Ia tapitapi mau tatou no te taata atoa e anaanatae ra
1 Fatata roa, e hope te ohipa pororaa i te Basileia ati aˈe te ao nei; i muri iho, e haamouhia “te feia aore i ite i te Atua.” (Tes. 2, 1:7-9) Tera te tumu e turai ra i te nunaa o Iehova, o te tapitapi mau nei hoi no te ora o vetahi ê, ia faaite i te poroi o te Basileia i te rahiraa taata e nehenehe.—Zeph. 2:3.
2 I te mau avaˈe atoa, e mau mirioni hora te pûpûhia nei no te maimi i te feia e hinaaro ra e faaroo “i te mau parau apî maitatai no te tahi mea maitai aˈe.” (Isa. 52:7, MN) I to tatou pûpûraa ˈtu i te papai no te avaˈe, e rave rahi o tei farii i te mau vea ra Te Pare Tiairaa e A ara mai na! aore ra i te vea iti ra Eaha ta te Atua e titau ra ia tatou? E faaite tatou e te tapitapi mau ra tatou no teie mau taata, ia haapao oioi noa tatou i te anaanatae i faaitehia mai.—Mas. 3:27.
3 E rave anaˈe i te mau tapaopaoraa papu maitai: E hoona aˈe ta tatou ohipa, mai te peu e e rave tatou i te mau tapaopaoraa hope roa e te papu no nia i te anaanatae i faaitehia mai e te papai o ta tatou i vaiiho. Ia tapao tatou i te iˈoa e te vahi nohoraa o te taata, te mahana e te hora o to tatou haereraa mai, te papai i vaiihohia e te tumu parau i faahitihia, e tauturu te reira ia tatou ia ohipa ma te aravihi aˈe ia hoˈi atu tatou e farerei ia ˈna. E tapao atoa tatou i te tahi o ta ˈna mau parau i faahiti i roto i te tauaparauraa matamua; e tauturu hoi te reira ia tatou no te haamata faahou i te aparauraa i te hoˈi-faahou-raa e farerei.
4 E hoˈi oioi anaˈe e farerei i te taata: Ehia taata o ta outou i vaiiho i te mau papai i te avaˈe i mairi aˈenei o ta outou i tamata i te hoˈi atu e farerei? E mau hebedoma anei tei mairi e aita outou i hoˈi aˈe e hiˈo ia ratou? Mai te peu e te tapitapi mau ra tatou i te ora mure ore o teie mau taata, e hoˈi oioi atu ïa tatou e hiˈo ia ratou, mea hau aˈe tau mahana noa i muri iho, no te mea te haamanaˈo noa râ ratou i ta tatou tauaparauraa. Mea na roto i te haere-oioi-raa e farerei i te taata i anaanatae mai, e nehenehe ai tatou e na mua ˈtu ia Satani, o ‘te haere maira e hopoi ê atura i te parau i ueuehia i roto [ia ratou] ra.’—Mar. 4:15.
5 E mea faufaa roa ia faaineine: Ua taaihia te aravihi i roto i te mau hoˈi-faahou-raa e farerei, i ta tatou huru faaineineraa. E feruri maitai tatou hou tatou e haere ai, e nafea tatou ia paraparau atu i te taata. Te horoa ra te api hopea o Te taviniraa o te Basileia no Eperera 1997 e rave rau huru faaiteraa i te mau vea e i te vea iti ra Titau o ta tatou e nehenehe e faaohipa ma te manuïa. I muri iho, e feruri anaˈe i te tahi mau manaˈo o ta tatou e hinaaro ra e tufa ia hoˈi atu tatou e farerei i te taata. Eaha ta tatou e nehenehe e parau no te faaara â i te anaanatae? Nafea ia haamata i te hoê haapiiraa Bibilia?
6 No te faahaere â i te hoê aparauraa i reira to tatou faahitiraa i te ohipa e tia ia ravehia no te tamâ i te fenua nei ia riro mai oia ei vahi faaearaa maitai roa, e nehenehe tatou e parau e:
◼ “I te taime i mairi aˈenei, ua faaoti tâua e, ia riro mai te fenua ei paradaiso hau mau, e tia ia ravehia te mau faanahoraa etaeta. Ia manaˈo anaˈe oe, te vai ra anei i te taata nei te mau huru maitatai titauhia no te rave i teie nei ohipa? [E vaiiho tatou i te taata ia pahono.] A hiˈo na e no te aha e titauhia ˈi e ia faaô mai te Atua i roto i te mau ohipa a te taata nei.” E taio tatou i te Salamo 37:38, e i muri iho, e haere tatou i roto i te vea iti ra Titau, i te haapiiraa 5, e e maiti tatou i te mau tuhaa o te mau paratarapha 4-5 e faaite ra e nafea te Atua ia faatupu i teie parau tohu. E faahope tatou i te aparauraa ma te pûpû atu i te hoê haapiiraa Bibilia i nia i te vea iti.
