E faaaraara te mau putuputuraa ia rave i te mau ohipa maitatai
1 E piti tuhaa faufaa i roto i ta tatou nei haamoriraa: te haereraa mai i te mau putuputuraa o te amuiraa e te pororaa. Te haere apipiti nei raua ma te ohipa te tahi i nia i te tahi. Te faaaraara nei te mau putuputuraa ia rave i te mau ohipa maitatai; oia, te ohipa faahiahia roa ˈˈe, o te pororaa ïa e te faariroraa i te taata ei pǐpǐ. (Heb. 10:24) Mai te peu e e faarue tatou i te mau putuputuraa, e oioi noa ïa tatou i te faaea i te poro, no te mea aita tatou e faaaraara-faahou-hia ra.
2 I te mau putuputuraa hebedoma, te fanaˈo nei tatou i te hoê haapiiraa i te pae varua o tei faanahohia no te faaaraara ia tatou ia poro. Na teie haapiiraa e faahaamanaˈo mai ia tatou e te ora nei tatou i te hoê anotau ru, e na te reira e turai ia tatou ia faaite i te poroi ora a te Bibilia. Te faaitoitohia nei e te haapaari-atoa-hia nei tatou no te faaruru i roto i te pororaa. (Mat. 24:13, 14) E mea na roto i te horoaraa i te mau pahonoraa i te mau putuputuraa e matau ai tatou i te faaite i to tatou faaroo i mua i te taata. (Heb. 10:23) E na roto i te tapaoraa ia tatou i te Haapiiraa o te Taviniraa Teotaratia e haapii ai tatou ia aravihi ei tavini e ia haamaitai i to tatou ite no te haapii i te taata.—Tim. 2, 4:2.
3 Mea nafea te mau putuputuraa o te taviniraa ia faaaraara ia tatou no te poro: E tia ia tatou tataitahi ia taio na mua ˈˈe te mau tumu parau o Te taviniraa o te Basileia. E mau maitai ïa i roto i to tatou feruriraa ia haapii faahou tatou i te reira i roto i te putuputuraa o te taviniraa, e i roto i te mau faahiˈoraa e vauvauhia mai na mua. I roto i te pororaa, e nehenehe ïa tatou e haamanaˈo i Te taviniraa o te Basileia, e te mau faahiˈoraa, e te hopea o te reira, e aravihi atu ïa tatou i te faaiteraa i te poroi. E rave rahi mau taata poro e na reira nei.
4 I muri aˈe i te putuputuraa o te taviniraa, te faanaho nei vetahi feia poro no te farerei no te poro amui. Te vai noa râ i roto i to ratou feruriraa te mau manaˈo i horoahia mai, e haapuaihia ratou e te hinaaro e tamata no te mea, na te putuputuraa i faaitoito na ia ratou ia poro i te hebedoma tataitahi.
5 Aita roa hoê aˈe mea e mono i ta tatou mau putuputuraa kerisetiano. I roto i te mau putuputuraa e amui mai ai to tatou mau hoa ia tatou nei, e i roto atoa i te mau putuputuraa e faaaraarahia ˈi tatou no te rave i te mau ohipa maitatai. E hinaaro anei tatou ia manuïa ta tatou taviniraa? No reira, e haere tamau anaˈe i te mau putuputuraa. E faaite anaˈe to tatou mauruuru ia Iehova no teie nei faanahoraa faahiahia mau na roto i ‘te oreraa e faarue i to tatou haaputuputuraa.’—Heb. 10:25.