:
2 E nehenehe tatou e faahiti i te hoê ati i tupu iho nei no te faaite i te poroi e no te tamǎrû i te taata i te na ôraa e:
◼ “Ia tupu anaˈe teie mau huru ati, te aniani nei vetahi e te vai mau ra anei te Atua, e mai te peu e e, te haapao maira anei oia ia tatou. Eaha to oe manaˈo? [A vaiiho i te taata ia pahono.] Hoê ravea no te ite e te vai mau ra anei te hoê Atua, o te faaohiparaa ïa i te hoê ture matau-maitai-hia.” A taio i te Hebera 3:4. A faahiti i te tahi mau mea e haaati ra ia tatou o tei poiete-mau-hia. I muri iho, a parau atu e: “Te vai ra ta ˈu te hoê vea iti, e papu maitai e tamǎrû te reira ia oe. To ˈna iˈoa, Te haapao mau ra anei te Atua ia tatou? [A taio i te mau uiraa i nia i te api rapaeau.] Te vauvau nei oia i te mau haapapuraa feaa ore, eiaha noa no nia i te vai-mau-raa o te Atua, oia atoa râ, ua fatata roa oia i te faaore i te mau huru tupuraa tia ore atoa o ta tatou e ite nei i teie mahana. E hinaaro anei oe e taio?” I muri iho, a faaau i te hoê taime no te hoˈi mai e farerei ia ˈna.
3 Ia hoˈi mai tatou, e nehenehe tatou e parau e:
◼ “Ua paraparau tâua no nia i te haapapuraa e te vai mau nei te Atua e ua vaiiho mai au i te vea iti ra Te haapao mau ra anei te Atua ia tatou? Peneiaˈe ua tapao mai oe i teie nei manaˈo i te api 7. [A faaite i te hohoˈa e a haapoto noa ˈtu i te par. 15.] O te hoê noa ïa hiˈoraa teie i rotopu i te tahi e faaite ra e te vai mau ra te hoê Atua o te haapao maira ia tatou. [A taio i te par. 27 i te api 9.] Auaa ta ˈu haapiiraa Bibilia, e nehenehe ta ˈu e faaruru i te mau fifi o te oraraa i te mau mahana atoa, no te mea te horoa nei oia i te manaˈo o te Atua i nia i te mau mea.” A ani i te taata e e faaite atu outou e nafea ia haapii.
4 Pororaa na roto i te niuniu paraparau ma te faaohipa i te vea iti ra “Eaha te tumu o te oraraa? Nafea outou e ite ai i te reira?” E nehenehe tatou e faaite e o vai râ tatou e e parau atu e:
◼ “Te taniuniu atu nei au ia oe no te hoê poroi faufaa roa, no te mea eita ta ˈu e nehenehe e farerei roa ˈtu ia oe.” A taio i te paratarapha matamua i te api 4 o te vea iti, ma te ohie noa, mai te mea e tei mua tatou i te taata. A ani i to ˈna manaˈo e a vaiiho ia ˈna ia pahono. “Ua matara ta ˈu Bibilia i te Isaia 45:18. Te faaite ra teie irava e ua hamanihia te fenua no tatou nei. E nehenehe anei ta ˈu e taio atu i teie irava?” I muri iho, a faataa ˈtu i te fa o teie vea iti e a ani atu e e nehenehe anei e afai atu i te tahi na ˈna.
5 Ia taniuniu faahou atu tatou, e nehenehe tatou e tamata i te ravea i muri nei no te haamata i te haapiiraa:
◼ “Te hinaaro nei au e faahohonu atu â i ta tâua aparauraa na roto i te hoê hiˈoraa e faaite ra e i nia ia vai tatou e fariu ai ia noaa mai te mau pahonoraa no nia i te tumu o te oraraa. [A tatara i te mau par. 1 e te 2 i te api 6 o te vea iti ra Tumu o te oraraa.] Te faataa ra te Apokalupo 4:11 e, o te Atua ra o Iehova to tatou Poiete. [A taio i te irava.] Te vai ra iho â te hoê tumu papu no reira oia i poiete mai ai ia tatou. E rave rahi mau taata i hinaaro na e ite i teie tumu, o tei haapii i te Parau papaihia a te Atua, oia hoi te Bibilia. Tera atoa ïa ta ˈu e hinaaro nei e faaau ia oe.” A faataa ˈtu e mea nafea ta tatou mau haapiiraa Bibilia tamoni ore i te fare o te taata e ravehia ˈi e a faaau i te hoê taime no te haamata i te haapiiraa.
6 E nehenehe teie omuaraa parau faaitoito e tamǎrû i te feia ua pohe te hoê taata herehia e ratou:
◼ “Te rave nei au i te hoê taviniraa na te huiraatira no te tauturu i te feia atoa ua pohe te hoê taata herehia e ratou. O te hoê ïa o te mau ati fifi roa ˈˈe ia faaruru. No reira, ua faaineinehia te hoê vea iti, Ia pohe tei herehia e outou na. Ua tauturu aˈena oia e rave rahi mirioni taata. Te hinaaro nei au e faaite ia oe e eaha ta ˈna e parau ra no nia i te hoê parau tǎpǔ anaanatae mau a Iesu Mesia. [A taio i te paeraa o te paratarapha i te api 26, e te Ioane 5:21, 28, 29 atoa.] A hiˈo na i teie hohoˈa, i te api 29: to Iesu ïa faatia-faahou-raa mai ia Lazaro ia au i te faatiaraa a te mau Evanelia. Mai te peu e e anaanatae oe i te taioraa i teie vea iti tamǎrû mau, e oaoa vau i te vaiihoraa mai i teie na oe.”
7 I te hoˈi-faahou-raa e farerei, e nehenehe tatou e faaite â i te hohoˈa i te api 29 o te vea iti ra “Ia pohe tei herehia e outou na,” e e parau atu e:
◼ “I te taime i mairi aˈenei, ua tauaparau tâua no nia i te tia-faahou-raa o Lazaro. [A taio i te tatararaa o te hohoˈa i te api 28 e a hiˈopoa i te mau manaˈo e vauvauhia ra i raro aˈe i te upoo parau iti ra “Ua tupu mau anei?”] Mai te peu e e farii to oe mafatu i te tiaturiraa e e farerei faahou oe i te hoê mahana i te hoê taata i pohe, mai te peu e e tia ia oe, e nehenehe ïa vau e tauturu ia oe ia noaa atoa i te tiaturiraa i te tia-faahou-raa.” A faaau atu i muri iho i te hoê haapiiraa Bibilia.
8 E tutava anaˈe i te mau avaˈe i mua nei i te pee i te hiˈoraa o Iesu ma te “haamahanahana i te feia i mihi ra.”—Isa. 61:2.