7 Mai te peu e ua paraparau tatou no nia i te Basileia e ua vaiiho tatou i te vea iti ra “Titau” i to tatou tere matamua, e nehenehe tatou e hoˈi atu e hiˈo i te taata ma te parau atu e:
◼ “I to tâua paraparauraa i te taime i mairi aˈenei, ua ite mai tâua e, te Basileia o te Atua, e faatereraa mau ïa e na ˈna e faatere mai i nia i te fenua taatoa. Te faaite ra te Bibilia e, o Iesu Mesia te faatere. Ua ite anei oe e eaha te mau haamaitairaa ta teie huru faatereraa e ta teie huru faatere e hopoi mai?” E vaiiho tatou i te taata ia pahono. E iriti tatou i te vea iti ra Titau i te haapiiraa 6. E te tahi mau manaˈo maitihia i roto i te mau paratarapha 6-7 e te hohoˈa i te api 13, e faaite tatou e eaha ta te Basileia o te Atua e rave no te huitaata nei. E taio anaˈe i te Daniela 2:44 e, mai te peu e e tano, e pûpû atu tatou i te buka ra Te ite e te hoê haapiiraa Bibilia.
8 Mai te peu e ua farii te taata o ta tatou i farerei e, o te mau haapaoraa o te ao nei te tumu o te mau fifi o te huitaata nei, ei hiˈoraa, e nehenehe tatou e ani atu ia hoˈi tatou e farerei ia ˈna e:
◼ “Aita anei oe i uiui aˈenei e nafea tatou e ite ai i te haapaoraa i fariihia e te Atua? [E vaiiho tatou i te taata ia pahono.] I roto i teie nei vea iti, Eaha ta te Atua e titau ra ia tatou?, te vauvauhia nei te mau tapao e ite ai tatou i te haapaoraa mau.” E haere tatou i te haapiiraa 13 e e haamatara tatou i na tapao e pae i papai-faaopa-hia i roto i te mau paratarapha 3-7. I muri iho, e nehenehe tatou e parau e: “E mea faufaa ia ite i te haapaoraa mau, tera râ, e tia atoa ia tatou ia imi e eaha ta te Atua e ani ra ia tatou tataitahi.” E taio anaˈe i te Ioane 4:23, 24. E ani atu tatou ia ˈna ia faahohonu atu â i te aparauraa. E rave anaˈe i te haapiiraa 1 o te vea iti e e faaite tatou e nafea ia faaterehia te hoê haapiiraa Bibilia.
9 No te faahaere â i te hoê aparauraa no nia i te oaoa o te utuafare i mua, e nehenehe tatou e pee i teie nei hiˈoraa:
◼ “I to tâua farereiraa i te taime matamua, ua faataa ˈtu vau ia oe e te ravea e oaoa ˈi te utuafare, o te faaohiparaa ïa i te mau aˈoraa a te Parau a te Atua, oia hoi te Bibilia. I to oe manaˈoraa, e nehenehe anei te Bibilia e pahono i te mau hinaaro o te utuafare no teie nei tau, aore ra ua hope anei to ˈna anotau?” E vaiiho tatou i te taata ia pahono. E faaite atu tatou i te buka ra Te ite. E iriti tatou i te buka i te pene 2 e e taio tatou i te faahitiraa i te paratarapha 13. E pûpû tatou i te hoê haapiiraa Bibilia utuafare ma te faaohipa i te mau manaˈo o te paratarapha 3.
10 Na roto i te raveraa i te mau tapaopaoraa papu maitai, na roto i te faaineine-maitai-raa e te hoˈi-oioi-raa ˈtu e hiˈo i te mau taata no te faaara ˈtu â i to ratou anaanatae, e faaite ïa tatou i te here i te taata-tupu, e here o te aratai mai ia ratou i nia i te eˈa o te ora.—Mat. 22:39; Gal. 6:10.